1, 2. Dikon Pablo a skirbi un karta na e kristiannan hebreo?

TABATA aña 61 di e promé siglo, i den e kongregashonnan kristian plamá den Israel tabata reina un periodo basta trankil. Asta apòstel Pablo, ku tabata prezu na Roma, a pensa ku pronto lo el a sali liber. Su kompañero Timoteo a kaba di sali for di prizòn, i nan a plania pa bai bishitá e rumannan na Hudea. (Heb. 13:23) Pero nan no tabata sa ku e periodo di pas ei lo no a dura muchu: den apénas sinku aña, un ehérsito enemigu lo a rondoná Herúsalèm, presis manera Hesus a profetisá. Kristiannan na Hudea, i foral esnan ku tabata biba na Herúsalèm, e ora ei lo mester a aktua lihé, ya ku Hesus a spièrta nan ku nan mester a hui asina ku nan a mira e kosnan akí kuminsá pasa.—Luk. 21:20-24.

² Hesus a duna e profesia ei 28 aña pasá, i durante e tempu akí, e kristiannan hebreo a keda fiel apesar di hopi persekushon i prueba severo. (Heb. 10:32-34) Ma Pablo tabata sa ku un di e pruebanan di mas grandi di nan fe lo mester a bini ainda, i e kier a prepará nan pa esaki. (Mat. 24:20, 21; Heb. 12:4) Nan lo tabatin mester di fe i perseveransia manera nunka promé pa nan por a obedesé e palabranan di Hesus; nan bida lo a dependé di esei. (Lesa Hebreonan 10:36-39.) Pues, Yehova su spiritu a  motivá Pablo pa skirbi e rumannan stimá ei. E karta akí, ku awor ta konosí komo e buki di Hebreonan, mester a prepará nan i fortalesé nan pa loke tabata warda nan.

3. Dikon e karta na e Hebreonan ta importante pa nos awe?

³ E karta ku Pablo a skirbi na e Hebreonan ta importante pa nos awe tambe. Dikon? Pasobra nos ta biba den un tempu paresido na esun di nan. Durante e “tempunan krítiko, difísil pa trata kuné” akí, e pueblo di Dios a wanta tur tipo di prueba severo i persekushon, i nos a demostrá fuera di tur duda ku nos fe i lealtat na Dios ta firme manera un baranka. (2 Tim. 3:1, 12) Pero mayoria di nos ta biba na e momentonan akí den sirkunstansianan basta trankil i no ta pasando den persekushon feros. Pero meskos ku e kristiannan den tempu di Pablo, nos mester ta alerta, pasobra pronto nos lo enfrentá e prueba di mas grandi di nos fe!—Lesa Lukas 21:34-36.

4. (a) Kiko ta e teksto di aña pa 2016? (b) Dikon e teksto akí ta masha oportuno?

⁴ Kon nos por prepará pa e susesonan ku tin nos dilanti? Den e karta na e Hebreonan, Pablo a duna vários sugerensia ku por yuda nos hasi nos fe mas fuerte. Un rekordatorio importante nos ta haña na Hebreonan 13:1, ku ta animá nos: “Sigui stima otro manera ruman.” E versíkulo ei a keda skohé komo e teksto di aña pa 2016.

5. Kiko stima otro manera ruman ta enserá?

⁵ E palabra griego ku Pablo a usa pa e ekspreshon “stima otro manera ruman” (òf, “amor fraternal”) ta filadelfia, i e ta nifiká literalmente “kariño pa un ruman.” E ta enserá un kariño profundo i spesial ku un hende ta sinti pa un miembro di famia òf pa un amigu íntimo. (Huan 11:36) Nos no ta djis yama otro ruman; nos ta sinti ku di bèrdat nos ta ruman di otro. (Mat. 23:8) Pablo a bisa: “Pa loke ta amor di ruman, tene tierno kariño pa otro. Pa loke ta mustra onor na otro, tuma e inisiativa.” (Rom. 12:10) E tipo di amor akí, huntu ku amor basá riba prinsipio kristian (amor agape), ta promové union i amistatnan será entre e sirbidónan di Dios.

