1. Dikon nos por bisa ku nos ta biba den un tempu úniko?

NOS ta biba den un tempu úniko di historia humano. Manera Beibel a profetisá, Yehova ta reuniendo “un multitut grandi . . .  for di tur nashon, tribu, pueblo i idioma.” E multitut ei ta “un nashon poderoso” di mas ku ocho mion hende felis ku “ta rindi sirbishi sagrado na Dios di dia i anochi.” (Rev. 7:9, 15; Isa. 60:22) Nunka promé tabatin asina tantu hende ku ta stima Dios i nan próhimo.

2. Ki klase di amor hende ku no ta sirbi Dios tin? (Wak e promé plachi.)

² Pero Beibel a profetisá tambe ku den nos tempu hende ku no ta sirbi Dios lo tin un klase di amor ku ta enfoká riba kosnan robes, pues un amor egoista. Apòstel Pablo a skirbi ku ‘den e último dianan, hende lo stima nan mes, stima plaka i stima plaser en bes di stima Dios.’ (2 Tim. 3:1-4) E amor egoista ei ta kontrali na amor pa Dios. Hende ku ta kore tras di metanan egoista no ta haña e felisidat ku nan ta buska. Al kontrario, e klase di amor ei ta fomentá un mundu egoista ku ta hasi bida di hende mas difísil.

3. Kiko nos lo analisá den e artíkulo akí, i dikon?

³ Pablo tabata sa ku amor egoista lo a bira masha komun  i ku lo e ta un peliger pa kristiannan. P’esei el a konsehá nos pa ‘apartá nos’ mes for di hende ku ta mustra e amor egoista akí. (2 Tim. 3:5) Klaru ku nos no por evitá di tin tur kontakto ku e hendenan akí. Pues kon nos por evitá e aktitut di hende rònt di nos ku ta desplegá amor egoista? I kiko nos mester hasi pa agradá Yehova, e Dios di amor? Laga nos analisá e kontraste entre amor pa Dios i e klase di amor deskribí na 2 Timoteo 3:2-4. Di e manera ei, nos por evaluá nos mes i mira kon nos por kultivá amor ku ta trese berdadero satisfakshon i ku ta hasi nos realmente felis.

4. Dikon no ta malu pa nos stima nos mes?

⁴ Pablo a skirbi bou di inspirashon: “Hende lo stima nan mes.” Esei ke men ku ta malu pa nos stima nos mes? Nò, ta normal i asta nesesario pa nos stima nos mes te na sierto grado. Ta asina Yehova a krea nos. Hesus a bisa: “Stima bo próhimo meskos ku bo mes.” (Mar. 12:31) Pues, si nos no ta stima nos mes, nos no por stima nos próhimo. Beibel ta bisa tambe: “Esposonan mester stima nan esposa manera nan mes kurpa. Esun ku ta stima su esposa ta stima su mes, pasobra ningun hende hamas a odia su mes kurpa; ma e ta aliment’é i trat’é ku masha kariño.” (Efe. 5:28, 29) Pues, ta bon pa nos stima nos mes na un manera balansá.

5. Kon lo bo deskribí hende ku ta stima nan mes demasiado?

⁵ E klase di amor akí, esta, amor pa bo mes, deskribí na 2 Timoteo 3:2 no ta un amor normal òf balansá. Mas bien, e ta un amor trosí i egoista. Hende ku ta stima nan mes demasiado ta pensa mas di nan mes di loke ta nesesario. (Lesa Romanonan 12:3.) Nan interes primordial ta nan mes; nan no tin masha interes den otro hende. Ora algu bai robes, nan ta kla pa kulpa otro hende en bes di aseptá nan fayo. Un komentarista di Beibel ta kompará hende ku ta stima nan mes ku un animal ku ta sera su kurpa den forma di un bola. Su lana suave i kayente ta keda parti paden pa su mes, i e ta laga su sumpiñanan skèrpi pa otronan ku ta pafó. Hende egoista asina no ta realmente felis.

