1, 2. (a) Di kiko e regalo ekstraordinario di Dios ta konsistí? (b) Kiko nos lo bai trata den e artíkulo akí?

YEHOVA a duna nos e regalo di mas grandi posibel ora ku amor pa hende a motiv’é pa manda su Yu unigénito na tera. (Huan 3:16; 1 Huan 4:9, 10) Apòstel Pablo a yama esaki un “regalo ku nos no por deskribí ku palabra.” (2 Kor. 9:15) Dikon Pablo a bisa esei?

² Pablo tabata sa ku e sakrifisio perfekto di Hesus tabata un garantia ku tur e promesanan di Dios lo a kumpli. (Lesa 2 Korintionan 1:20.) Pues, e “regalo ku nos no por deskribí ku palabra” ta konsistí di e sakrifisio ei i di tur e bondat i amor leal ku nos ta haña di Yehova pa medio di Hesus. Ku rason nos no tin palabra pa deskribí e regalo ekstraordinario akí! Ki efekto un regalo asina mester tin riba nos? Kiko nos por hasi pa mustra ku nos ta apresiá e regalo ei, foral awor ku nos ta bai konmemorá e morto di Hesus riba djárason 23 di mart 2016?

3, 4. (a) Kon bo ta sinti bo ora un hende duna bo un regalo? (b) Ki tipo di regalo por kambia bo bida? Duna un ehèmpel.

³ Nos tur gusta haña regalo, pero tin regalo ta asina spesial ku nan ta kambia nos bida. Por ehèmpel, imaginá bo ku un hende a kometé un krímen i a keda kondená na morto. Ora nan ta a punto di ehekut’é, un persona ku e no konosé diripiente ta bini dilanti i ofresé pa muri na su lugá. Ki efekto un regalo ekstraordinario asina lo tin riba e persona kulpabel?

⁴ Si algu asina mester pasa ku bo, lo bo no keda sumamente gradisidu pa tal muestra di amor? Sin duda esei lo pone bo reflekshoná riba kiko bo ta hasiendo ku bo bida. Podisé asta lo bo sinti bo obligá pa hasi algun kambio den bo bida. Probablemente lo bo bira mas generoso i bondadoso, i kisas asta pordoná hende ku a hasi bo daño. Pa restu di bo bida lo bo ta gradisidu na e persona ku di su propio boluntat a sakrifiká su mes pa bo, no ta bèrdat?

5. Dikon e regalo ku Yehova a hasi di e reskate ta mas balioso ku kualke otro regalo?

⁵ Loke Yehova a hasi pa nos pa medio di Kristu ta algu muchu mas balioso ku djis salba e bida ku nos tin aworakí, manera a ser deskribí den e ehèmpel anterior. (1 Ped. 3:18) Wak dikon. Nos tur ta pekadó i kondená na morto for di ora nos a nase. (Rom. 5:12) Amor a motivá Yehova pa manda Hesus na tera pa muri pa nos. (Heb. 2:9) Pa medio di e sakrifisio ei Yehova a pone e base pa kaba ku morto, i esei lo permití nos biba pa semper. (Isa. 25:7, 8; 1 Kor. 15:22, 26) Pues, tur hende ku pone fe den Hesus lo por biba pa semper den pas i felisidat, sea komo rei den shelu huntu ku Hesus òf aki riba tera bou di e Reino di Dios. (Rom. 6:23; Rev. 5:9, 10) Kiko mas e regalo ku Dios a duna nos ta inkluí?

6. (a) Kua di e bendishonnan di Yehova bo ta anhelá mas tantu? (b) Menshoná tres kos ku e regalo di Dios ta motivá nos pa hasi.

⁶ Komo parti di e regalo di Yehova, e tera lo bira un paradeis, tur malesa lo ser kurá i e mortonan lo resusitá. (Isa. 33:24; 35:5, 6; Huan 5:28, 29) Nos por ta masha gradisidu na Yehova i na su Yu stimá pa nan regalo asina maravioso; esei sin duda ta laga nos stima nan mas tantu ainda. Pero e pregunta ta keda: Kiko nos por hasi pa demostrá nos apresio? Laga nos wak tres kos ku e regalo di Yehova ta motivá nos pa hasi: (1) sigui e ehèmpel di Hesus fielmente, (2) trata nos rumannan ku kariño i amor i (3) pordoná nan di kurason.

