HOPI hende sa ku Hesus a muri kologá na staka meimei di dos kriminal. (Mat. 27:35-38) Pero e echo ku Beibel ta bisa ku despues nan a drecha Hesus su kurpa pa der’é, ta pone ku algun hende ta bisa ku e relato ei no ta klòp.—Mar. 15:42-46.

Algun eksperto ta duda ku e romanonan lo a permití ku un hende ehekutá na staka lo a haña un entiero. Segun nan, e romanonan tabata hasi algu otro. E periodista Ariel Sabar, a splika den e revista Smithsonian pakiko algun ta pensa asina. El a bisa: “E romanonan tabata kologá e pió hendenan di sosiedat na krus. Algun eksperto a bisa ku ta ridíkulo pa kere ku e romanonan lo a duna un persona asina un entiero digno.” E romanonan tabata kier a duna hende malbado e pió trato, p’esei nan tabata laga nan kurpa keda kologá pa bestianan salbahe habraká. Despues, probablemente nan tabata tira e restunan den kualke graf huntu ku otro restunan.

Sinembargo, deskubrimentu di algun arkeólogo a revelá algu diferente, a lo ménos den kaso di algun hudiu ku a ser ehekutá. Na 1968, nan a bin haña restunan di skelèt di un hòmber ku a ser ehekutá den promé siglo. E restunan ei tabata serka di Herúsalèm, den graf di un famia hudiu. Nan tabata den un osario, esta, un kaha chikitu pa warda wesu seku di un kadaver. Entre nan tabatin wesu di hilchi di pia. Un klabu di 11,5 centimeter tabata pasa dor di dje i e tabata na un planki di palu. Sabar a bisa: “E hilchi ku tabata di un hòmber ku yama Yehochanan, a proba ku e relato den Evangelio ku ta bisa ku a dera Hesus, kisas ta bèrdat.” Ta interesante ku “a haña e wesu di hilchi di pia di Yehochanan. Esaki tabata un hòmber kende a biba den tempu di Hesus i ku e romanonan a kologá na krus i ku nan a permití haña un entiero.”

A base di e hilchi akí a lanta diferente opinion tokante kon a klaba Hesus na staka. Pero, e echo ta ku algun kriminal ku e romanonan a ehekutá a haña un entiero i no a djis bentá nan restunan den kualke graf. Pues, loke Beibel ta bisa tokante e echo ku a pone Hesus su kurpa den graf, ta klòp.

Loke ta mas importante ta ku Yehova a bisa delantá ku Hesus lo a wòrdu derá den graf di un hòmber riku. Anto ku niun hende no por stroba Dios su palabra di kumpli.—Isa. 53:9; 55:11.