6. Ki bon resultado hende ku ta stima Dios ta haña?

⁶ Algun eksperto riba tereno di Beibel ta kere ku ora Pablo a bisa kon hende lo ta den e último dianan, na promé lugá, el a menshoná ‘hende ku ta stima nan mes’ pasobra e otro kualidatnan negativo ku e ta menshoná despues ta resultado di e amor egoista ei. En kambio, hende ku ta stima Dios ta desplegá kualidatnan masha distinto. Beibel ta relashoná amor pa Dios ku goso, pas, pasenshi, amabilidat, bondat, fe, suavedat i dominio propio. (Gal. 5:22, 23) Un eskritor di salmo a bisa: “Bendishoná [òf, “felis,” NW] ta e pueblo ku su Dios ta SEÑOR!” (Sal. 144:15) Yehova ta un Dios felis, i su sirbidónan tambe ta reflehá e kualidat ei. Ademas, distinto di hende ku ta stima nan mes i ku ta interesá solamente den risibí, Yehova su sirbidónan ta felis pasobra nan ta duna di nan mes pa yuda otro hende.—Echo. 20:35.

7. Ki preguntanan por yuda nos sa kon fuerte nos amor pa Dios ta?

⁷ Kon nos por sa si e amor ku nos tin pa nos mes ta birando mas fuerte ku nos amor pa Dios? Pensa riba e konseho di Filipensenan 2:3 i 4: “No hasi nada ku gana di pleita òf ku e deseo di ke ta na promé lugá, ma ku humildat, konsiderá  ku otro hende ta superior na boso. No buska boso mes interes so, ma tambe interes di otro hende.” Nos por puntra nos mes: ‘Mi ta apliká e konseho ei den mi bida? Di bèrdat mi ta hasi mi bèst pa kumpli ku e boluntat di Dios? Mi ta hasi esfuerso pa yuda otro hende, tantu den kongregashon komo den sirbishi?’ No ta semper fásil pa duna di nos mes; nos tin ku hasi hopi esfuerso i sakrifisio propio. Pero kiko por hasi nos mas felis ku e echo ku nos sa ku nos tin e aprobashon di e Soberano di universo?

8. Kiko amor pa Dios a motivá algun ruman pa hasi?

⁸ Amor pa Dios a motivá algun ruman pa sakrifiká kareranan ku por a hasi nan riku pa asina nan por sirbi Yehova mas plenamente. Un ruman ku yama Ericka, kende ta biba na Merka, ta un dòkter. En bes di buska prestigio den e mundu di medisina, el a bira pionero regular i a sirbi huntu ku su kasá na vários pais. El a bisa: “E tantísimo eksperensianan ku nos tabatin yudando den teritorio di otro idioma, huntu ku e amistatnan ku nos a sera, a enrikesé nos bida mashá. Ainda mi ta traha komo dòkter, pero e echo ku mi por dediká mas tempu i energia pa yuda kura hende den sentido spiritual i yuda den kongregashon ta hasi mi felis i ta duna mi gran satisfakshon.”

9. Dikon hende ku ta stima plaka no ta felis?

⁹ Pablo a bisa tambe ku hende lo “stima plaka.” Algun aña pasá, un pionero na Irlanda a papia ku un hòmber tokante Dios. E hòmber a saka algun sèn di papel for di su pòtmòni, tene esakinan na haltu, anto bisa yen di orguyo: “Ata mi dios aki!” Aunke no ta tur hende lo bisa esei, mundu ta yen di hende ku ta stima plaka i e kosnan ku plaka por kumpra. Ma Beibel ta spièrta: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.” (Ekl 5:10) Hende asina semper ke mas plaka i, den nan afan pa haña mas, nan ta kousa nan mes “hopi doló.”—1 Tim. 6:9, 10.

