1. Kiko ta e diferensia entre e kosnan ku nos tin mester di dje i e kosnan ku nos ke tin?

UN ESKRITOR a yega di bisa ku hende tin mester di tiki kos, pero nan ke masha hopi kos. Ta parse ku hopi hende no sa e diferensia entre nan nesesidatnan material i e kosnan ku nan ke tin. Kiko ta e diferensia? Un ‘nesesidat’ ta algu ku nos tin mester di dje pa nos por biba, manera kuminda, paña i un dak riba nos kabes. Loke nos “ke tin” ta algu ku nos ta deseá, pero ku no ta esensial pa bida di tur dia.

2. Kiko ta algun kos ku hende ke tin?

² Loke hende ke tin por varia bastante di un pais pa otro. Na paisnan den desaroyo, hopi hende simplemente ke tin sufisiente plaka pa kumpra un telefòn selular, un bròmfits òf un pida tereno. Na paisnan mas riku, kisas hende ke tin paña karu, un kas mas grandi òf un outo mas luhoso. Sea kual sea e kaso, ta einan e peliger ta sinta. Un hende ku kai den e trampa di materialismo ke mas i mas kos material, sea e tin mester di nan òf nò i sea e por afòrt nan òf nò.

3. Kiko ta materialismo?

³ Kiko ta materialismo? Esei ta ora un hende ta preokupá mas ku kos material ku kos spiritual. Materialismo ta ankrá den un hende su deseonan, prioridatnan i meta den bida. Materialismo ta duna nos e gana pa yega na hopi kos material. Un hende materialista no nesesariamente tin hopi plaka òf ta kumpra kos karu. Asta hende pober por kai den e trampa di materialismo i keda sin buska e Reino promé.—Heb. 13:5.

4. Kon Satanas ta usa e “deseo di wowo”?

⁴ Satanas ta usa e sistema komersial di su mundu pa sedusí nos i pone nos kere ku pa nos disfrutá di bida, nos mester di mas i mas kos material. E ta bon den usa e “deseo di wowo” pa pone nos kai den e trampa di materialismo. (1 Huan 2:15-17; Gén. 3:6; Pro. 27:20) Mundu ta ofresé tur sorto di kos material, for di e kosnan di mas fabuloso te na e kosnan di mas apsurdo. Anto tin di nan ta masha atraktivo. Bo a yega di kumpra algu djis pasobra bo a mir’é den un propaganda òf den un showcase i no pasobra bo tabatin mester di dje? Bo a realisá despues ku bo por biba sin dje? E kosnan ei por kompliká nos bida i pone un peso grandi riba nos. Nan por ta un trampa pa nos i por kita nos for di nos rutina spiritual di studia Beibel, prepará pa reunion i asistí na reunion i partisipá regularmente den sirbishi. Kòrda, apòstel Huan a spièrta ku “mundu ta pasa bai i tambe su deseonan.”

5. Kiko por pasa ku hende ku ta gasta kasi tur nan energia na akumulá mas kos material?

⁵ Satanas ke pa nos ta esklabo di Rikesa, no di Yehova. (Mat. 6:24) Hende ku ta gasta hopi energia na akumulá yen di kos material pa satisfasé nan deseonan egoista lo tin un bida spiritualmente bashí i yen di amargura i frustrashon. (1 Tim. 6:9, 10; Rev. 3:17) Ta manera Hesus a bisa den su ilustrashon di e sembradó. Ora e mensahe di Reino “kai meimei di mata di sumpiña . . . , [e] deseo pa tur otro kos ta drenta den nan kurason i stek e palabra, i nan no ta duna fruta.”—Mar. 4:14, 18, 19.

