1, 2. Kiko sirbidónan di Dios tin ku tene kuidou kuné awe? (Wak e promé plachi.)

HOPI profeshonal ku ta duna kuido médiko ta atendé ku pashènt ku tin malesa kontagioso. Nan ta hasi esei pasobra nan ke yuda nan pashèntnan. Pero na mes momento, e profeshonalnan akí mester protehá nan mes pa nan no pega ku malesa. Di mes manera, hopi di nos ta biba i traha ku hende ku tin aktitut i karakterístikanan ku ta diferente for di e kualidatnan ku ta agradá Dios. Nos tin ku tene kuidou pa no ‘pega’ ku eseinan.

² Den e último dianan akí, hende no ta respetá Dios su leinan di loke ta bon i malu. Den apòstel Pablo su di dos karta na Timoteo, el a menshoná algun karakterístika di hende ku no ta sirbi Dios. Ademas, Pablo a indiká ku, segun tempu ta pasa, hende ku e karakterístikanan ei lo bira pió. (Lesa 2 Timoteo 3:1-5, 13.) Aunke e karakterístikanan akí por shòk nos, nos tambe por kuminsá pensa, papia i hasi manera e hendenan rònt di nos. (Pro. 13:20) Den e artíkulo akí, nos lo analisá e diferensia entre e karakterístikanan ku hende ta desplegá den e último dianan akí i e karakterístikanan di e sirbidónan di Dios. Ademas, nos lo siña kon nos por protehá nos mes pa segun ku nos ta yuda otro hende siña konosé  Yehova e karakterístikanan akí no kontagiá nos.

3. Na ken e karakterístikanan menshoná na 2 Timoteo 3:2-5 ta referí?

³ Apòstel Pablo a skirbí: “Den e último dianan lo bini tempunan krítiko, difísil pa trata kuné.” Despues el a menshoná 19 karakterístika negativo ku ta komun den nos tempu. E lista di e karakterístikanan akí ta similar na esun na Romanonan 1:29-31. Pero, loke Pablo a bisa Timoteo ta inkluí términonan ku no ta ser menshoná ningun otro kaminda den e Skritura Griego Kristian. Pablo a kuminsá su lista di karakterístika di hende ku no ta sirbi Dios ku e palabranan: “Pasobra hende lo . . .” Sinembargo, no ta tur hende ta desplegá e karakterístikanan akí. Sirbidónan di Dios ta masha diferente.—Lesa Malakías 3:18.

4. Kon lo bo deskribí un hende ku ta hinchá di orguyo?

⁴ Despues ku Pablo a menshoná ku hopi hende lo stima nan mes i plaka, el a skirbi tambe ku hende lo ta bromadó, arogante i hinchá di orguyo; esakinan ta karakterístikanan ku hopi biaha hende ta reflehá pasobra nan ta sinti ku nan ta mas ku otro hende debí na nan abilidat, aparensia, rikesa òf posishon sosial. Hende asina ke pa otro hende atmirá nan òf adorá nan. Relashoná ku un hende ku ta hopi orguyoso, un eksperto a skirbi: “Den su kurason e tin un altar chikitu kaminda e ta bùig pa su mes.” Algun hende a bisa ku orguyo ta un kualidat asina desagradabel ku ni hende orguyoso no ta gusta otro hende orguyoso.

5. Kiko a pasa ku asta algun fiel sirbidó di Dios?

⁵ Sin duda, Yehova ta odia orguyo. E ta odia “wowonan altanero.” (Pro. 6:16, 17) Orguyo ta stroba hende di hala serka Dios. (Sal. 10:4) E ta un karakterístika di Diabel. (1 Tim. 3:6) Lamentablemente, asta algun fiel sirbidó di Yehova sa bira orguyoso. Por ehèmpel, Rei Uzías di Huda tabata fiel pa añanan largu. Sinembargo, Beibel ta bisa: “Ora ku el a bira fuerte, su kurason a bira asina orguyoso ku el a aktua korumpí, i el a bira infiel na SEÑOR su Dios, pasobra el a drenta e tèmpel di SEÑOR pa kima sensia riba e altar di sensia.” Mas despues, Rei Ezekías tambe a bira orguyoso pa un tempu.—2 Kró. 26:16; 32:25, 26.