7, 8. (a) Kon e amor di Kristu mester laga nos sinti nos? (b) Kon nos ta demostrá ku nos tin e deseo ei?

⁷ Na promé lugá, e amor ku Dios tin pa nos mester motivá nos pa biba pa Kristu Hesus. Manera apòstel Pablo a bisa: “E amor di Kristu ta obligá nos.” (Lesa 2 Korintionan 5:14, 15.) Pablo a realisá ku e amor di Kristu ta algu asina ekstraordinario ku esei mester “obligá nos”—òf motivá nos—pa biba pa Kristu. Si di bèrdat nos a komprondé kiko Yehova a hasi pa nos, nos ta haña e deseo pa biba di alma i kurason pa Hesus. Kon nos ta demostrá ku nos tin e deseo ei?

⁸ Hende ku ta stima Yehova ta sinti nan motivá pa sigui e ehèmpel di Hesus i kana den su pasonan fielmente. (1 Ped. 2:21; 1 Huan 2:6) Un otro manera ku nos ta demostrá ku nos ta stima Yehova ku Hesus ta ora nos ta obedesé nan. Hesus a bisa: “Esun ku aseptá mi mandamentunan i kumpli ku nan ta esun ku stima mi. I esun  ku stima mi, mi Tata lo stim’é, i ami tambe lo stim’é i mustr’é bon kla ken mi ta.”—Huan 14:21; 1 Huan 5:3.

9. Ki preshon nos ta konfrontá tur dia?

⁹ E periodo rònt di konmemorashon di e morto di Hesus, òf Memorial, ta un bon oportunidat pa nos analisá nos mes i wak den ki rumbo nos bida ta bai. Puntra bo mes: ‘Te kon leu mi ta imitando Hesus? Tin kosnan ku mi mester mehorá?’ Ta masha importante pa analisá bo mes di e manera akí, pasobra konstantemente e mundu ta pone preshon riba nos pa hasi kos na su manera. (Rom. 12:2) Si nos deskuidá, nos lo por kuminsá sigui e ideanan popular di mundu i asta imitá su artista- i deportistanan famoso. (Kol. 2:8; 1 Huan 2:15-17) Kiko por yuda nos resistí e preshonnan ei?

10. (a) Kiko nos por puntra nos mes durante e temporada di Konmemorashon? (b) Kiko nos mester hasi despues di kontestá e preguntanan ei? (Wak e promé plachi.)

¹⁰ Por ehèmpel, nos por usa e temporada di Konmemorashon pa wak kiko nos tin den nos kashi di paña, ki tipo di muzik i vidio nos tin na kas i kiko nos tin riba nos kòmpiuter, telefòn i tablet. Segun bo ta pasa den bo pañanan, puntra bo mes: ‘Si mi mester bai un lugá kaminda Hesus lo ta presente, lo mi sinti mi kómodo ku e paña akí bistí? Si mi bistié, hende lo pensa ku mi ta un Testigu di Yehova?’ (Lesa 1 Timoteo 2:9, 10.) Nos por puntra meskos tokante nos kolekshon di pelíkula i muzik. ‘Hesus lo wak mi pelíkulanan? Lo e skucha mi muzik? Si Hesus mester fia mi telefòn selular òf mi tablet, lo mi sinti bèrgwensa si e wak e kosnan ku mi tin riba nan? Lo mi por splik’é dikon mi gusta sierto wega di vidio?’ Nos amor pa Yehova mester motivá nos pa deshasí di tur loke no ta apropiá pa un disipel di Kristu, sin importá kuantu e ta kosta. (Echo. 19:19, 20) Ora nos a dediká nos mes na Yehova, nos a primintié ku di e momento ei padilanti nos lo a usa nos bida pa sigui den e pasonan di Hesus. Nos no mester keda ku nada ku por stroba nos di hasi esei.—Mat. 5:29, 30; Flp. 4:8.

