1-2. Kiko nos tin ku sigui hasi despues ku nos batisá? Splika.

 KU KI frekuensia bo ta limpia kas? Kisas promé ku bo a bai biba den dje, bo a dun’é un bon limpiesa. Pero kiko lo pasa si bo no limpi’é nunka mas? Mané bo sa, masha lihé mes stòf i sushi lo akumulá. Pues, pa bo kas keda limpi i na òrdu bo tin ku limpi’é regularmente.

² Meskos ta konta den kaso di nos pensamentu i nos personalidat. Ta opvio ku promé ku nos a batisá nos a lucha pa “limpia nos mes di tur impuresa di karni i di spiritu.” (2 Kor. 7:1) Pero awor, manera Apòstel Pablo a bisa, nos tin ku “sigui renobá e forsa ku ta motivá [nos] mente.” (Efe. 4:23) Dikon ta asina importante pa nos sigui hasi esei? Pasobra masha lihé mes “stòf” i “sushi” di mundu por akumulá den nos mente. Pa nos evitá esei i keda limpi den bista di Yehova, regularmente nos tin ku analisá nos pensamentu, nos personalidat i nos deseo.

3. Kiko ‘renobá nos mente’ ta enserá? (Romanonan 12:2)

³ Kiko nos tin ku hasi pa renobá nos mente, esta, kambia nos manera di pensa? (Lesa Romanonan 12:2.) Renobá  algu ta mas ku djis hasi kambio aribariba. Por ehèmpel, ora un hende dekorá un kas no ke men ku el a renob’é. Asina tambe, djis dekorá nos bida ku un par di bon obra no ke men ku nos a renobá nos mente. Nos tin ku analisá ken nos ta di bèrdat i despues hasi e kambionan nesesario pa asina nos obedesé Yehova su normanan. Nos tin ku hasi esaki kontinuamente, no djis un biaha so.

4. Kon nos por evitá ku mundu ta forma nos manera di pensa?

⁴ Unabes ku nos ta perfekto, nos lo por agradá Yehova den tur kos. Pero mientrastantu, nos tin ku sigui hasi nos bèst pa agradá Yehova. Ripará ku na Romanonan 12:2, Pablo a bisa ku nos tin ku renobá nos mente pa nos por sa kiko ta e boluntat di Dios. P’esei, nos no por laga mundu forma nos manera di pensa. Nos tin ku purba di haña sa si nos meta- i desishonnan ta ser influensiá dor di Yehova su manera di pensa òf esun di mundu.

5. Ki pregunta nos por hasi nos mes pa haña sa si di bèrdat nos ta pensa ku e dia di Yehova ta serka? (Wak e plachi.)

⁵ Laga nos wak un ehèmpel. Yehova ke pa nos keda kòrda “riba e binida di [su] dia.” (2 Ped. 3:12) Puntra bo mes: ‘E manera ku mi ta hiba mi bida ta mustra ku di bèrdat mi ta komprondé ku fin di e mundu malbado akí ta serka? Mi eskoho di edukashon i trabou ta indiká ku sirbi Yehova ta e kos di mas importante den mi bida? Mi ta konfia ku Yehova por perkurá pa mi i mi famia, òf mi ta preokupá konstantemente pa kosnan material?’ Pensa kon felis bo ta hasi Yehova ora e mira ku bo ta hasi esfuerso pa biba di akuerdo ku su boluntat.—Mat. 6:25-27, 33; Flp. 4:12, 13.

6. Kiko nos tin ku sigui hasi?

 ⁶ Regularmente nos tin ku evaluá nos manera di pensa i hasi kualke kambio nesesario. Pablo a bisa e rumannan na Korinto: “Sigui saminá boso mes pa sa si boso ta den e fe, sigui pone boso mes na prueba pa demostrá ki tipo di hende boso ta.” (2 Kor. 13:5) Pa nos “ta den e fe” nos tin ku hasi muchu mas ku djis asistí na reunion ratu-ratu i prediká de bes en kuando. Nos pensamentu, tendensia i motivashon tambe ta hunga un ròl. Pues, nos tin ku sigui renobá nos mente dor di lesa Palabra di Dios, siña pensa manera Yehova ta pensa, i djei hasi loke ta nesesario pa agrad’é.—1 Kor. 2:14-16.

7. Segun Efesionan 4:31 i 32, kiko mas nos tin ku hasi, i dikon esei ta difísil?

⁷ Lesa Efesionan 4:31, 32. Ademas di kambia nos manera di pensa, nos tin ku “bisti e personalidat nobo.” (Efe. 4:24) Esei ta rekerí hopi esfuerso. No ta di un dia pa otro nos ta kita rabia, amargura i furia for di nos karakter. Dikon ta difísil pa lucha kontra mal karakterístika òf tendensia? Pasó algun di nan ta fuertemente ankrá den nos. Por ehèmpel, Beibel ta bisa ku algun hende tin tendensia di rabia lihé. (Pro. 29:22) Pa nos ranka e mal tendensianan ei, nos tin ku hasi esfuerso kontinuo, asta despues ku nos batisá. Laga nos wak esei den e siguiente eksperensia.