6. Ken kristiannan berdadero ta konsiderá nan “ruman”?

⁶ Segun un komentarista, e ekspreshon “stima manera ruman” ta aparesé kasi den literatura kristian so. Pa e hudiunan, e palabra “ruman” a referí mayoria di biaha na un miembro di famia i tin biaha na otro hudiu, pero nunka na hende di otro nashon. En kambio, kristiannan berdadero ta yama tur hende ku ta sirbi Yehova nan “ruman,” sin importá nan nashonalidat. (Rom. 10:12) Yehova a siña nos stima otro manera ruman. (1 Tes. 4:9) Pero dikon ta asina importante pa nos sigui demostrá amor pa nos rumannan?

7. Dikon nos mester demostrá amor pa nos rumannan?

⁷ E motibu prinsipal ta pasobra esei ta un mandato di Yehova. Nos no por bisa ku nos ta stima Dios i na mes momento ta nenga di stima nos rumannan. (1 Huan 4:7, 20, 21) Un di dos motibu ta ku nos tin mester di otro, foral den tempu difísil. Pablo tabata sa ku algun di e kristiannan hebreo lo a bai pèrdè  nan kas i nan pertenensianan. Hesus a splika kon difísil e tempu ei lo tabata. (Mar. 13:14-18; Luk. 21:21-23) Pues, mas ku nunka e kristiannan ei mester a hasi nan amor pa otro mas fuerte.—Rom. 12:9.

8. Kiko nos tin ku hasi for di awor, promé ku e tribulashon grandi kuminsá?

⁸ Denter di poko, e tribulashon di mas grandi den historia di humanidat lo kuminsá. (Mar. 13:19; Rev. 7:1-3) Ora e momento ei yega, nos lo tin ku obedesé e mandato akí di Dios: “Bini, mi pueblo, drenta den bo kambernan i sera bo portanan bo tras; skonde pa un poko tempu, te ora indignashon pasa.” (Isa. 26:20) E “kambernan” akí kisas ta referí na nos kongregashonnan. Bon mirá, ta na nos reunionnan nos ta bini huntu komo ruman pa adorá Yehova. Pero djis bai reunion ku regularidat no ta basta. Pablo a bisa e rumannan hebreo ku nan mester a usa e okashonnan ei pa “stimulá otro pa mustra amor i hasi bon obra.” (Heb. 10:24, 25) P’esei ta awor nos mester fortalesé nos kariño pa nos rumannan, pasobra esei lo bai yuda nos wanta kualke prueba ku bini den futuro.

9. (a) Ki oportunidatnan nos tin pa demostrá ku nos stima nos rumannan? (b) Kon e pueblo di Dios a demostrá amor pa nan rumannan? (Wak tambe e nota final.)

⁹ Echo ta ku for di awor, promé ku e tribulashon grandi kuminsá, nos tin mester di e kariño ku ta uni nos komo ruman. Hopi di nos rumannan ta víktima di temblor, inundashon, orkan, tsunami i otro desaster natural. Algun ruman ta sufri pa motibu di oposishon i persekushon. (Mat. 24:6-9) Fuera di tur esaki, tur dia nos ta konfrontá problemanan finansiero kousá pa e korupshon ku ta reina den mundu. (Rev. 6:5, 6) Pero mas tantu e problemanan ei bira, mas oportunidat nos lo tin pa demostrá nos rumannan kuantu nos stima nan. “Amor di mayoria di hende lo fria,” ma nos amor mester sigui floresé.—Mat. 24:12. ^[1]

10. Kiko nos lo bai analisá awor?

¹⁰ Kon nos por sigui stima nos rumannan apesar di tur e problemanan ku nos ta konfrontá den bida? Den ki maneranan nos por demostrá e amor ei? Despues ku Pablo a animá e rumannan pa “sigui stima otro manera ruman,” el a menshoná vários manera pa demostrá esei. Laga nos analisá seis di nan.