11. (a) Kon nos amor pa Yehova i pa Hesus ta influensiá nos trabou di prediká? (b) Kon nos amor por motivá nos pa yuda rumannan di nos kongregashon?

¹¹ Nos amor pa Hesus ta motivá nos tambe pa dediká nos mes di henter nos alma na e trabou di prediká i siña hende. (Mat. 28:19, 20; Luk. 4:43) Den e periodo rònt di Memorial, nos lo tin e oportunidat di sirbi komo pionero ousiliar i dediká 30 òf 50 ora na e predikashon. Lo bo por regla bo kosnan di tal manera ku bo por hasié? Un ruman hòmber biudo di 84 aña a pensa ku lo e no por a traha pionero debí na su edat i problemanan di salú. Ma e pioneronan den su área a dun’é un man i el a logra yega su meta di 30 ora. Nan a buska e teritorionan mas adekuá p’e, i nan tabata bin busk’é i hib’é den sirbishi. Abo lo por yuda un ruman di bo kongregashon traha pionero ousiliar den e temporada di Konmemorashon? Ta klaru ku no ta tur hende tin e posibilidat di traha pionero, pero nos tur por usa nos tempu i energia pa hasi mas den nos sirbishi na Yehova. Esei ta un otro manera pa mustra ku e amor di Kristu ta motivá nos, meskos ku el a motivá Pablo. Kiko mas e amor pa Yehova ta motivá nos pa hasi?

12. E amor ku Dios tin pa nos ta motivá nos pa hasi kiko?

¹² Na di dos lugá, e amor ku Dios tin pa nos ta motivá nos pa stima nos rumannan.  Apòstel Huan a skirbi: “Rumannan stimá, si ta asina Dios a stima nos, e ora ei nos tambe ta obligá di stima otro.” (1 Huan 4:7-11) Pues, nos no por ferwagt ku Yehova lo stima nos si nos no ke stima nos rumannan. (1 Huan 3:16) E amor ei no mester ta ku palabra so. Den ki maneranan práktiko nos por demostr’é?

13. Ki ehèmpel Hesus a pone pa nos?

¹³ Wak e ehèmpel di Hesus. Tempu e tabata riba tera, el a duna atenshon spesial na hende ku mas tabatin mester di yudansa. El a kura esnan malu, lam, siegu, surdu i muda. (Mat. 11:4, 5) Hesus no tabata manera e lidernan religioso ku a trata e pueblo komun malu i bisa ku nan “ta maldishoná.” (Huan 7:49) Al kontrario, e tabata gusta siña tur hende ku tabata deseá di sa mas di Dios. E tabata stima e hendenan humilde ei i a traha duru pa sirbi nan.—Mat. 20:28.

14. Kiko bo por hasi pa mustra e rumannan di bo kongregashon ku bo ta stima nan?

¹⁴ E temporada di Konmemorashon ta un bon oportunidat pa nos imitá Hesus i tuma tempu pa pensa riba e rumannan di nos kongregashon. Sin duda, nos lo mira maneranan ku nos por mustra nan ku nos ta stima nan, foral esnan di mas edat. Dikon no bishitá nan? Kisas bo por hiba un kuminda pa nan, hasi un trabou na kas pa nan, hiba nan reunion òf invitá nan pa sali ku bo den sirbishi di vèlt. (Lesa Lukas 14:12-14.) No lubidá: e amor ku Dios tin pa nos mester motivá nos pa buska maneranan pa mustra ku nos ta stima nos rumannan.

15. Kiko nos tur mester rekonosé?

¹⁵ Na di tres lugá, e amor ku Yehova a demostrá mester motivá nos pa pordoná nos rumannan. Komo ku nos tur ta yu di e promé hende, Adam, nos tur a heredá piká i ta kondená na morto. Niun di nos no por bisa ku nos no tin mester di e reskate di Kristu. Asta e sirbidó di Dios di mas fiel tin mester di e regalo sumamente bondadoso i inmeresí akí di Yehova. Ta komo si fuera Yehova a pordoná nos un debe masha grandi mes. Dikon ta importante pa nos rekonosé esaki? Den un di e ilustrashonnan di Hesus nos ta haña e kontesta.

