Di Con Tatanan Ta Disparce

“Mi no ta corda Mama cu Tata ta bringa of pleita. Un cos mi sa cu Tata tabat’ei, anto—bam!—un dia e no tabat’ei mas. Te awe mi no sa na unda mi tata ta. Mi sa sí cu mi no ta sinti nada p’e.”—Bruce.

“Mi tabata e único mucha na scol cu no tabatin dos mayor i cu no a biba den un cas . . . Semper mi a sinti cu mi tabata riparabel. Semper mi a sinti cu mi ta masha distinto for di tur otro mucha di mi edad.”—Patricia.

E CRISIS di famianan sin tata a originá cu e revolucion industrial. Segun cu empleo den fábrica a cuminsá kita hombernan for di nan hogar, e influencia dje tata den famia a cuminsá mengua; mamanan a cuminsá carga mas responsabilidad den lantamentu di yu. * Tog asina mes, mayoria tata a keda huntu cu nan famia. Sin embargo, durante añanan ’60, e cifra di divorcio na Merca a cuminsá aumentá drásticamente. E bareranan religioso, económico i social contra divorcio a cuminsá basha den otro. Stimulá dor dje conseho di hende cu a yama nan mes experto i cu tabata pretendé cu no solamente divorcio no ta haci mucha daño, sino cu e por ta asta bon pa nan, cantidad récord di pareha a opta pa divorcio. E buki Divided Families—What Happens to Children When Parents Part [Famianan Dividí—Kico Ta Pasa cu Mucha ora Mayornan Separá], di Frank F. Furstenberg, Jr., i Andrew J. Cherlin, ta bisa: “Na Bélgica, Francia i Suisa e cantidad [di divorcio] a bira dòbel [desde añanan ’60], miéntras cu na Cánada, Inglatera i Hulanda el a bira tres biaha mas tantu.”

Maske muchanan ta keda generalmente cerca nan mama despues di divorcio, mayoria tata cu ta bai for di cas kier mantené un relacion cu nan yunan. Tutela compartí ta un solucion popular. Tog, sorprendentemente, mayoria tata divorciá ta mantené tiki contacto cu nan yunan. Un encuesta a revelá cu ta solamente  1 mucha den cada 6 ta mira su tata divorciá riba un base semanal. Casi mitar dje muchanan no a mira nan tata henter un aña!

E Fracaso di Tutela Compartí

Pa parehanan divorciá compartí tutela, e ta rekerí masha hopi cooperacion i confiansa, net e cualidadnan cu hopi bes nan ta falta. Investigadónan Furstenberg i Cherlin ta expres’é asina aki: “Un motibu principal pakico tatanan ta stop di wak nan yunan ta dor cu nan no kier tin nada di haci cu nan ex-casá. I hopi hende muher ta adoptá e mésun actitud aki pa cu nan ex-casá.”

Ta cierto cu hopi tata divorciá ta wak nan yunan regularmente. Pero debí cu nan no ta enbolbí mas den e bida diario di nan yunan, ta difícil pa algun di nan comportá nan mes manera tata ora nan ta huntu cu nan. Hopi ta opta pa e papel di compañero di wega, dedicando casi tur nan tempu huntu na recreo of compra. Ari di 14 aña ta describí su bishitanan di fin di siman cerca su tata asina aki: “No tin un orario fiho, no tin cuenta di cosnan manera ‘wak pa bo ta na cas mitar di cincu.’ No tin control. Mi ta liber. I tur ora mi tata ta cumpra regalo pa mi.”—How It Feels When Parents Divorce [Con Mucha Ta Sinti ora Mayornan Divorciá], di Jill Krementz.

Un tata amoroso mester ‘sa con pa duna bon regalo na su yunan.’ (Mateo 7:11) Pero regalo no por remplasá guia i disiplina necesario. (Proverbionan 3:12; 13:1) Ora un hende cambia e papel di mayor pa compañero di wega of bishitante, ta sigur cu e relacion entre tata cu yu lo deteriorá. Un estudio a concluí: “Divorcio por kibra e relacion entre tata cu yu permanentemente.”—Journal of Marriage and the Family, mei 1994.

Di hùrt i rabiá pasobra nan no ta parti dje bida di nan yunan mas—of kisas gewoon friu i indiferente—tin homber ta bandoná nan famia, i ta keda sin duna nan e sosten financiero necesario. * (1 Timoteo 5:8) Un mucha homber tiener amargá a bisa: “Mi no por pensa riba nada di mi tata cu mi ta gusta. E no ta conta den nos bida, e no ta mantené nos ni nada, i mi ta haña esei repugnante.”

