E PALABRA griego tradusí komo “garoshi” den Tradukshon di Mundu Nobo por referí na diferente tipo di garoshi. (Echo. 8:​28, 29, 38) Ta parse ku e garoshi ku e funshonario di Etiopia tabata den dje tabata mas grandi ku un garoshi di guera òf di pusta. Ban wak pakiko nos ta bisa esei.

E tabata un funshonario di alto rango i a biaha un distansia basta largu. E tabata “un mandatario den servisio di Kandase, reina di Etiopia. E tabata na enkargo di tur e tesoronan di e reina.” (Echo. 8:27) Ántes Etiopia tabata abarká loke awe ta Sudan i e área mas zùit di loke awe ta Egipto. Aunke muy probablemente, e hòmber no a biaha den e mesun garoshi henter e ruta largu ei, e mester tabatin bastante ekipahe. Den promé siglo, tabata usa diferente tipo di garoshi pa transportá pasahero. Un di nan tabata un shèrs, esta, un garoshi ku tabatin kuater wil i un dak. E buki Acts—An Exegetical Commentary ta bisa: “Den e tipo di garoshi ei tabatin mas espasio pa ekipahe, por a biaha mas konfortabel i kisas por a kubri distansianan mas largu.”

E tabata lesa ora ku Felipe a aserk’é. E relato ta bisa ku “Felipe a kore bai banda di e garoshi, i el a tende e funshonario ta lesa na bos haltu for di e buki di Profeta Isaías.” (Echo. 8:30) E tipo di garoshinan ku hende tabata usa pa biaha kuné no tabata kore duru. Debí na esei, e funshonario por tabata lesa trankil i Felipe por a logra kore yega e garoshi na pia.

E funshonario a pidi “Felipe pa subi bin sinta den garoshi huntu kuné.” (Echo. 8:31) Den un garoshi di pusta, hende lo mester a keda pará. Pero, un shèrs lo tabatin sufisiente espasio pa tantu e funshonario komo Felipe sinta.

Teniendo kuenta ku loke e relato na Echonan kapítulo 8 ta bisa i pruebanan históriko, nos publikashonnan últimamente a bin ta usa plachi ku ta mustra e funshonario di Etiopia ta biaha den un garoshi mas grandi, i no den un garoshi di guera ni di pusta.