Pregunta di Lektor
Ta sabí pa Testigunan di Yehova usa websitenan pa buska un kasá?
Yehova ke pa pareha kasá ta felis i keda ku un amistat será ku otro. (Mat. 19:4-6) Komo ku ta Yehova ta esun ku a krea nos, e sa e kosnan ku nos tin ku hasi pa nos namoramentu i matrimonio por ta felis. P’esei, si bo ke haña un bon kasá i bo ke ta felis, ta importante pa bo sigui e prinsipionan ku Yehova a duna nos. Awor, laga nos wak algun di nan.
Promé, nos mester ta konsiente di esaki: “E kurason ta mas engañoso ku tur kos” i ta masha desesperá. (Yer. 17:9) Ora dos hende kuminsá date, masha lihé mes nan ta kuminsá haña sintimentu pa otro, i esei por pone ku nan no por pensa bon mas. Anto si nan disidí di kasa basá solamente riba loke nan ta sinti, hopi biaha nan ta haña nan ku un desepshon grandi. (Pro. 28:26) P’esei, dos hende ku ta kuminsá konosé otro mester tene hopi kuidou kiko nan ta bisa otro i kiko nan ta primintí otro promé ku nan konosé otro bon.
Proverbionan 22:3 ta bisa: “Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.” Ki malu tin den usa websitenan pa buska un kasá? Lamentablemente, algun hende a kuminsá date òf papia ku un persona online pero a resultá ku e persona a tuma nan hasi. Tambe algun hende desonesto a yena informashon falsu ora nan a traha nan account, djis pa nan por saka sèn for di hende inosente. Tin biaha, nan asta a pretendé di ta Testigu di Yehova.
Un otro peliger ta ku algun website ta usa fórmula pa wak ken ku ken ta pas ku otro. Pero, no tin niun prueba ku e método ei ta funshoná. Pues bo ta kere lo ta sabí pa stèns riba un fórmula ku hende a traha pa yuda bo haña un bon kasá? Bo ta kere ku e fórmulanan ei, por para banda di e prinsipionan di Beibel?—Pro. 1:7; 3:5-7.
Un otro prinsipio ta na Proverbionan 14:15: “E hende simpel ta kere tur kos, ma e hòmber [òf muhé] prudente ta wak bon unda e ta bai.” Promé ku bo disidí ku ta ku tal persona bo ke kasa, ta hopi importante pa bo konos’é bon. Pero, ta difísil pa hasi esei online. Kisas bo ta pensa: “Mi a lesa su informashon online i nos ta pasa hopi tempu ta papia ku otro.” Pero, di bèrdat bo por bisa ku bo konos’é bon? Algun hende a pensa ku nan a haña e amor di nan bida, pero ora nan a topa e persona akí nan a keda di shòk ora nan a haña sa ken e ta en realidat.
E eskritor di Salmo 26:4 a bisa: “Mi no ta sinta huntu ku hòmbernan [òf muhénan] gañadó, tampoko lo mi no anda ku hipókritanan.” Pa hopi hende ta masha normal pa gaña riba nan profile djis pa nan mustra mas interesante. Algun hende, pa malu, ta skonde ken realmente nan ta. Òf dor ku bo ta papia ku e persona online, tin kos ku lo bo no ripará di e persona. P’esei, e siguiente preguntanan ta masha importante: Aunke e persona bisa ku e ta un Testigu di Yehova, di bèrdat e ta un ruman batisá? E ta un persona spiritualmente maduro? E tin un amistat fuerte ku Yehova? Kon su kongregashon ta mir’é? E ta un bon ehèmpel, un mal ehèmpel, òf te asta “mal kompania”? (1 Kor. 15:33; 2 Tim. 2:20, 21) E ta liber pa kasa den Yehova su bista? Ta masha importante pa bo sa kontesta di tur e preguntanan ei. Pero, e realidat ta ku ta masha difísil pa bo haña kontesta riba e preguntanan akí sin ku bo papia ku otro Testigu ku konosé e persona bon. (Pro. 15:22) I ta klaru ku un Testigu ku ègt stima Yehova lo no ni pensa di kasa ku un persona ku no ta un Testigu batisá.—2 Kor. 6:14; 1 Kor. 7:39.
Ta bisto anto ku tin hopi rísiko den usa website pa buska un kasá. Pero awor, ki otro manera tin pa sera konosí ku un ruman i wak si e ta un bon kasá pa bo? Normalmente, Testigunan di Yehova ta sera konosí ku otro personalmente na reunion, asamblea, kongreso òf na otro okashon.
Segun ku boso ta konosé otro mihó, lo bira bisto si boso tin e mesun metanan
Pero ora esei no ta posibel, manera durante e pandemia di COVID-19, nos ta reuní online, anto durante e okashonnan ei bo por haña oportunidat pa sera konosí ku otro ruman soltero. Tambe bo por skucha nan komentarionan anto mira kon nan ta duna nan partinan durante reunion. (1 Tim. 6:11, 12) Ademas, si e kongregashon ta usa breakout room, usa e momentonan ei pa papia ku otro. Anto durante get-together virtual, usa e oportunidatnan ei pa mira kon e persona ku bo ta interesá den dje ta anda ku e otro rumannan. Tur e kosnan ei por yuda bo mira ken e persona realmente ta. (1 Ped. 3:4) Ku tempu, segun ku boso ta konosé otro mihó, lo bira bisto si boso tin e mesun metanan i si di bèrdat boso ta pas ku otro.
Ora rumannan usa prinsipionan di Beibel pa buska un kasá, chèns ta grandi ku nan lo tin un matrimonio felis. I esei ta nèt loke Proverbionan 18:22 ta bisa: “Esun ku haña un [esposo òf] esposa ta haña algu bon, i ta risibí fabor for di SEÑOR.”