10. Kiko Beibel ta bisa tokante rikesa i pobresa?

¹⁰ Klaru ku nos tur mester di plaka. Echo ta ku plaka ta duna sierto protekshon. (Ekl. 7:12) Pero un persona por ta realmente felis si e tin solamente pa kubri su nesesidatnan básiko? Sigur ku sí! (Lesa Eklesiástes 5:12.) Agur, yu di Jake, a pidi Dios: “No duna mi ni pobresa ni rikesa—duna mi solamente mi pan di kada dia.” Ta fásil pa komprondé pakiko e no tabata ke ta muchu pober. Manera el a splika mas aleu, e no kier a kai den e tentashon di hòrta pasobra esei lo a desonrá Dios. Pero dikon el a pidi pa no dun’é rikesa? El a bisa: “Pa mi no tin di mas i nenga bo, i bisa: ‘Ken ta SEÑOR?’” (Pro. 30:8, 9) Probablemente bo konosé hende ku ta konfia den nan rikesa en bes di konfia den Dios.

11. Ki konseho Hesus a duna enkuanto plaka?

¹¹ Hende ku ta stima plaka no por agradá Dios. Hesus a bisa: “Ningun hende no por ta esklabo di dos doño, pasobra sea lo e odia esun i stima e otro òf lo e pega na esun i despresiá e otro. Boso no por ta esklabo di Dios i di Rikesa.” Anto promé ku esei el a bisa: “Stòp di montoná tesoro riba tera, kaminda mòt i frus ta kome nan i kaminda ladron ta kibra drenta i hòrta. Mas bien, montoná tesoro den shelu, kaminda ni mòt ni frus no por kome nan, ni ladron no por kibra drenta i hòrta.”—Mat 6:19, 20, 24.

12. Kon un bida simpel por permití un hende sirbi Dios mas fásil? Duna un ehèmpel.

 ¹² Hopi hende a ripará ku un bida simpel no solamente ta hasi nan mas felis sino tambe ta duna nan mas tempu pa sirbi Yehova. Jack, kende ta biba na Merka, a bende su kas grandi i su negoshi pa e por a traha pionero huntu ku su kasá. El a konta: “Tabata duru pa bai laga nos bunita kas i tereno. Ma pa hopi aña mi tabata yega kas frustrá pa motibu di problema na trabou. En kambio, mi kasá, un pionero regular, semper tabata masha felis. E tabata bisa: ‘Mi tin e mihó doño di trabou ku un hende por tin!’ Awor ku mi tambe ta pionero, nos tur dos ta traha pa e mesun persona, Yehova.”

13. Kon nos por sa kiko ta nos punto di bista tokante plaka?

¹³ Pa nos por sa kiko ta nos punto di bista tokante plaka, ta bon pa nos puntra nos mes frankamente: ‘Di bèrdat mi ta kere loke Beibel ta bisa tokante plaka, i mi ta biba na armonia ku esei? Ganamentu di plaka ta e kos di mas importante pa mi? Mi ta duna mas balor na kos material ku na mi relashon ku Yehova i ku otro hende? Mi tin konfiansa ku Yehova lo yuda mi kubri mi nesesidatnan?’ Nos por ta sigur ku Yehova hamas lo desapuntá hende ku ta konfia den dje.—Mat. 6:33.

14. Ki punto di bista nos mester tin di plaser?

¹⁴ Manera Beibel a profetisá, awe hopi hende ta “stima plaser.” Meskos ku no tin nada malu den e echo ku un persona tin un punto di bista balansá i rasonabel di su mes i di plaka, no tin nada malu pa e gosa di bida na un manera balansá. Algun hende ta kere ku bo no tin mag di tin plaser den bida òf gosa di e bon kosnan di bida. Pero no ta esei ta loke Yehova ta siña nos. Beibel ta animá fiel sirbidónan di Dios: “Bai anto, kome bo pan den felisidat i bebe bo biña ku kurason kontentu.”—Ekl 9:7.