6. Kiko por a pone David bira orguyoso, pero kiko a yud’é keda humilde?

⁶ Algun hende ta bira orguyoso debí ku nan tin nèchi aparensia, fama, talento musikal, forsa físiko òf posishon sosial importante. Rei David no tabatin solamente ún di e kosnan akí, sino tur. Apesar di esei, el a keda humilde henter su bida. Por ehèmpel, despues ku David a mata Goliat, Rei Saul a bis’é ku e por a kasa ku Saul su yu muhé. Pero David a kontest’é: “Ta ken mi ta, i ta kiko mi bida òf mi tata su famia ta den Israel, pa mi ta rei su yerno?” (1 Sam. 18:18) Kiko a yuda David keda humilde? E tabata sa ku tur kualidat, abilidat i privilegio ku e tabatin tabata pasobra Dios a “humiá” su mes pa pone atenshon na dje. (Sal. 113:5-8) Sí, David a komprondé ku ta Yehova a dun’é tur loke e tabatin.—Kompará ku 1 Korintionan 4:7.

7. Kiko lo yuda nos demostrá humildat?

⁷ Meskos ku David, awendia e pueblo di Yehova ta hasi esfuerso pa demostrá humildat. Nos ta keda masha impreshoná ora nos mira ku Yehova, e Persona di mas importante di universo, ta humilde. (Sal. 18:35, NW) Nos ta hasi kaso di e  konseho inspirá ku ta bisa: “Bisti tierno kompashon, bondat, humildat, suavedat i pasenshi.” (Kol. 3:12) Nos sa tambe ku amor ‘no ta broma ni e no ta halsa su mes.’ (1 Kor. 13:4) Ora nos ta demostrá humildat, hende por sinti nan atraí na Yehova. Meskos ku un esposo por ser ‘ganá na e fe sin un pia di palabra’ pa medio di kondukta di su esposa, otro hende por ser atraí na Dios debí na nos humildat.—1 Ped. 3:1.

8. (a) Kiko algun hende ta pensa di desobedensia na mayornan awe? (b) Kiko Beibel ta manda yunan hasi?

⁸ Pablo a deskribí kon hende lo trata otro den e último dianan akí. El a skirbi ku den e último dianan, yunan lo ta desobediente na mayornan. Aunke buki, pelíkula i programanan na televishon ta presentá e aktitut akí komo algu aseptabel i ta asta promov’é, desobedensia di yunan ta debilitá famia, e fundeshi di sosiedat. Pa hopi tempu kaba, hende a komprondé e bèrdat ei. Por ehèmpel, na Gresia di antigwedat, un hòmber ku a dal su mayornan lo a pèrdè tur su derechonan komo siudadano. Segun lei romano, un hende ku a dal su tata lo a haña mes kastigu ku un persona ku a kometé un asesinato. Tantu e Skritura Hebreo komo e Skritura Griego Kristian ta manda yunan pa onra nan mayornan.—Éks. 20:12; Efe. 6:1-3.

9. Kiko lo yuda yunan obedesé nan mayornan?

⁹ Kiko lo yuda yunan obedesé nan mayornan asta ora otro mucha ta desobediente? Nan mester pensa riba tur loke nan mayornan ta hasi pa nan. Di e manera ei, nan ta haña apresio pa nan mayornan i ta sinti nan motivá pa obedesé. Ademas, nan tin ku komprondé ku Dios, e Tata di nos tur, ke pa yunan obedesé nan mayornan. Ora hóbennan ta papia positivo di nan mayornan, nan por yuda otro hóbennan mustra mas rèspèt pa nan mes mayornan. Ta klaru ku si mayornan no tin kariño pa nan yunan, lo por ta mas difísil pa nan yunan obedesé nan di kurason. Di otro banda, ora un yu ta sinti ku su mayornan ta stim’é, lo e obedesé nan asta ora e hañ’é ku tentashon pa desobedesé. Austin a atmití: “Vários biaha mi tabatin gana di hasi loke no ta korekto. Pero mi mayornan a pone normanan rasonabel, a splika mi dikon nan a pone sierto reglanan i a sòru pa nos tabatin bon komunikashon. Tur e kosnan akí a yuda mi pa ta obediente. Mi por a mira ku nan ta stima mi, p’esei mi kier a hasi nan kontentu.”