11, 12. (a) Kiko ta hospitalidat? (b) Kon nos por mustra hospitalidat? (Wak e promé plachi.)

¹¹ “No lubidá di mustra hospitalidat.” (Lesa Hebreonan 13:2.) E palabra griego tradusí komo “hospitalidat” ta nifiká literalmente “amor pa hende straño.” Kisas e ekspreshon akí ta pone nos kòrda riba Abraham ku Lòt. Nan tur dos a demostrá bondat na personanan ku nan no tabata konosé, i despues a resultá ku e bishitantenan ei tabata angel. (Gén. 18:2-5; 19:1-3) Pablo a referí indirektamente na e ehèmpelnan akí pa animá e kristiannan hebreo pa nan ta hospitalario i asina mustra ku nan ta stima nan rumannan.

¹² Kiko di nos? Nos ta mustra hospitalidat na nos rumannan? Nos ta invitá nan bin kome serka nos òf bin pasa un ratu ameno pa animá otro? Nos no tin nodi di prepará un kuminda elaborá òf gasta hopi plaka pa nos ta hospitalario; ni nos no mester invitá solamente hende ku por hasi algu bèk pa nos. (Luk. 10:42; 14:12-14) Nos meta ta pa animá e  rumannan, no pa impreshoná nan! Kiko di e superintendente di sirkuito i su kasá? Maske kisas nos no konosé nan bon, nos por hasi nos bèst pa mustra hospitalidat na nan ora nan bishitá nos kongregashon. (3 Huan 5-8) Pues, no laga strès di bida ni e tantísimo kosnan di hasi pone nos “lubidá di mustra hospitalidat”!

13, 14. Kon nos por “kòrda riba esnan ku ta den prizòn”?

¹³ “Kòrda riba esnan ku ta den prizòn.” (Lesa Hebreonan 13:3.) Klaru ku Pablo no tabata referí na tur prezu, sino na kristiannan ku tabata den prizòn pa motibu di nan fe. Ora Pablo a skirbi e karta na e Hebreonan, e mes tabatin mas o ménos kuater aña den prizòn. (Flp. 1:12-14) El a elogiá e rumannan pasobra nan “a mustra kompashon na e rumannan ku tabata den prizòn.” (Heb. 10:34) Di mes e hebreonan no por a yuda Pablo personalmente, ya ku e tabata na Roma. Pero tabatin algu ku sí nan por a hasi p’e: sigui pidi Dios den orashon pa yud’é.—Heb. 13:18, 19.

¹⁴ Awe tambe tin rumannan den prizòn. E rumannan ku ta biba serka di e prizòn por yuda nan, pero mayoria di nos ta biba leu. Kiko nos por hasi pa nan? Nos por menshoná nan konstantemente den nos orashonnan i supliká Yehova pa yuda nan. Esei ta un manera pa demostrá ku nos ta kòrda riba nan i ta stima nan. Por ehèmpel, nos por resa pa nos rumannan—hòmber, muhé i asta mucha—ku ta den prizòn na Eritrea. Entre nan tin Paulos Eyassu, Isaac Mogos i Negede Teklemariam, kendenan tin mas ku 20 aña den prizòn.

15. Kon nos por mustra ku nos ta respetá nos matrimonio?

¹⁵ “Laga matrimonio ta onorabel den bista di tur hende.” (Lesa Hebreonan 13:4.) Un otro manera ku nos ta mustra amor pa nos rumannan ta ora nos ta keda moralmente limpi. (1 Tim. 5:1, 2) Por ehèmpel, si nos yega na kometé inmoralidat seksual ku un ruman den kongregashon, òf ku un miembro di famia di e ruman ei, esei lo perhudiká e konfiansa ku tin entre e rumannan. I si no tin konfiansa, no por tin amor. (1 Tes. 4:3-8) I kon bo ta kere un ruman muhé lo sintié si e haña sa ku su kasá ta wak pornografia? Lo e sinti ku su kasá ta stim’é i ta respetá nan matrimonio, òf lo e sintié traishoná?—Mat. 5:28.