8-9. Kiko e eksperensia di Stephen ta siña nos tokante e personalidat bieu i esun nobo?

⁸ Un ruman ku yama Stephen tabatin un lucha pa dominá su rabia. El a konta: “Asta despues ku m’a batisá, mi mester a sigui traha riba mi karakter. Por ehèmpel, un biaha ku mi tabata prediká di kas pa kas, m’a kore tras di un ladron ku a kaba di hòrta e radio di mi outo. Ora mi tabata serka di yeg’é, el a tira e radio abou i kore bai. Ora m’a konta esnan ku tabata prediká ku mi kon mi haña mi radio bèk, un ansiano den e grupo a puntra mi: ‘Stephen, kiko lo bo a hasi si bo a gara e ladron?’ E pregunta ei a pone mi pensa i a motivá mi pa sigui hasi esfuerso pa ta na pas ku tur hende.” b

⁹ Manera e eksperensia di Stephen ta mustra, un mal karakterístika por blo ònferwagt, asta despues ku nos a kere ku nos tiné bon dominá. Si esei pasa ku bo, no desanimá i pensa ku bo ta un mal kristian. Asta Apòstel Pablo a bisa: “Ora mi ta deseá di hasi loke ta korekto, loke ta malu ta den mi.” (Rom. 7:21-23) Debí ku nos ta imperfekto, nos tur tin ku lucha ku mal karakterístika i tendensia ku lo keda bini bèk meskos ku stòf i sushi ku ta akumulá den nos kas. P’esei, nos tin ku sigui hasi esfuerso pa keda limpi. Kon nos por logra esei?

10. Kon nos por lucha kontra kosnan malu di nos karakter? (1 Huan 5:14, 15)

¹⁰ Papia ku Yehova tokante e kosnan ku bo ke kambia di bo karakter i konfia ku lo e tende bo i yuda bo. (Lesa 1 Huan 5:14, 15.) Ta bèrdat ku Yehova lo no kita nan di un forma milagroso, pero lo e duna bo e forsa pa dominá nan. (1 Ped. 5:10) Di bo parti, aktua di akuerdo ku bo orashon i evitá di hasi kualke kos ku por pone tendensia di bo  personalidat bieu bini bèk. Por ehèmpel, tene kuidou pa no wak pelíkula i programa di televishon òf lesa historia ku ta pinta e kosnan ku bo ta lucha kuné komo algu bon. Anto no keda pensa riba deseonan robes.—Flp. 4:8; Kol. 3:2.

11. Kon nos por sigui bisti e personalidat nobo?

¹¹ Asta ora bo kita e personalidat bieu, ta importante pa sigui traha riba esun nobo. Kon bo por hasi esei? Wèl, segun ku bo ta deskubrí kon Yehova ta demostrá su kualidatnan, purba di imit’é. (Efe. 5:1, 2) Por ehèmpel, ora bo lesa un relato bíbliko ku ta enfatisá Yehova su miserikòrdia, puntra bo mes: ‘Mi ta pordoná otro hende?’ Ora bo lesa tokante Yehova su kompashon na hende pober, puntra bo mes: ‘Mi ta preokupá pa mi rumannan ku ta den nesesidat, i mi akshonnan ta mustra esei?’ Sigui renobá bo mente dor di bisti e personalidat nobo i tene pasenshi ku bo mes.

12. Kon Stephen a mira pa su mes ku Beibel tin poder pa kambia bida di hende?

¹² Stephen, menshoná na paragraf 8, pokopoko a logra bisti e personalidat nobo. El a bisa: “Fo’i dia ku m’a batisá, m’a haña mi ku vários situashon ku por a pone mi reakshoná na un manera violento. Pero m’a siña kalma mi mes òf alehá for di hende ku ta purba di provoká mi. Hopi hende, inkluso mi kasá, a elogiá e manera ku m’a trata ku e situashonnan akí. Mi mes no por kere ku m’a kambia asina tantu! Mi sa sí ku no ta ku mi mes forsa m’a logra e kambionan akí. Mas bien, nan ta duna prueba ku e Palabra di Dios tin poder pa kambia bida di hende.”

13. Kiko lo yuda nos hasi loke ta korekto? (Galationan 5:16)

¹³ Lesa Galationan 5:16. Ta un lucha pa hasi loke ta korekto. Pero, Yehova generosamente ta duna nos su spiritu santu. Ora nos studia Palabra di Dios, nos ta permití Dios su spiritu santu influensiá nos. Nos ta haña spiritu santu tambe ora nos asistí na nos reunionnan. Ei nos ta pasa tempu ku nos rumannan ku, meskos ku nos, ta lucha pa hasi loke ta korekto, i esei ta animá nos. (Heb. 10:24, 25; 13:7) Anto ora nos pidi Yehova di kurason pa yuda nos vense un debilidat, lo e duna nos, mediante su spiritu santu, e forsa pa sigui lucha. Estudio di Beibel, asistensia na reunion i orashon probablemente lo no laga nos deseonan robes disparsé, pero nan lo yuda nos sí pa no sukumbí na e deseonan ei. Manera Galationan 5:16 ta bisa, esnan ku ta kana pa medio di spiritu “lo no kumpli ku ningun deseo karnal.”