Mayornan Soltero

E cantidad récord di yu ilegítimo cu ta nace a causa e aumento mas grandi den e cantidad di yunan sin tata. “Rond di un tercer parti di tur yu cu nace na [Merca] awor ta pafó di matrimonio,” segun e buki Fatherless America [Merca sin Tata]. Di aproximadamente 500.000 baby cu nace tur aña di tienernan entre 15 pa 19 aña, 78 porciento ta mama soltero. Sin embargo, tiener na estado ta un problema mundial. I programanan cu ta siña pa usa métodonan anticonceptivo of cu ta predicá abstinencia, casi no a logra cambia comportacion sexual di tienernan.

E buki Teenage Fathers [Tatanan Tiener], di Bryan E. Robinson, ta splica: “Sali na estado sin ta casá no ta un bergwensa ni humiyacion mas manera den añanan ’60, debí n’e actitud  social mas liberal pa cu sex i pa cu salimentu na estado promé cu matrimonio. . . . Tambe e hubentud djawe ta ser bombardiá constantemente cu sexualidad mediante propaganda, música, película di cine i television. Medionan di comunicacion mericano ta bisa adolesentenan cu sex ta romántico, excitante i un stimulante placentero, sin nunca mustra nan e consecuencianan di bida real cu comportacion sexual spontáneo i iresponsabel ta trece.”

Hopi hóben ta parce masha trankil i no ta conciente mes dje consecuencianan di sex pafó di matrimonio. Tuma nota di algun dje comentarionan cu e autor Robinson a tende: “ ‘E no a parce e tipo di mucha muher ei [cu ta sali na estado],’ ‘nos tabata tene relacion un biaha pa siman so,’ of ‘mi no a pensa cu for dje promé biaha bo por sali na estado.’ ” Claro cu algun mucha homber sa masha bon cu sex por resultá den salimentu na estado. E buki Young Unwed Fathers [Tatanan Hóben Soltero] ta remarcá: “Pa hopi mucha homber [dje parti pober di stad], sex ta un símbolo importante di státus social local; cada conkista ta un logro. Hopi dje mucha muhernan ta ofrecé sex a cambio di atencion di un yoncuman.” Den algun círculo di zonanan asina, nan por asta tenta mucha hombernan cu no a traha yu ainda i yama nan “bírgen”!

E plachi ta bira asta mas scur ora bo considerá e resultadonan di un estudio hací na 1993 bou di mamanan di edad escolar na California. Ta resultá cu dos tercer parti dje mucha muhernan a sali na estado, no di amigunan tiener, sino di hombernan riba 20 aña di edad! De facto, algun estudio ta indicá cu hopi mama tiener soltero ta víctima di homber cu ta tene relacion cu menornan di edad, of asta di abusu sexual di mucha. Tal explotacion plamá ta mustra con malu i perverso sociedad moderno a bira.—2 Timoteo 3:13.

Di Con Yoncumannan Ta Bandoná Nan Yunan

Masha poco biaha mucha hombernan tiener cu ta traha yu ta tuma e responsabilidad di largu plaso pa nan yunan. Un mucha homber kende su mucha muher a sali na estado di: “Mi a bis’é gewoon: ‘Mi ta chek bo.’ ” Sin embargo, manera un artículo den Family Life Educator [Educadó di Bida di Famia] ta señalá, “mayoria tata yong ta expresá un deseo fuerte di tin un relacion cerá cu nan yunan.” Segun un estudio di tatanan hóben soltero, 70 porciento tabata bishitá nan yu un biaha pa siman. E artículo ta spierta: “Sin embargo, segun cu e muchanan ta bira mas grandi, e cantidad di bishita ta baha.”

Un tata di 17 aña a resumí e pakico, bisando: “Si mi por a sa con difícil lo tabata bai ta, nunca lo mi no a laga esaki sosodé.” Poco hóben tin sea e madures emocional of e experencia pa manehá e exigencianan di ta mayor. Hopi di nan tampoco no tin e educacion ni e abilidad necesario pa traha pa gana nan pan. Anto en bes di enfrentá e humiyacion di fracaso, hopi yoncuman ta gewoon bandoná nan yunan. Un tata hóben ta confesá: “Mi bida ta mal bruhá.” Un otro tata hóben ta lamentá: “Apénas mi por soru pa mi mes; mi no sa con lo mi a haci si mi tabatin cu soru pa [mi yu homber] tambe.”

Druif Zuur

Den tempu bíblico e hudiunan tabatin un dicho: “Ta e mayornan a come e druif zuur, pero ta e yunan a sinti e smak zuur.” (Ezekiel 18:2, Today’s English Version) Dios a bisa e hudiunan cu no tabatin nodi ta asina, esta, cu no ta necesario ripití erornan di pasado. (Ezekiel 18:3) Tog, miyones di yu awe ta parce di ta sinti e smak marga di nan mayornan su “druif zuur,” ta nan ta pasa e castigu pa nan mayornan su inmadures, iresponsabilidad i fracaso matrimonial. Realmente, tin masha hopi investigacion cu ta demostrá cu mucha cu lanta sin tata ta ser exponé na un gran cantidad di riesgo físico i emocional. (Mira e cuadro na página 7.) Loke foral ta angustioso ta e echo cu hopi bes e herencia di un hogar sin tata ta pasa di un generacion pa otro, un ciclo continuo di dolor i miseria.

