ARTÍKULO DI ESTUDIO 4
Yehova Ta Bendishoná Nos Esfuersonan pa Tene Memorial
“Sigui hasi esaki na mi memoria.”—LUK. 22:19.
KANTIKA 19 E Sena di Señor
UN BISTA ADELANTÁ a
1-2. Dikon nos ta asistí tur aña na Memorial?
KASI 2.000 aña pasá Hesus a duna su bida pa nos i, danki na esei, nos tin oportunidat di biba pa semper. E anochi promé ku Hesus a muri, el manda su siguidónan pa rekordá su sakrifisio pa medio di un seremonia simpel usando pan i biña.—1 Kor. 11:23-26.
2 Nos ta obedesé e mandato ei di Hesus pasobra nos stim’é masha hopi. (Huan 14:15) Tur aña, durante e temporada di Memorial, nos ta mustra kuantu nos ta balorá su sakrifisio. Nos ta tuma tempu pa resa i pensa riba e importansia di su morto. Ademas, nos ta felis pa hasi mas den sirbishi, invitando mas tantu hende posibel pa ta huntu ku nos na e evento spesial akí. Anto klaru, nos ta determiná pa no laga nada stroba nos di asistí na Konmemorashon di e morto di Kristu, esta, Memorial.
3. Kiko nos lo trata den e artíkulo akí?
3 Komo sirbidónan di Yehova, nos ta hasi hopi esfuerso pa tene Memorial. Den e artíkulo akí, nos lo wak tres prueba ku ta demostrá esei. Nos ta: (1) tene Memorial manera Hesus a bisa, (2) invitá otro hende i (3) tene Memorial apesar di situashonnan difísil.
TENE MEMORIAL MANERA HESUS A BISA
4. Kiko nos ta skucha tur aña den e diskurso di Memorial, i dikon nos no mester balotá e bèrdatnan ei? (Lukas 22:19, 20)
4 Tur aña na Memorial, nos ta skucha un diskurso basá riba Beibel ku ta aklará algun duda tokante e sakrifisio di Hesus. E diskurso ta splika dikon humanidat tabatin mester di un reskate i kon morto di un hende por logra pordoná piká di hopi hende. Tambe nos lo skucha kiko e pan i e biña ta representá i ken por kome e pan i bebe di e biña. (Lesa Lukas 22:19, 20.) Nos ta haña oportunidat pa pensa riba e maravioso futuro di esnan ku tin speransa di biba pa semper riba tera. (Isa. 35:5, 6; 65:17, 21-23) Nunka lubidá ki balioso e bèrdatnan ei ta. Míles di miónes di hende no sa di nan ni ta konsiente di e importansia di e sakrifisio di Hesus. Ademas, nan no ta konmemorá e morto di Hesus manera el a bisa. Kon bini?
5. Despues ku mayoria di Hesus su apòstelnan a muri, kon hende a kuminsá konmemorá e morto di Hesus?
5 Poko despues ku mayoria di Hesus su apòstelnan a muri, kristiannan falsu a drenta e kongregashon. (Mat. 13:24-27, 37-39) Nan tabata “trose e bèrdat pa pone e disipelnan bai nan tras.” (Echo. 20:29, 30) Por ehèmpel, tiki-tiki nan a introdusí e siñansa di ku Hesus no a ofresé su kurpa “ún biaha so pa karga piká di hopi hende,” mané Beibel ta bisa. Segun nan, mester ripití e sakrifisio ei bes tras bes. (Heb. 9:27, 28) Awe tin hopi hende ta kere den e siñansa falsu ei. Nan ta bai misa tur siman, tin biaha tur dia, pa tene loke religion katóliko ta yama “Santu Sakrifisio di Misa.” b Otro iglesianan di kristiandat no ta konmemorá e morto di Hesus dje tantu ei, pero mayoria di nan miembronan no sa mashá tokante e importansia di Hesus su sakrifisio. Tin hende ta puntra nan mes: ‘Di bèrdat e morto di Hesus por pordoná mi pikánan?’ Dikon nan ta puntra esei? Kisas pasó hende a konvensé nan ku e sakrifisio di Hesus no por pordoná nan piká. Kon berdadero siguidónan di Hesus a bin saka afó kiko ta e bèrdat tokante esei?
6. Na ki konklushon un grupo di studiantenan di Beibel a yega?
6 Na 1870, un grupo di studiante di Beibel dirigí pa Charles Taze Russell a kuminsá hasi un estudio profundo di Beibel. Nan kier a komprondé e berdadero balor di Hesus su sakrifisio i kon mester a konmemor’é. Na 1872, nan a yega na e konklushon ku di bèrdat Hesus a perkurá un reskate pa humanidat. Nan no a tene e bèrdat ei pa nan so. Al kontrario, nan a publik’é den buki, korant i revista. I no a tarda mashá ku nan a kuminsá tene Memorial un biaha pa aña, meskos ku e kristiannan di promé siglo.