10, 11. (a) Ki kualidatnan negativo ta mustra ku hende no tin amor pa otro? (b) Te kon leu kristiannan berdadero ta stima nan próhimo?

¹⁰ Pablo a menshoná mas kualidat negativo ku ta mustra hende su falta di amor pa otro. No solamente el a bisa ku hende lo ta “desobediente na mayornan,” ma ku tambe nan lo ta malagradesí. Esei ta un bon deskripshon, pasobra hende malagradesí no ta balorá e bon kosnan ku otro hende ta hasi pa nan. Ademas, hende lo ta desleal. Nan lo no ta dispuesto pa sera ningun akuerdo; nan ta demostrá ku nan no ke hasi pas ku otro hende. Nan lo ta blasfemadó i traidor, pasobra nan ta papia kos ofensivo òf insultante tokante otro hende òf asta tokante Dios. I nan lo ta kalumniadó, esta, hende ku ta lansa akusashon falsu pa daña reputashon di otro hende. *

¹¹ Na kontraste ku hende ku no ta demostrá amor awe, sirbidónan di Yehova sí ta mustra amor berdadero na nan próhimo. Esei semper tabata asina! Hesus a  bisa ku den e Lei di Moises, amor pa próhimo, un manera pa demostrá amor agape, tabata e di dos mandamentu mas importante, despues di e mandamentu pa stima Dios. (Mat. 22:37-39) Hesus a bisa tambe ku amor pa próhimo ta e kualidat ku ta identifiká kristian berdadero. (Lesa Huan 13:34, 35.) Kristian berdadero ta stima asta nan enemigunan.—Mat. 5:43, 44.

12. Kon Hesus a demostrá ku e ta stima hende?

¹² Hesus a demostrá ku e ta stima hende mashá. El a bai di stat pa stat pa papia ku hende tokante e bon notisia di e Reino di Dios. Ademas, el a kura hende siegu, koho, leproso, surdu i a lanta hende for di morto. (Luk. 7:22) Aunke hopi hende tabata odia Hesus, el a duna su bida na fabor di humanidat. Hesus a imitá e amor ku su Tata tin pa nos perfektamente. Testigunan di Yehova rònt mundu ta imitá Hesus i ta demostrá amor pa otro hende.

13. Kon e amor ku nos ta mustra na otro hende por motivá nan pa hala serka Yehova? Duna un ehèmpel.

¹³ Ora nos ta demostrá amor na otro hende, nan por sinti nan motivá pa siña mas di nos Tata den shelu. Por ehèmpel, un hòmber na Tailandia a keda impreshoná ora el a mira e amor ku e rumannan na un kongreso regional tabatin pa otro. Ora el a regresá kas, el a pidi pa e studia Beibel dos biaha pa siman. El a prediká na henter su famia. I apénas seis luna despues di e kongreso, el a duna su promé parti di lesamentu di Beibel na Salòn di Reino. Pa nos por sa si nos ta mustra amor pa otro hende, nos por puntra nos mes: ‘Mi ta hasi esfuerso pa yuda mi famia, pa yuda den kongregashon i pa yuda hende den sirbishi? Mi ta hasi tur mi esfuerso pa mira otro hende manera Yehova ta mira nan?’

14, 15. (a) Ki mal kualidat hopi hende ta desplegá? (b)  Kiko a yuda hopi hende kambia nan personalidat?