6. Ki lès nos por saka for di e ehèmpel di Baruk?

⁶ Tuma komo ehèmpel Baruk, e sekretario di profeta Yeremías. Segun ku e destrukshon di Herúsalèm tabata yega serka, Baruk a kuminsá “buska kosnan grandi” pa su mes; kosnan ku no tabatin balor duradero. Pero e úniko kos ku e mester a spera di haña ta loke Yehova a primintié: “Lo mi duna bo bo bida komo botin.” (Yer. 45:1-5) Siguramente Dios lo no a protehá poseshon material di ningun hende den un stat ku tabata bai ser destruí. (Yer. 20:5) Segun ku nos ta yega mas serka di e fin di e sistema di kosnan akí, awor no ta tempu pa akumulá yen di kos material. Nos no mester ferwagt ku nos poseshonnan material, pa kuantu balor ku nan por tin òf pa kon pegá nos por ta na nan, lo bai ser protehá durante e tribulashon grandi.—Pro. 11:4; Mat. 24:21, 22; Luk. 12:15.

7. Kiko nos lo konsiderá den e artíkulo akí, i dikon?

⁷ Hesus a duna e mihó konseho tokante kon nos por haña e kosnan material ku nos tin mester di dje pa biba sin laga nan kita nos enfoke, sin bira materialista òf laga nan preokupá nos innesesariamente. Nos por haña e konseho  akí den su Sermon Riba Seru. (Mat. 6:19-21) Ban lesa i konsiderá e pasashi na Mateo 6:25-34. Esei lo konvensé nos ku nos mester buska e “Reino kontinuamente” i no kosnan material.—Luk. 12:31.

8, 9. (a) Dikon nos no tin ku preokupá demasiado ku e kosnan ku nos tin mester di dje? (b) Kiko Hesus tabata sa di hende i nan nesesidatnan?

⁸ Lesa Mateo 6:25. Ora Hesus a manda su oyentenan pa “stòp di ta anshá pa [nan] bida,” bon mirá, el a bisa nan pa “stòp di preokupá.” Nan tabata preokupá pa kos ku nan no mester a preokupá kuné. Hesus a bisa nan pa stòp di hasi esei, i ku bon motibu. Ora un hende ta preokupá sin ta na nodi, aunke ta pa motibunan bálido, e por ser distraí, i e por lubidá kiko ta e kosnan di mas importante den bida, esta, kosnan spiritual. Hesus tabata asina interesá den su disipelnan ku den su sermon el a spièrta nan kuater biaha mas tokante e tendensia peligroso ei.—Mat. 6:27, 28, 31, 34.

⁹ Dikon Hesus a bisa nos pa no preokupá ku kiko nos lo kome, bebe òf bisti? Akaso e kosnan ei no ta algun di e nesesidatnan básiko di bida? Sigur ku sí! Ta natural pa nos preokupá si nos no por yega na e kosnan akí, no ta bèrdat? Klaru ku sí, i Hesus tabata sa esei. E tabata konsiente di hende su nesesidatnan di tur dia. Ademas, e tabata sa ku den “e último dianan,” su disipelnan lo enfrentá difikultat pasobra e tempu lo a bira ‘krítiko i difísil pa trata kuné.’ (2 Tim. 3:1) Den e tempu akí hopi kaminda tin desempleo, inflashon, skarsedat di kuminda i miseria. Ma Hesus a realisá tambe ku ‘bida ta mas importante ku kuminda i kurpa mas importante ku paña.’

10. Ora Hesus a siña su siguidónan kon pa hasi orashon, kiko el a bisa mester ta e kos di mas importante den nan bida?

¹⁰ Mas promé den Hesus su sermon, el a siña su oyentenan pa pidi nan Tata selestial pa nan nesesidatnan físiko, bisando: “Duna nos awe nos pan di kada dia.” (Mat. 6:11) Na un otro okashon, el a bisa nan pidi: “Duna nos kada dia e pan ku nos mester pa e dia ei.” (Luk. 11:3) Pero esei no ta nifiká ku e úniko kos ku nos mester pensa ariba ta kon pa yega na nos nesesidatnan físiko. Den e mesun orashon ei, Hesus a siña su oyentenan pa pidi promé pa e Reino di Dios bini. (Mat. 6:10; Luk. 11:2) Pa trankilisá su oyentenan, Hesus a rekordá nan kon Yehova ta perkurá pa su kreashon.

