ESEI ta loke David di Israel di antigwedat a bisa pa elogiá un dama ku el a topa. Su nòmber tabata Abigail. Pero kiko a pone David elogiá Abigail, i kon nos por benefisiá di Abigail su ehèmpel?

David a sera konosí ku e dama kasá akí tempu David tabata hui for di Rei Saul. Abigail tabata kasá ku Nabal, un hòmber riku ku tabata kuida su tounan grandi den e region di seru den parti zùit di Huda. David i su hòmbernan tabata manera “un muraya” di protekshon pa Nabal su wardadónan i su tou. Despues, David a manda mensahero serka Nabal pa pidié ‘loke e tabatin na man’ pa nan kome. (1 Sam. 25:8, 15, 16) E echo ku David a pidi kuminda no tabata nada ku Nabal no por a kumpli kuné, mirando kon David i su hòmbernan a protehá Nabal su propiedatnan.

Pero Nabal, kende su nòmber ta nifiká “Bobo” òf “Dòmverstant” (BPK), a demostrá ku no ta pòrnada e tabatin e nòmber ei. El a reakshoná na un manera bobo, a insultá David i a nenga di dun’é loke el a pidi. David tabata kla pa kastigá Nabal pa e manera ku el a ofendé David i pa su aktitut irasonabel. Nabal ku su kas lo a paga pa su bobedat.—1 Sam. 25:2-13, 21, 22.

Ku kurashi Abigail a intervení ora el a ripará ki konsekuensianan grave David su plan lo a trese. Abigail a papia respetuosamente ku David, a pon’é pensa riba su relashon ku Yehova i a duna David, kende lo a bira e siguiente rei, sufisiente kuminda pa e i su hòmbernan. David, na su turno, a rekonosé ku Yehova a usa Abigail pa yud’é evitá di hasi loke por a hasié kulpabel dilanti di Dios. David a bisa Abigail: “Bendishoná sea bo disernimentu, i bendishoná sea abo mes, kende a kita mi awe di drama sanger.”—1 Sam. 25:18, 19, 23-35.

Hamas nos lo ke ta manera Nabal, kende no a apresiá e bon kosnan ku otro hende a hasi p’e. Di otro banda, ora nos mira ku un situashon ta saliendo for di man, ta bon pa nos hasi tur loke nos por pa plakia e situashon. Sí, nos por tin e mesun sintimentunan ku e salmista, kende a bisa Dios: “Siña mi bon disernimentu [òf, “sano huisio,” NW] i konosementu.”—Sal. 119:66.

Otro hende lo por tuma nota ora nos demostrá sabiduria, òf sano huisio. Sea nan bisa nos òf laga, kisas nan ta pensa meskos ku David, kende a bisa: “Bendishoná sea bo disernimentu.”