7. Dikon e investigashon di e studiantenan di Beibel ta asina balioso pa nos?
7 E investigashon ku e kristiannan ei a hasi hopi tempu pasá ta mashá balioso pa nos awe. Yehova a bendishoná nan esfuersonan i, danki na esei, nos ta komprondé e importansia di Hesus su sakrifisio i tur loke e sakrifisio ei lo logra. (1 Huan 2:1, 2) Nos a siña tambe ku, segun Beibel, tin dos speransa pa hende ku ta obedesé Dios: (1) bida inmortal den shelu pa algun i (2) bida pa semper riba tera pa miónes di otro. Ora nos realisá kuantu Yehova stima nos i kuantu Hesus su sakrifisio ta benefisiá kada un di nos personalmente, esei lo hala nos mas serka di Yehova. (1 Ped. 3:18; 1 Huan 4:9) Pues, meskos ku nos rumannan fiel di pasado, nos ta invitá otro hende pa bin tene Memorial huntu ku nos na e manera ku Hesus a bisa.
INVITÁ OTRO HENDE
Kiko bo por hasi pa partisipá plenamente den e kampaña di invitashon pa Memorial? (Wak paragraf 8-10) e
8. Kiko Yehova su sirbidónan a hasi pa invitá otro hende pa Memorial? (Wak e plachi.)
8 Pa hopi tempu Yehova su sirbidónan a bin ta invitá otro hende pa Memorial. Na 1881, E Toren di Vigilansia a invitá e rumannan na Merka pa reuní na kas di un ruman na Allegheny, Pennsylvania, pa e evento spesial akí. Despues, kada kongregashon tabatin nan mes Memorial. Na mart 1940, e publikadónan a haña instrukshon pa invitá tur hende den nan teritorio ku tin interes den Beibel. Na 1960, pa promé biaha, Bètel a perkurá invitashon imprimí pa tur kongregashon. Djei padilanti, a parti míles di miónes di invitashon pa Memorial. Dikon nos ta hasi asina tantu esfuerso pa invitá otro hende pa Memorial?
9-10. Ken nos ta invitá pa Memorial, i dikon? (Huan 3:16)
9 Un di e motibunan ku nos ta invitá otro hende pa Memorial ta pasobra esnan ku asistí pa promé biaha lo siña e bèrdat tokante loke Yehova i Hesus a hasi pa tur hende. (Lesa Huan 3:16.) Nos ta spera ku loke nan mira i skucha lo duna nan gana di siña mas i bira sirbidó di Yehova. Pero no ta nan so nos ta hasi esfuerso pa invitá.
10 Nos ta invitá tambe publikadónan ku a stòp di asistí na reunion. Nos meta ta pa laga nan kòrda ku Yehova ketu bai ta stima nan. Nos ta keda masha kontentu ora nos mira nan bini. Segun ku nan ta presensiá e evento, nan lo kòrda kuantu goso nan tabatin tempu ku nan tabata sirbi Yehova. Wak e kaso di Monica. c Durante pandemia di COVID-19, el a bira un publikadó aktivo atrobe. Despues ku el a asistí na Memorial di 2021, el a bisa: “E Memorial akí tabata masha spesial pa mi. Pa promé biaha despues di 20 aña, mi por a prediká i invitá hende pa Memorial. Di bèrdat m’a hasi tur mi esfuerso pasó mi no tin boka pa gradisí Yehova i Hesus pa tur loke nan a hasi pa mi.” (Sal. 103:1-4) Sea ku hende aseptá nos invitashon òf nò, nos ta hasi tur loke nos por pa invitá nan pasobra nos sa ku Yehova ta balorá nos esfuersonan.
11. Kon Yehova a bendishoná nos esfuerso pa invitá hende pa Memorial? (Ageo 2:7)
11 Yehova a bendishoná nos esfuerso pa invitá hende pa Memorial masha hopi mes. Na 2021, apesar di e restrikshonnan debí na e pandemia di COVID-19, nos tabatin un rèkòrt di asistensia: 21.367.603 hende. Esei ta mas ku dòbel di e kantidat di Testigu di Yehova rònt mundu! Klaru ku pa Yehova hende ta mas importante ku sifra. (Luk. 15:7; 1 Tim. 2:3, 4) Nos ta konvensí ku ora nos invitá hende pa Memorial, Yehova ta yuda nos haña esnan di kurason sinsero.—Lesa Ageo 2:7.
TENE MEMORIAL APESAR DI SITUASHONNAN DIFÍSIL
Yehova ta bendishoná nos esfuersonan pa tene Memorial (Wak paragraf 12) f
12. Kiko por stroba nos di konmemorá e morto di Hesus? (Wak e plachi.)
12 Hesus a profetisá ku durante e último dianan, nos lo haña nos ku tur sorto di situashon difísil. El a menshoná entre otro oposishon di famia, persekushon, guera i pèst. (Mat. 10:36; Mar. 13:9; Luk. 21:10, 11) Tin biaha, e situashonnan difísil ei por bira opstákulonan ku por stroba nos di konmemorá e morto di Hesus. Laga nos wak kon algun ruman a vense e opstákulonan ei, i kon Yehova a yuda nan.
