For di Nos Lectornan

Peso Di fondo di mi curason, mi kier gradicí boso pa e artículo “Hóbennan Sa Puntra . . . Con Mi Por Vence Mi Obsesion cu Peso?” (8 di juni 1999) Ya tin basta tempu caba cu mi no por pensa riba otro cos cu no ta mi curpa i mi peso. Mi tin bergwensa di mi mes ora mi wak den spiel, i casi mi no ta tribi subi balansa mas. Pero, despues di a lesa e artículo aki mi a realisá cu loke bo ta di paden ta loke ta conta.

L. R., Francia

Desabilidad Mi ta pasa mayor parti di mi tempu den un rolstoel. Mi esposa ta sufri di cansancio crónico i di depresion profundo. E seri “Un Speransa pa Esnan Desabilitá” (8 di juni 1999) a mencioná cu pena ta un reaccion normal ora bo sufri un pérdida serio. Tambe, e plachinan den e artículo “Ora cu Tur Desabilidad Disparcé” a yuda haci e futuro curacion di nos enfermedadnan un realidad mas bibu pa mi.

C. W., Merca

Ora mi tabatin apénas cuater aña, mi a perde mi pia robes den un accidente. Boso seri a yuda mi trata cu mi frecuente atakenan di depresion. Por fabor, sigui cu e bon trabou di combatí prehuicio.

A.J.T.P., Brazil

Mester laga hende sa cu personanan desabilitá tambe tin sintimentu i emocion mescos cu tur otro hende i cu por hùrt nos i cu esei ta sosodé. Tin biaha hende ta wak bo como si fuera bo ta abnormal i ta haci comentarionan brutu, of nan ta actua como si fuera bo no ta ni existí. Hende desabilitá no ta ni kens ni floho ni inútil. Si duna nos un chens, hopi di nos por cushiná, limpia, haci compra, lanta un famia, tene un empleo i asta core un vehículo. Un cos cu a yuda mi sigui padilanti ta e echo cu mi ta siñando tocante Jehova i su camindanan amoroso i tierno. Mi no ta un Testigo di Jehova ainda, pero mi ta spera di bira unu den futuro.

A. G., Merca

Balioso den Bista di Dios Hopi bes mi ta sinti mi deprimí i cu mi no ta bal nada, tin biaha mi ta pensa cu lo mi no mester ta un evangelisadó di tempu completo pasobra mi esfuersonan no ta suficiente bon. E artículo “E Punto di Bista Bíblico: Bo Ta Balioso den Bista di Dios!” (8 di juni 1999) a laga mi sinti hopi mas mihó. El a yuda mi mira cu Satanas ta traha duru pa laga nos sinti asina pa nos stop di sirbi Jehova.

L. W., Cánada

E artículo tabata masha consolador. Te cu awor, mi tabata sinti como si fuera Jehova no tabata scucha mi oracionnan. Pero for di dia cu mi a lesa boso artículo, mi tin mas confiansa den Jehova i den mi mes. Por fabor, sigui publicá artículonan consolador manera esaki.

R.V.T., Bélgica

Mi tin e sicatrisnan di experencianan doloroso, erornan cu a horta mi di mi balor propio. Awe mi relacion cu Jehova i e conocimentu cu su amor ta fuera di comprension humano ta duna mi un sintimentu di felicidad i siguridad.

V.S.C., Brazil