16. Dikon nos mester keda kontentu ku loke nos tin?

¹⁶ “Keda kontentu ku loke boso tin.” (Lesa Hebreonan 13:5.) Pa sigui e konseho akí di Pablo, nos mester konfia den Yehova. E konfiansa akí lo yuda nos pa nos tin un punto di bista balansá di kos material. (1 Tim. 6:6-8) Esaki lo yuda nos komprondé tambe ku nos relashon ku Yehova i ku nos rumannan ta bal muchu mas ku plaka òf kos material. Un kristian ku ta keda konforme ku loke e tin no ta keha tokante e rumannan, kritiká nan ni murmurá. Tampoko e ta keha di su situashon den bida, envidiá otro hende ni kudishá loke nan tin, ya ku e sa ku e sintimentunan ei ta kaba ku amor entre ruman. Mas bien, un hende ku ta kontentu ku loke e tin ta bira un persona mas generoso.—1 Tim. 6:17-19.

17. Dikon nos no mester pèrdè ánimo?

¹⁷ Sea “yen di ánimo.” (Lesa Hebreonan 13:6.) E kristian ku ta konfia den Yehova ta keda positivo i tin e ánimo pa wanta kualke difikultat. Anto e aktitut positivo ei, huntu ku e amor ku nos tin  pa nos rumannan, lo yuda nos animá nan i konsolá nan. (1 Tes. 5:14, 15) Nos no tin miedu ku pronto e tribulashon grandi, esta, e periodo di mas skur den historia di humanidat, lo yega. Al kontrario, miéntras ku nos ta warda riba nos liberashon, nos lo ‘para stret i lanta nos kabes.’—Luk. 21:25-28.

18. Kiko nos por hasi pa haña mas kariño pa nos ansianonan?

¹⁸ “Kòrda riba esnan ku ta dirigí boso.” (Lesa Hebreonan 13:7, 17.) Ora nos pensa riba kuantu kos e ansianonan ta hasi pa nos—sin ku nan ta haña un salario pa esei—nos ta haña mas kariño i apresio pa nan trabou duru. Hamas nos lo ke hasi algu ku ta pone nan pèrdè nan goso òf suspirá di frustrashon. Al kontrario, nos ta trata di obedesé nan i di keda sumiso na nan, pasobra di e manera ei nos ta ‘demostrá e gran amor i apresio ku nos tin pa nan pa motibu di nan trabou.’—1 Tes. 5:13.

19, 20. Kon nos por sigui stima otro mas plenamente?

¹⁹ Sirbidónan di Yehova ta masha konosí pa e amor fraternal ku ta reina entre nan, meskos ku tabata e kaso ku e kristiannan di e promé siglo. Maske Pablo tabata sa esaki, tòg el a konsehá nan pa “sigui hasi esei mas plenamente.” (1 Tes. 4:9, 10) Al fin i al kabo, kos bon por bira mihó!

²⁰ P’esei kada bes ku bo mira e teksto di aña den Salòn di Reino, meditá riba e preguntanan akí: Mi por ta mas hospitalario? Mi ta kòrda riba nos rumannan den prizòn? Mi ta respetá Dios su areglo di matrimonio? Mi ta kontentu ku loke mi tin? Kon mi por konfia mas den Yehova? Kon mi por kooperá mas plenamente ku e ansianonan? Si nos ta hasi nos bèst pa traha riba e seis puntonan akí, e ora ei nos teksto di aña lo no ta djis un bòrchi kologá den Salòn di Reino. Su palabranan, “Sigui stima otro manera ruman,” lo ta un rekordatorio di e importansia di trata nos rumannan ku amor tur dia.—Heb. 13:1.