13. Kon Yehova a bendishoná Artem su kurashi i determinashon pa tene Memorial den prizòn?
13 Den prizòn. Nos rumannan ku ta den prizòn pa motibu di nan fe ta hasi tur loke nan por pa konmemorá e morto di Hesus. Wak loke Artem a hasi. Durante e temporada di Memorial 2020, e tabata será den un sèl masha chikitu mes ku tabatin máksimo 5 prezu. Apesar di e sirkunstansia, el a usa loke e tabatin pa e pan i e biña, anto el a plania pa duna e diskurso di Memorial na su mes. Pero tabatin un problema. Henter dia su kompañeronan di sèl tabata huma i papia palabra malu. Kiko el a hasi? El a pidi nan si pa un ora nan por keda sin huma i papia palabra malu. Pa su sorpresa, nan a bisa ta bon. Artem a bisa: “M’a ofresé pa splika nan kiko Memorial ta.” Na promé instante nan di ku no tabatin mester, pero ora nan a mira Artem tene Memorial i a skucha su diskurso, nan a hasié yen di pregunta.
14. Ki esfuerso a hasi pa tene Memorial durante e pandemia?
14 Pandemia di COVID-19. Durante e pandemia akí, Testigunan di Yehova no por a asistí na Memorial en persona. Pero, esei no a stroba nan di ten’é. d Kongregashonnan ku tabatin Internet a ten’é via videoconferece. Kiko awor di e miónes di rumannan ku no tabatin Internet? Den algun pais a regla pa pasa e diskurso na televishon òf radio. Ademas, sukursalnan a graba e diskurso na mas ku 500 idioma ya asina rumannan ku ta biba den áreanan aislá por a tene Memorial. Ruman hòmbernan tabata bai entregá e grabashon na esnan ku tabatin mester di dje.
15. Kiko bo ta siña for di Sue?
15 Oposishon di famia. E opstákulo di mas grandi ku algun mester a vense pa nan por a konmemorá e morto di Hesus ta oposishon di famia. Esei ta loke Sue, un studiante di Beibel, a hañ’é kuné. Na 2021, ún dia promé ku Memorial, el a bisa e ruman ku ta studi’é ku e no por asistí debí na oposishon di su famia. E ruman a lesa Lukas 22:44. Djei el a splika Sue ku ora nos haña nos ku difikultat, nos tin ku hasi orashon na Yehova i konfia kompletamente den dje, meskos ku Hesus. Su manisé, Sue a pone e pan i e biña kla i a wak e Adorashon di Mainta pa e dia di Memorial riba jw.org. Anochi, el a drenta su kamber i a skucha e diskurso di Memorial via telefòn. Despues, Sue a skirbi e ruman ku ta studi’é: “Bo no sa kuantu b’a animá mi ayera. M’a hasi tur loke mi tabata por pa sigui e Memorial, i Yehova a hasi sobrá. Bo no por imaginá kon felis i gradisidu mi ta na Yehova!” Bo ta kere ku Yehova por yuda abo tambe si bo haña bo den un situashon asina?
16. Dikon nos tin sigur ku Yehova lo bendishoná nos esfuersonan pa asistí na Memorial? (Romanonan 8:31, 32)
16 Yehova ta balorá e esfuersonan ku nos ta hasi pa tene Memorial masha tantu mes. Ora nos mustr’é kon gradisidu nos ta pa tur loke el a hasi pa nos, nos por tin sigur ku lo e bendishoná nos. (Lesa Romanonan 8:31, 32.) Pues, laga nos ta determiná pa asistí na Memorial e aña akí i pa hasi mas pa Yehova durante e simannan promé i despues di Memorial.
KANTIKA 18 Gratitut pa e Reskate
a Riba djamars 4 di aprel 2023, miónes di hende rònt mundu lo konmemorá e morto di Kristu. Hopi di nan lo t’ei pa promé biaha. Tambe lo tin publikadó ku a stòp di asistí na reunion i ku no a asistí na Memorial pa hopi aña. I lo tin algun ku tin ku vense opstákulonan grandi pa por tene Memorial. Sea kual sea bo situashon, bo por tin sigur ku Yehova ta mashá kontentu ku tur e esfuersonan ku bo ta hasi pa t’ei.
b Hende ta kere ku durante e seremonia akí, e pan i e biña ta kambia bira karni i sanger di Kristu. Nan ta pensa ku, kada biaha ku un hende partisipá den e rito akí, Hesus su kurpa i sanger ta ser sakrifiká.
c A kambia algun nòmber.
d Wak tambe riba jw.org/es e artíkulonan “Conmemoración del 2021.”