11, 12. Kiko nos por siña for di e manera ku Yehova ta perkurá pa e paranan? (Wak e promé plachi.)

¹¹ Lesa Mateo 6:26. Nos tin ku “opservá e paranan di shelu bon.” Pa chikitu ku e bestianan ei ta, nan ta kome hopi fruta, simia, insekto òf bichi. Kompará ku hende, pa e peso di nan kurpa, na proporshon nan ta kome mas. Ma nan no tin nodi di kultivá e tera i sembra simia pa nan haña kuminda. Yehova ta perkurá tur loke nan tin mester. (Sal. 147:9) Klaru ku e no ta pone e kuminda den nan boka. Tin kuminda na abundansia, ma ta nan mes mester bai busk’é.

¹² Pa Hesus, tabata imposibel pa kere ku su Tata selestial lo perkurá kuminda pa e paranan i keda sin perkurá pa e nesesidatnan básiko di hende. ^[1] (1 Ped. 5:6, 7) Yehova no ta pone kuminda den nos boka, ma e por bendishoná nos  esfuersonan pa kultivá e tera òf pa yega na e plaka ku nos tin mester pa kumpra nos kuminda di tur dia. Si nos ta den nesesidat, e por motivá otro hende pa kompartí loke nan tin ku nos. Aunke Hesus no a bisa ku Yehova ta duna e paranan un kaminda di biba, sí el a duna nan instinto, kapasidat i e materialnan ku nan tin mester pa traha nèshi. Asina tambe, Yehova por yuda nos haña un lugá adekuá pa nos ku nos famia biba.

13. Kon nos por sa ku nos ta bal mas ku e paranan di shelu?

¹³ Hesus a puntra su oyentenan: “Boso no ta bal mas ku [e paranan di shelu]?” Sin duda, Hesus lo tabata pensa ku pronto despues e tabata bai duna su bida na fabor di humanidat. (Kompará ku Lukas 12:6, 7.) Kristu no a duna su bida komo un sakrifisio di reskate pa niun otro kriatura. E no a muri pa e paranan di shelu, ma el a muri pa nos por biba pa semper.—Mat. 20:28.

14. Kiko un persona ku ta preokupá demasiado no por hasi?

¹⁴ Lesa Mateo 6:27. Dikon Hesus a bisa ku un hende ku ta preokupá demasiado no por rèk su bida ni un krenchi? Pasobra maske kuantu nos preokupá pa nos nesesidatnan di tur dia, nos lo no biba mas largu tòg. Al kontrario, si nos ta muchu preokupá, ansiedat por duna nos strès i asta kousa nos morto prematuro.

15, 16. (a) Kiko nos ta siña for di e manera ku Yehova ta perkurá pa e flornan di mondi? (Wak e promé plachi.) (b) Ki preguntanan nos lo mester hasi nos mes, i dikon?

¹⁵ Lesa Mateo 6:28-30. Ken lo no ke tin paña nèchi, foral pa bai sirbishi,  reunion òf asamblea? Asta si ta asina mes, nos mester “ansha tokante kiko pa bisti”? Un biaha mas Hesus ta hala atenshon na e kreashon di Yehova. Nos por siña hopi for di e “flornan di mondi.” Kisas Hesus tabatin na mente flor bunita manera tùlp. Flor no tin nodi di hila òf weef tela ni kose paña pa nan bisti. Pero nan ta floria masha bunita! Figurá bo, “ni Rei Sálomon den tur su gloria no a bisti manera un di e flornan akí.”

¹⁶ E punto ku Hesus kier a trese padilanti ta esaki: “Si ta asina Dios ta bisti yerba di mondi, . . .  kuantu mas lo e no bisti boso, hende di poko fe?” Siguramente Yehova lo hasi esei! Pero e disipelnan di Hesus tabata falta fe. (Mat. 8:26; 14:31; 16:8; 17:20) Nan mester tabatin mas fe i konfiansa den Yehova. Kiko di nos? Nos ta konvensí ku Yehova ke i por perkurá pa nos?