14. Dikon ta importante pa sigui kultivá e deseo di hasi loke ta korekto?

¹⁴ Asina ku nos kuminsá krea un bon rutina spiritual, ta importante pa nos no stòp kuné i sigui kultivá e deseo di hasi loke ta korekto. Dikon? Pasobra nos tin un enemigu ku nunka ta drumi. E enemigu ei, ta nos tendensia di hasi malu. Asta despues ku nos a batisá, nos por sinti nos atraí na kosnan ku nos ta purba di rechasá, manera wega di plaka, bebementu di mas òf pornografia. (Efe. 5:3, 4) Un ruman hòmber hóben a bisa: “Un di e luchanan di mas duru ku mi tin  ta mi lucha kontra atrakshon pa hende di mi mes sekso. M’a kere ku e tabata algu pasahero, pero ketu bai e t’ei.” Kiko bo por hasi si bo tin un deseo robes ku ta fuerte?

15. Dikon ta un alivio pa sa ku deseo robes ta algu komun? (Wak e plachi.)

¹⁵ Si bo ta lucha ku un deseo ku ta fuerte, kòrda ku no ta bo so ta den e situashon ei. Beibel ta bisa: “Ningun tentashon ku boso a pasa aden ta fuera di loke ta komun pa hende.” (1 Kor. 10:13a) E palabranan ei tabata pa tantu e kristiannan hòmber komo muhé na Korinto. Algun di nan tabata adúltero, homoseksual i buraché. (1 Kor. 6:9-11) Bo ta kere ku despues ku nan a batisá nan no mester a lucha nunka mas kontra deseo robes? Esei no ta realístiko. Ta bèrdat ku nan tur tabata ungí, pero ainda nan tabata imperfekto. No tin duda ku ratu-ratu nan a lucha ku deseo robes. Esei ta un alivio pa sa, pasobra e ta laga bo mira ku tin hende ku a logra resistí e deseo robes ku abo ta lucha kuné. Pues, bo tambe por keda “firme den fe, sabiendo ku rònt mundu henter e hermandat ta soportá e mesun tipo di sufrimentu.”—1 Ped. 5:9.

16. Den ki trampa nos no mester kai, i dikon?

¹⁶ Tin hende ta pensa ku niun hende no ta komprondé loke nan ta pasa aden. No kai den e trampa ei. Pasobra esei por laga bo kere ku bo situashon no tin salida i ku nunka lo bo por resistí deseo robes. Beibel ta bisa lo kontrario. Nos ta lesa: “Dios ta fiel na su palabra, i lo e no laga boso pasa den un tentashon ku boso no por soportá, ma ora e tentashon presentá, lo e perkurá tambe pa e salida, a fin ku boso por want’é.” (1 Kor. 10:13b) Pues, pa kon fuerte ku un deseo por ta,  nos por keda fiel na Yehova. Anto ku su yudansa, nos por keda sin hasi loke ta malu.

17. Aunke bo no por evitá di tin deseo robes, kiko sí bo por hasi?

¹⁷ Nunka lubidá esaki: Komo hende imperfekto bo no por evitá di tin deseo robes. Pero, bo no tin ku sukumbí na nan. Ora bo haña nan, rechasá nan mesora, meskos ku Yosef a hasi ora ku el a hui for di e esposa di Potifar.—Gén. 39:12.

18-19. Kua preguntanan lo por yuda nos sigui renobá nos mente?

¹⁸ Renobá nos mente ta enserá ku nos tin ku sigui hasi esfuerso pa nos manera di pensa i aktua ta agradá Yehova. P’esei, nos mester analisá nos mes regularmente i puntra nos mes: ‘Mi akshonnan ta mustra ku mi ta konvensí ku fin ta hopi serka? Mi karakter ta mehorando i ta kuadra mas i mas ku e personalidat nobo? Mi ta permití Yehova su spiritu santu guia mi pa asina mi no sukumbí na deseonan robes?’

¹⁹ Ora bo analisá bo mes, enfoká riba bo progreso i no ferwagt perfekshon. Si bo mira ku bo tin ku mehorá den algu, no desanimá. Na lugá di esei, sigui e konseho na Filipensenan 3:16: “Te asina leu ku nos a progresá, laga nos sigui kana na un manera ordená den e mesun kaminda akí.” Bo por tin sigur ku Yehova lo bendishoná bo esfuersonan pa sigui renobá bo mente.