15. Na ki klase di plaser 2 Timoteo 3:4 ta referí?

¹⁵ Ora 2 Timoteo 3:4 ta menshoná hende ku ta stima plaser, e ta referí na hende ku ta ekskluí Dios for di nan bida. Ripará  ku e versíkulo no ta bisa ku nan ta stima plaser mas ku Dios, komo si fuera nan tin un poko amor pa Dios. Mas bien, e versíkulo ta bisa ku nan ta stima plaser “en bes di stima Dios.” Segun un eksperto riba tereno di Beibel, ‘e versíkulo akí sigur no kier men ku hende ta stima Dios tambe te na sierto grado. E ta nifiká ku nan no ta stima Dios mes.’ Esaki ta un spièrtamentu serio pa hende ku ta kultivá un amor eksagerá pa plaser! E frase ‘hende ku ta stima plaser’ ta un bon deskripshon di hende ku ta “laga . . . plaser di e bida akí distraí nan.”—Luk. 8:14.

16, 17. Ki punto di bista Hesus tabatin di plaser?

¹⁶ Hesus tabatin un punto di bista balansá i perfekto di plaser. El a asistí na un “fiesta di kasamentu” i na “un bankete grandi.” (Huan 2:1-10; Luk. 5:29) Na e kasamentu, ora biña a kaba, el a hasi un milager i kambia awa den biña. I na un otro okashon, ora hende ku tabata hustu den nan mes bista a kritik’é pa motibu ku el a kome i bebe, el a rechasá nan punto di bista.—Luk 7:33-36.

¹⁷ Anto tòg Hesus no a dediká su mes na un bida di plaser. El a pone Yehova na promé lugá i hasi tur loke e tabata por pa yuda otro hende. I pa hende por haña salbashon, el a sufri un morto doloroso riba un staka di tormento. Anto el a bisa tur su siguidónan: “Felis boso ta ora hende ta insultá boso i ta persiguí boso i ta saka tur sorto di mentira malisioso kontra boso pa mi motibu. Sea kontentu i bula di alegria, ya ku boso rekompensa den shelu ta grandi, pasobra ta asina nan a persiguí e profetanan promé ku boso.”—Mat 5:11, 12.

18. Ki preguntanan lo yuda nos haña sa kuantu nos ta stima plaser?

¹⁸ Kon nos por sa kuantu nos ta stima plaser? Nos por puntra nos mes: ‘Dibertishon ta mas importante pa mi ku bai reunion i sirbishi di vèlt? Mi ta dispuesto pa sakrifiká algun kos ku mi ta gusta pasobra mi ke sirbi Dios? Kiko Yehova ta pensa di e kosnan ku mi ta gusta hasi pa plaser?’ Si di bèrdat nos ta stima Dios, nos lo evitá no solamente e kosnan ku nos sa ku ta desagrad’é, sino tambe e kosnan ku nos ta suponé ku lo desagrad’é.—Lesa Mateo 22:37, 38.

19. Ken nunka por ta realmente felis?

¹⁹ Despues di mas o ménos 6.000 aña di sufrimentu, e mundu di Satanas ta yegando su fin. Mundu ta yen di hende ku ta pensa solamente riba nan mes, riba plaka i riba plaser. Nan ta opseshoná ku loke nan por haña, i henter nan bida ta drei rònt di nan propio deseonan. Hende asina nunka por ta realmente felis. En kambio, manera e salmista a bisa: “Bendishoná [òf, “felis,” NW] ta esun, kende su yudansa ta e Dios di Yakòb, kende su speransa ta den SEÑOR su Dios.”—Sal. 146:5.

20. Kon bo amor pa Dios a hasi bo felis?

²⁰ E amor ku Yehova su sirbidónan tin p’e ta bira mas fuerte, i tur aña mas i mas hende ta siña konos’é i stim’é. Esaki ta un prueba ku e Reino di Dios ta goberná i ku pronto lo e trese bendishonnan inimaginabel riba tera. Hende ku ta stima Dios, ku ta hasi su boluntat i ku sa ku nan ta agradá e Ser Supremo por ta realmente felis, awor i pa semper. Den e siguiente artíkulo, nos lo analisá algun kualidat ku amor egoista ta produsí i mira kon esakinan ta na kontraste ku e kualidatnan ku Yehova su sirbidónan ta desplegá.