Purba un Par dje “Lihénan”!

DJE CORESPONSAL DI SPIERTA! NA TAIWAN

NA E pleno delicia cu su cara a reflehá, ta bisto cu e mucha muher chikitu ta disfrutá di su cuminda. Den su man robes tin un conchi yen-yen cu aros, pidanan chikitu di berdura i piscá. Den su man drechi tin un par di stoki fini di bambu. Manehando e palunan cu su dedenan chikititu, e mucha ta piki su bocánan faborito i ta hinca nan nèchi asina den su boca. Tin biaha e ta hisa e conchi te na su lipnan i, cu un par di halá lihé cu e palunan, e ta schep e aros te den su boca. Tur esei ta parce asina natural, fácil i ordená.

Loke e mucha chikitu tin den su man ta naturalmente e famoso chopstick. Na chines nan yama k’uai tzu (na pinyin, kuaizi) cu kier men “lihénan.” Segun informe e palabra ‘chopstick’ a bini dje palabra ingles pidgin chop cu kier men “lihé.” Di tur manera, bo ta haña nan den casi tur cas di famia na zuidoost Asia. Kisas bo a yega di purba usa nan ora bo a bai come den un restaurant chines. Pero bo sa di unda e idea di chopstick a bini? Of con i na ki tempu a usa nan pa promé bes? I lo bo tin gana di sa con pa usa nan n’e manera corecto?

E “Lihénan”

Chopstick ta stokinan fini di un 20 pa 25 centimeter largu. Hopi bes e mitar ariba dje stoki ta vierkant. Esaki ta hacié mas fácil pa gara i ta strob’é di lora rond riba mesa. E mitar abou por lo general ta rondó. Hopi biaha, chopstick hapones ta mas corticu i e ta caba den forma mas punta cu esnan chines.

Den e tempu aki di produccion en masa, hopi restaurant ta percurá chopstick prepaketá cu ainda ta pegá na otro parti ariba. Esun cu ta bai come tin cu habri nan for di otro promé cu e por usa nan. Debí cu nan ta pa usa un biaha so, e chopsticknan ei ta trahá di gewoon palu of bambu. Chopstick cu ta ser usá den restaurantnan mas caru of na cas hopi bes ta masha bunita, trahá di bambu di pòlish, palu vernisá, plestik, stainless steel of kisas asta di plata of ivor. Tambe nan por ta inscribí cu poesia of decorá cu un pintura.

Con pa Usa Chopstick

Hopi bishitante na paisnan oriental manera China i Hapon ta keda fasiná ora nan mira un mucha chikitu di kisas apénas dos aña come cu un par di chopstick cu ta parce muchu grandi p’e. Masha lihé mes, e contenido dje conchi ta ser pasá pida pa pida den boca dje mucha. E ta ègt parce fácil.

Lo bo kier purba usa un par dje “lihénan”? Na principio kisas bo ta haña cu ta fastioso pa laga e chopsticknan move den e manera cu abo kier pa nan haci esei, pero cu un poco práctica, e ta bira fácil i e chopsticknan ta bira un extension di bo man.

Ta tene e chopsticknan den un solo man, por lo general man drechi. (Mira e plachi na página 15.) Promé, cera bo man manera ta un glas bo tin tené, cu bo duim apart for di bo dedenan. Pone un chopstick entre  bo duim i dedenan, lagu’e lèn n’e base di bo wijsvinger i e punta di bo dede di bisti renchi. Anto pone e di dos chopstick paralelo cu e promé, i ten’é cu bo duim i wijsvinger i dede meimei, manera lo bo tene un potlot. Pone e puntanan pareu dor di tik riba mesa. Awor, teniendo e chopstick abou ketu, move esun ariba dor di dobla bo wijsvinger i bo dede meimei manda ariba i abou. Practicá te ora cu bo por trece e puntanan dje chopsticknan huntu fácilmente. Awor bo ta cla pa usa e hermentnan manehabel aki pa piki cualkier pida dje dushi bocánan cu nan ta sirbi den un cuminda chines, for di un solo grano di aros te na webu di sloke! Chopstick cu cuminda di chines ta bai bon huntu ya cu por lo general e cuminda ta cortá den pidanan chikitu cu ta net un hap.

Ke tal di platonan caminda nan ta sirbi galiña, patu of ham hinté, sin ta cortá den pidanan chikitu? Generalmente nan ta cushiná e carni te n’e grado cu por usa e chopsticknan fácilmente pa separá un pida net na tamaño di un hap. Chopstick ta ideal pa piscá, cu hopi bes nan ta sirbi hinté; bo por evitá wesu hopi mas fácil cu ora bo usa cuchú cu forki.

Kico di come aros? Si e ocasion ta informal, bo por coge e conchi di aros cu bo man robes, his’é na bo boca, i schep e aros den bo boca cu e chopstick. Sin embargo, na un cuminda mas formal bo ta coge e aros cu e chopsticknan, cada bes un cantidad chikitu.