17. Kiko por daña nos relashon ku Yehova?

¹⁷ Lesa Mateo 6:31 i 32. Nos no mester imitá hende di “e nashonnan” ku no ta kere den un Tata selestial ku ta stima hende i ku ta perkurá pa esnan ku ta pone interes di Reino na promé lugá den nan bida. Si nos ta purba di akumulá tur “loke e nashonnan ta kore tras di dje,” nos lo daña nos relashon ku Yehova. Pero nos por ta sigur ku si nos hasi loke nos mester hasi, esta, pone interesnan di Reino na promé lugá den nos bida, Yehova lo no keda sin duna nos tur loke nos tin mester di dje. Nos “deboshon na Dios” mester motivá nos pa keda kontentu ku “kuminda, paña i un dak riba nos kabes.”—1 Tim. 6:6-8.

18. Kiko Yehova sa di kada un di nos, i kiko lo e hasi pa nos?

¹⁸ Lesa Mateo 6:33. Kristiannan semper mester pone e Reino na promé lugá den nan bida. Si nos hasi esei, Hesus a bisa ku Dios lo ‘duna nos tur e kosnan akí.’ Dikon el a bisa esei? El a splika den e versíkulo anterior ku nos ‘Tata selestial sa ku nos tin mester di tur e kosnan akí,’ esta, e nesesidatnan di bida. Yehova sa ki nesesidat nos tin asta promé ku nos mes bira konsiente di esei. (Flp. 4:19) E sa kua di nos pañanan lo gasta promé. Ademas, e sa kiko nos mester kome i ki bibienda lo ta bon pa nos i nos famia. Yehova lo sòru pa nos haña loke realmente nos tin mester di dje.

19. Dikon nos no mester preokupá ku loke por sosodé den futuro?

¹⁹ Lesa Mateo 6:34. Ripará ku pa di dos biaha Hesus a bisa pa “no sea nunka anshá.” E no tabata ke pa nos preokupá ku e problemanan di mañan, sino pa nos konfia plenamente ku Yehova lo yuda nos. Si un hende ta demasiado preokupá tokante loke lo por sosodé den futuro, lo e por bai purba di konfia den su mes en bes di konfia den Dios, i esei por afektá su relashon ku Yehova.—Pro. 3:5, 6; Flp. 4:6, 7.

20. (a) Ki meta bo por pone pa bo hasi mas den e sirbishi di Yehova? (b) Kiko bo por hasi pa simplifiká bo bida?

²⁰ Lo no ta niun tiki sabí pa gasta nos tempu i energia pa buska mas i mas kos material en bes di buska interesnan di Reino. Nos mester purba di alkansá metanan spiritual. Por ehèmpel, bo por bai yuda un kongregashon kaminda tin nesesidat pa mas publikadó di Reino? Bo por traha pionero? Si bo ta un pionero, bo a pensa di apliká pa bai e Skol pa Predikadó di Reino? Bo por traha partaim na Bètel òf na un ofisina di tradukshon? Bo por bira un boluntario den e programa di Diseño i Konstrukshon Lokal òf traha partaim den proyektonan di konstrukshon i renobashon di Salònnan di Reino? Pensa kon bo por simplifiká bo bida pa bo por hasi mas den e sirbishi di Yehova. Analisá e kuadro “ Kon pa Simplifiká Bo Bida” huntu ku orashon, i dal e pasonan nesesario pa logra bo meta.

21. Kiko lo yuda bo hala mas serka Yehova?

²¹ Ku bon motibu anto Hesus a siña nos pa buska e Reino i no kosnan material. Si nos hasi esei, nos no tin nodi di ta anshá pa motibu di nos nesesidatnan material. Nos ta hala mas serka Yehova ora nos konfia den dje en bes di kore tras di tur loke nos haña gana di tin òf kumpra tur loke mundu ta ofresé, asta si nos por afòrt e. Si nos simplifiká nos bida aworakí, nos lo “haña un gara firme riba loke realmente ta [e] bida” ku lo bini pronto.—1 Tim. 6:19.