16, 17. Kiko nos ta siña for di e historia di e rei ku a kanselá un debe grandi di su esklabo?

 ¹⁶ Hesus a konta e historia di un rei ku a kanselá e suma di 60.000.000 denario (10.000 talento) ku un di su esklabonan tabata deb’é. Ma e esklabo, na su turno, no tabata dispuesto pa kanselá 100 denario ku un kompañero tabata deb’é. Ora e rei a haña sa esei, el a bira furioso. Kon e esklabo por a sera su kurason pa su kompañero despues ku e rei sí a tene miserikòrdia di dje i kanselá su debe? E rei a bis’é: “Esklabo malbado, ami a kanselá henter bo debe ora bo a supliká mi. Abo tambe lo no mester a tene miserikòrdia di bo kompañero, meskos ku ami a tene miserikòrdia di bo?” (Mat. 18:23-35, nota) Bon mirá, e esklabo tabatin e obligashon di pordoná su kompañero, pasobra su doño a tene gran miserikòrdia di dje. Meskos ku e rei, ta komo si fuera Yehova a kanselá un debe grandi ku nos tin ora ku el a pordoná nos nos pikánan. Pues, kiko su amor i miserikòrdia mester motivá nos pa hasi?

¹⁷ Segun ku nos ta prepará pa e Konmemorashon, nos mester puntra nos mes si tin rumannan ku nos tin problema pa pordoná. Si ta asina, esaki ta un bon momento pa imitá e ehèmpel di Yehova, un Dios ku ta “kla pa pordoná.” (Sal. 86:5; Neh. 9:17) Si nos ta apresiá loke Yehova a hasi pa nos ora ku el a kanselá e debe grandi ku nos tin, e ora ei nos tambe lo tene miserikòrdia ku otro hende i pordoná nan di kurason. Kòrda ku si nos no ta stima nos rumannan ni ta pordoná nan, nos no por ferwagt ku Yehova lo stima nos i pordoná nos. (Mat. 6:14, 15) Ta bèrdat ku ora nos pordoná un hende, esei no ta kambia e echo ku el a kousa nos daño. Ma un kos ta sigur, esei lo yuda nos haña un pas interior i nos lo ta mas felis.

18. Kon e amor ku Dios tin pa nos a yuda Lily soportá e imperfekshonnan di Carol?

¹⁸ Pa hopi di nos kisas no ta fásil pa “sigui soportá” e imperfekshonnan di nos rumannan. (Lesa Kolosensenan 3:13, 14; Efesionan 4:32.) Tuma por ehèmpel Lily, un ruman muhé soltero ku pa hopi tempu tabata yuda Carol, un ruman muhé di su kongregashon ku tabata biuda. ^[1] Lily tabata hiba Carol tur kaminda ku outo, e tabata hasi kompra p’e i yud’é ku hopi kos mas. Ma Carol tabatin un karakter masha difísil i tabata kritiká tur kos. Asina mes, Lily tabata purba di konsentrá riba e bon kualidatnan di Carol. El a keda yuda Carol pa hopi aña, te ora Carol a bira malu i muri. Apesar di tur kos, Lily ta anhelá di mira Carol den Paradeis. E di: “Mi tin gana di sa kon lo e ta ora e ta perfekto.” Sí, e dia lo yega ku tur imperfekshon lo disparsé. Mientrastantu, e amor ku Dios tin pa nos ta motivá nos pa tene pasenshi i sigui soportá nos rumannan.

19. Kon abo lo mustra apresio pa e regalo ekstraordinario ku Yehova a duna nos?

¹⁹ No tin duda ku Yehova a duna nos un regalo ekstraordinario ku “nos no por deskribí ku palabra.” No lubidá esei nunka. P’esei, laga nos probechá di e temporada akí di Memorial pa pensa i meditá riba tur loke Yehova ku Hesus a hasi pa nos. Esaki lo yena nos kurason ku gratitut i lo motivá nos pa sigui e pasonan di Hesus fielmente, pa trata nos rumannan ku kariño i amor i pa pordoná nan di kurason.