Kico di sopi, cu semper ta un parti di un cuminda chines? Generalmente nan ta duna bo un cuchara di porcelana. Pero si e sopi tin aletria of domplin of pida di berdura, carni of piscá, purba usa bo chopstick den bo man drechi pa piki e cuminda i e cuchara den bo man robes pa yuda bo hib’é na bo boca.

Etiket i Chopstick

Ora bo ser invitá na un cas chines pa un cuminda, ta bon pa sa di etiket chines. Promé, nan ta pone vários plato meimei di mesa. Warda te ora cu e anfitrion of e cabes di famia coge su chopsticknan i duna señal pa tur hende cuminsá. Esei ta e debido momento pa huéspednan aceptá e invitacion i coge nan chopstick i cuminsá.

 Distinto di algun cuminda estilo occidental, nan no ta pasa e platonan rond. Mas bien, tur hende na mesa mes ta sirbi nan mes. Ora un famia ta come, ta normal pa cada miembro usa su mes par di chopstick pa saca pida cuminda for dje platonan comun i hinca nan stret den boca. Aunke ta asina, nan ta haña cu ta mal manera pa slurp bo cuminda, lembe e puntanan di bo chopstick of piki den e platonan pa bo pida faborito. Mamanan na Oriente ta instruí nan yunan pa no morde e punta di nan chopstick, no solamente pasobra nan ta preocupá cu higiena, sino tambe pasobra esei ta daña e aparencia dje chopstick.

Tin biaha, dor cu ta tene consideracion cu huéspednan, nan ta percurá cuchara pa saca cuminda of mas chopstick. Nan ta usa esakinan pa saca pida cuminda for dje platonan meimei pone den un otro tayó of den bo conchi di aros. I, no sinti bo ofendí si bo anfitrion usa su chopsticknan pa saca un pida bon dje cuminda i pon’é stret den bo conchi. Al fin i al cabo, e kier haci sigur cu su invitado di onor ta haña e mihó pida!

Nan ta considerá mustra riba hende cu bo chopstick como mal manera, mescos cu ora ta trata di cuchú cu forki. Ta mal manera tambe pa coge algu otro miéntras bo tin bo chopstick den man ainda. Pues, ora bo tin cu usa e cuchara di saca cuminda of coge un nepkin of un kopi te, pone bo chopsticknan abou promé. Hopi bes tin stèndnan chikitu i atractivo special pa pone nan.

Ora bo caba di come, pone bo chopsticknan abou nèchi asina, relax i warda. Ta mal manera pa lanta for di mesa promé cu tur hende caba. Un biaha mas, ta e anfitrion of e cabes di famia ta esun cu ta terminá e cena dor di lanta para i invitá tur pa ban for di mesa.

Awor cu bo sa con pa usa chopstick, tur loke bo tin cu haci ta busca un par i practicá cu nan. E siguiente biaha cu un hende invitá bo na un restaurant chines of na nan cas pa un cuminda chines, pakico no purba un par dje “lihénan”? Por ta cu asta nan ta laga e cuminda smak mas dushi!

[Kuadro/Plachi na página 14]

Un Poco Historia di Chopstick

Algun experto chines ta kere cu na principio nan tabata usa chopstick no pa come, sino pa cushiná cuné. Nan tabata lora pidanan di cuminda curú den blachi di mata, i nan ­tabata usa stoki pa transferí piedra cayente den e blachi. Den e manera aki por a cushiná e cuminda sin cu e koki ta kima! Mas despues den historia, nan tabata usa chopstick pa saca pida cuminda for di wea na candela.

Probablemente nan a traha e promé-promé chopsticknan di palu cu ta daña lihé of bambu. * Esei ta un motibu pakico ta casi imposibel pa bisa cu exactitud na ki tempu a cuminsá usa nan. Tin hende ta kere cu tabata usa chopstick na China for di tempu dje dinastia Shang (rond di siglo 16 pa siglo 11 P.E.C.). Un documento histórico djis despues di tempu di Confucio (551-479 P.E.C.) ta papia di ‘piki’ cuminda for di sopi, loke ta indicá cu nan a usa un tipo di chopstick.

Aparentemente ya na principio dje dinastia Han (206 P.E.C. pa 220 E.C.), come cu chop­stick a bira un práctica comun. Den un graf dje periodo ei cu nan a coba saca na Changsha, Provincia Hunan, nan a haña un set di artículo pa come cuné vernisá, incluso chopstick.

Hende hapones, koreano, vietnames i otronan den Oriente tambe ta usa chopstick, i pa gran parti esaki ta debí n’e influencia di cultura chines.

[Nota]

[Plachinan na página 15]

Bira experto dor di practicá