¹⁴ Den e último dianan akí, hende ta desplegá otro kualidatnan ku ta duna kristiannan mas motibu pa apartá nan mes di hende asina. Hende ku no ta sirbi Dios lo ta sin amor pa loke ta bon. Òf otro  tradukshon di Beibel ta bisa ku hende lo ta “odiadó di loke ta bon” òf “enemigu di loke ta bon.” Hende lo ta sin dominio propio i feros. Ademas, algun hende lo ta kabesura, impulsivo i iresponsabel.

¹⁵ Hopi hende ku un tempu tabatin karakterístika manera di bestia feros a kambia nan personalidat. Beibel a profetisá di e kambio akí na un manera masha bunita. (Lesa Isaías 11:6, 7.) Den e teksto ei, nos ta lesa tokante bestianan salbahe, manera lobo i leon, ku ta biba na pas ku bestianan mansu, manera lamchi i bisé. Tuma nota ku mas despues Beibel ta bisa ku nan lo sigui biba na pas ku otro, “pasobra tera lo ta yen di e konosementu di SEÑOR.” (Isa. 11:9) Komo ku bestia no por siña tokante Yehova, e kumplimentu spiritual di e profesia akí ta referí na e kambio di personalidat ku hende ta hasi.

16. Kon Beibel a yuda hende kambia nan personalidat?

¹⁶ Hopi di nos rumannan ku un tempu tabata feros manera lobo awor ta biba na pas ku otro hende. Nos por lesa algun di nan eksperensianan den e seri “Beibel Ta Kambia Bida di Hende” riba jw.org. Hende ku a siña konosé Yehova i ta sirbié no ta manera hende ku tin aparensia di ta deboto na Dios, ma ku no ta demostrá e deboshon ei den nan bida. Hende asina ta hasi manera nan ta sirbi Dios, pero no ta demostrá esei ku nan kondukta. Pero, hende ku un tempu tabata feros a “bisti e personalidat nobo ku a ser kreá segun e boluntat di Dios den berdadero hustisia i lealtat.” (Efe. 4:23, 24) Segun ku hende ta siña tokante Dios, nan ta bin komprondé ku nan mester kuminsá biba na armonia ku su normanan. Anto esei ta motivá nan pa kambia nan kreensianan, aktitut i kondukta. No ta nada fásil pa hasi e kambionan ei, pero e spiritu di Dios lo yuda hende ku di kurason ta deseá di hasi Dios su boluntat.

17. Kon nos por evitá di laga hende ku mal aktitut influensiá nos?

¹⁷ E diferensia entre hende ku ta sirbi Dios i esnan ku no ta sirbié ta birando mas bisto. Nos ku ta sirbi Dios mester tene kuidou pa e aktitut robes di otro hende no influensiá nos. Pues ta sabí pa nos sigui e konseho inspirá pa apartá nos mes for di hende ku 2 Timoteo 3:2-5 ta papia di dje. Klaru, nos no por evitá hende ku tin mal kualidat kompletamente. Kisas nan ta nos kolega di trabou, kompañero di skol òf miembro di nos famia. Pero, sí nos por evitá di pensa manera nan i imitá nan karakterístikanan. Kon nos por hasi esei? Esei ta ora nos ta studia Beibel pa fortalesé nos mes spiritualmente i ora nos ta asosiá ku esnan ku ta determiná pa sirbi Yehova.

18. Kon nos abla i kondukta por yuda otro hende siña konosé Yehova?

¹⁸ Nos mester hasi esfuerso tambe pa yuda otro hende siña konosé Yehova. Buska oportunidat pa prediká, pidi Yehova yuda bo pa bisa kos korekto na e momento korekto. Nos mester laga otro hende sa ku nos ta Testigunan di Yehova, i di e manera ei, nos ta duna gloria na Dios i no na nos mes. Yehova “ta siña nos rechasá tur loke ta kontra boluntat di Dios i tambe deseonan mundano, i e ta siña nos biba ku sano huisio, hustisia i deboshon na Dios den e tempu akí.” (Tito 2:11-14) Si nos imitá Yehova i hasi loke e ke, otro hende lo mira esei, i algun di nan kisas asta lo bisa: “Laga nos bai ku boso, pasobra nos a tende ku Dios ta ku boso.”—Zak. 8:23.