E Distancia Entre Ricu i Pober Ta Birando Mas Grandi

“Den e último cincu décadanan, hende a haci mas progreso den reducí pobresa mundial, cu den e cincu siglonan anterior,” segun UNDP Today, un publicacion dje Programa di Desaroyo di Nacionnan Uní (ONU). “Paisnan den desaroyo a baha e cantidad di morto infantil cu mitar desde 1960, nan a reducí malnutricion pa un tercer parti i a aumentá baimentu di scol cu 25 porciento.” Sin embargo, e mésun fuente ta admití cu apesar dje progreso aki, pobresa mundial “ta keda plamá extensamente.”

Pió ainda, desigualdadnan den sociedad i entre sociedadnan ta creciendo. Segun Catherine Bertini, directora ehecutivo dje Programa Mundial di Alimentacion di ONU, “compará cu aña pasá, hopi mas hende na mundu ta sufri di malnutricion i hamber.” De echo, awe rond di 840 miyon hende den paisnan den desaroyo ta biba cu hamber constant, hopi mas cu un mil miyon no tin acceso na awa limpi pa bebe, i casi 1,5 mil miyon hende apénas ta biba di ménos cu un dollar pa dia. Mary Robinson, Alto Comisionario pa Derechonan Humano di ONU, ta spierta cu “nos ta den peliger di yega na un punto caminda mundu lo no ta partí den estadonan den desaroyo i esnan desaroyá, sino entre [estadonan] sobredesaroyá i esnan cu nunca lo desaroyá.”

Kico lo ta e costo p’e comunidad mundial djawe di seis mil miyon hende reducí e distancia entre ricu i pober? Ménos di loke kisas bo ta pensa. ONU ta calculá cu lo tin mester pa aña 9 mil miyon dollar ($1,50 pa persona) adicional pa percurá condicionnan sanitario i awa limpi rond mundu i cu un 13 mil miyon dollar mas (rond di $2 pa persona) pa aña lo ta necesario pa sigurá salubridad i nutricion básico pa tur hende riba tera. Aunke e sumanan aki ta considerabel, nan ta parce insignificante ora compará nan cu loke mundu ta gasta na otro servicionan. Pa ilustrá, den un solo aña recien, mundu a gasta $435 mil miyon (mas cu $70 pa persona) na propaganda i $780 mil miyon ($130 pa persona) na asuntunan militar. Ta bisto anto cu pa reducí e distancia entre hende na mundu cu tin i esnan cu no tin, no ta asina tantu un asuntu di haña suficiente fondo sino di fiha e debido prioridadnan.