Famianan sin tata ta destiná na fracaso? Absolutamente cu no. De echo, e bon noticia ta cu por kibra e ciclo di famianan sin tata. Nos siguiente artículo lo mustra con.

[Nota]

 [Kuadro/Plachi na página 7]

E RIESGONAN DI CRECE SIN TATA

Crece sin tata ta trece riesgonan serio pa mucha. Maske e siguiente informacion por ta doloroso pa algun hende considerá, ser conciente dje riesgonan ta e promé paso pa prevení of por lo ménos minimisá e daño. Realisá tambe, cu estadística basá riba estudionan ta aplicá na gruponan i no na individuonan. Hopi mucha ta lanta den un cas sin tata sin experenciá ningun dje problemanan aki. Manera nos artículo final lo mustra, intervencion di mayor i aplicacion di principionan bíblico por haci hopi pa mengua e posibel problemanan aki. Considerá anto algun dje posibel riesgonan cu un yu sin tata por confrontá.

▪ Mayor Peliger di Abusu Sexual

Investigacion ta mustra bon cla cu ora no tin tata na cas, e riesgo di abusu sexual di mucha ta aumentá. Un estudio a revelá cu di 52.000 caso di abusu di mucha, “72 porciento tabata trata di mucha cu a biba den cas sin un of niun di dos mayor biológico.” E buki Fatherless America ta declará: “E riesgo di abusu sexual di mucha cu ta escalá den nos sociedad ta bin principalmente dor dje creciente ausencia di tatanan casá i e creciente presencia di tata di criansa, namorado i otro hende homber cu no ta famia of cu ta biba den cas.”

▪ Mayor Riesgo di Comportacion Sexual for di Trempan

Dor cu probablemente tin ménos supervision di mayor den cas di un solo mayor, hopi bes hóbennan tin mas oportunidad pa participá den conducta inmoral. Ménos entrenamentu di mayor tambe por ta un factor. Segun e Departamento Mericano di Salubridad i Servicionan Humano: “Mucha muhernan sin un tata den nan bida tin dos biaha i mei mas chens di sali na ­estado.”

▪ Pobresa

Un estudio di mucha muher tiener di color na Sur Africa a yega n’e conclusion cu pobresa ta un consecuencia comun ora bo ta mama soltero. “Den 50% di caso,” segun e autornan dje estudio, “no ta probabel cu e tiener ta bai scol bek.” Hopi mama soltero ta bin para den un bida di prostitucion i traficacion di droga. E situacion tal bes no ta muchu mas mihó den paisnan occidental. Na Merca, “10 porciento di mucha den famia di dos mayor tabata den pobresa [na 1995], compará cu 50 porciento di mucha den famia cu hende muher na cabes.”​—⁠America’s Children: Key National Indicators of Well-Being 1997.

▪ Negligencia

Dor cu algun mayor soltero ta haña nan forsá pa gana nan pan sin yudansa di otro hende, nan responsabilidadnan ta muchu pa nan i nan no por dedicá e debido tempu na nan yunan. Un señora divorciá ta corda: “Mi tabata traha den dia i bai scol anochi, kedando lenga afó. Definitivamente mi a neglishá e muchanan.”

▪ Daño Emocional

Contrario na loke algun experto ta pretendé, esta, cu mucha ta recuperá lihé despues di un divorcio, investigadónan, manera dr. Judith Wallerstein, a descubrí cu divorcio ta causa dañonan emocional duradero. “Mas cu un tercer parti di homber i muher hóben entre e edad di diesnuebe pa bintinuebe aña tin tiki of ningun ambicion dies aña despues dje divorcio di nan mayornan. Nan ta drif dor di bida sin metanan fiho . . . i cu un sintimentu di impotencia.” (Second Chances, di dr. Judith Wallerstein i Sandra Blakeslee) Poco balor propio, depresion, comportacion delincuente i rabia persistente, a ser observá den hopi yu di mayornan divorciá.

E buki The Single-Parent Family ta bisa: “Cantidad di estudio ta mustra cu mucha hombernan cu lanta sin un presencia masculino fuerte den nan bida, ta mustra insiguridad pa cu nan masculinidad, poco balor propio, i mas lat den nan bida, problema pa forma relacionnan íntimo. E problemanan cu mucha muher por desaroyá dor di biba sin ‘role model’ masculino por lo general no ta lanta ­cabes sino te den adolesencia of mas lat, i ta entre otro, dificultad pa forma relacionnan exitoso ­entre homber i muher ora nan ta adulto.”