Awor Nan Ta Admiti Intolerancia Religioso

DJE CORESPONSAL DI SPIERTA! NA GRAN BRETANIA

“OBISPUNAN Ta Lamentá ‘Crímennan Teribel’ di Reina Mary,” tabata titular dje korant británico Catholic Herald di 11 di december 1998. Obispunan católico romano di Inglatera i Gales a reconocé cu “inhusticianan teribel a ser hací den nomber di religion católico, por ehempel, contra protestantnan durante e tempu di Reformacion na Gran Bretania.” Ken tabata reina Mary? Ki malu el a haci cu a pone obispunan admití algu asina? I di con e obispunan di Inglatera i Gales a scoge pa saca nan declaracion awor aki?

Mary Tudor a nace na aña 1516 na Inglatera, un pais católico romano. Como e único yu cu a keda na bida di Catherine di Aragon, promé esposa di rey Henry VIII, Mary su mama a lant’é como un católico deboto. Su tata tabata kier un heredero homber, pero Catherine no a haña yu homber. Como cu papa a nenga di anulá Henry su matrimonio cu Catherine, el a tuma asuntunan den su mes man, i asina a prepará e caminda pa e Reformacion protestant na Inglatera. Na aña 1533 Henry a casa cu Anne Boleyn, cuater luna promé cu arsobispu di Canterbury, Thomas Cranmer, a declará su promé matrimonio inválido.

 E siguiente aña, un Henry rebelde a kibra tur laso cu Roma i nan a hacié cabes supremo dje Iglesia di Inglatera. Mary, cu awor a ser considerá un yu ilegítimo, no a mira su mama nunca mas, como cu nan a forsa Catherine p’e pasa e resto di su bida isolá for di bida público.

Intolerancia Protestant

Durante e siguiente 13 añanan, nan a laga mata algun hende cu a nenga di reconocé Henry como cabes di iglesia of cu ainda tabata aceptá e autoridad di papa. Henry a muri na aña 1547 i Edward di nuebe aña, su único yu homber legítimo cu e tabatin cu e di tres di su seis casánan, a subi trono. Edward i su conseheronan a purba haci Inglatera protestant. Nan tabata persiguí católiconan romano pa motibu di a practicá nan religion, i nan a kita tur imágen i altar for di den misa.

No a tarda hopi cu nan a eliminá e restriccionnan pa imprimí i lesa Bijbel na ingles, i sirbishinan di misa cu tabatin lesamentu di Bijbel mester tabata na ingles en bes di na latin. Pero na aña 1553, Edward a muri di tuberculósis ora e tabatin solamente 15 aña. Nan a considerá Mary como e sucesor legal i el a bira reina di Inglatera.

Intolerancia Católico

Na promé instante, hende tabata contentu cu Mary di 37 aña, pero no a tarda muchu cu el a bira impopular. Su súbditonan a custumbrá cu protestantismo, i awor Mary tabata decididu pa haci e pais católico romano atrobe. Den un tempu corticu, el a revocá tur e statutonan religioso di Edward. Mary a busca pordon di papa pa henter e nacion. Un biaha mas, Inglatera a bira católico romano.

E reconciliacion cu Roma, na su turno, a iniciá un ola nobo di persecucion contra protestantnan. A compará nan cu blufein maligno cu mester a corta saca afó promé cu e afectá henter e curpa. Hopi hende cu a nenga di aceptá e siñansanan di Iglesia Católico Romano a ser kimá bibu na staca.

Ta Castigá Herehenan

E promé cu nan a mata durante e reinado di Mary tabata John Rogers. El a compilá loke ta conocí como e Bijbel di Mateo, cu a forma e base pa King James Version. Despues cu el a predicá un sermon anti-católico romano, spiertando hende contra “papismo perhudicial, idolatria i supersticion,” nan a encarcel’é pa un aña, i na februari 1555 nan a kim’é na staca como herehe, esta, como unu cu a nenga e fe católico.

John Hooper, obispu di Gloucester i Worcester, tambe a ser catalogá como herehe. El a declará cu tabata legal pa miembronan di clero casa i cu divorcio a base di adulterio ta permisibel. Tambe el a nenga cu Cristo tabata físicamente presente durante santu sacrificio di misa. Nan a rooster Hooper bibu, i su morto agonisante a dura casi tres cuart’i ora. Ora tabata turno pa e domi protestant Hugh Latimer di 70 aña bai candela, el a animá Nicholas Ridley, su colega di reformacion i víctima na staca huntu cuné, cu e palabranan: “Consolá bo, señor Ridley, i actua manera homber. Cu gracia di Dios, riba e dia djawe nos lo cende asina un bela den Inglatera, cu mi ta spera nunca lo ser pagá.”

Thomas Cranmer, e promé arsobispu protestant di Canterbury bou di mando di Henry i Edward, tambe a ser condená como herehe. Aunke el a renunciá su creencianan protestant, na último momento el a cambia bek públicamente, i a denunciá papa como enemigu di Cristo, i a hinca su man drechi den candela p’e kima promé, ya cu e man drechi tabata culpabel di a firma su renuncia.

Aunke por lo ménos 800 protestant ricu a  hui bai den exterior, durante e próximo tres aña i nuebe luna te na morto di Mary, nan a kima por lo ménos 277 persona na staca na Inglatera. Hopi víctima tabata hende comun i coriente cu a keda totalmente confundí en cuanto kico nan mester kere. Hóbennan a lanta ta tende hende denunciá papa i awor ta castigá nan pa motibu di a papia contra papa. Otronan a siña lesa Bijbel pa nan mes i a forma nan propio opinion religioso.

E morto lento i agonisante di homber, muher i mucha cu a ser kimá na staca a hororisá hopi hende. Historiadó Carolly Erickson ta describí un esena típico: “Demasiado biaha e palu pa candela tabata berde, of e yerba pa cende e candela tabata muchu muhá pa kima lihé. E sacunan di polbu mará na e víctimanan pa reducí nan agonia, no tabata pega candela, of tabata mutilá nan sin mata nan.” Nan no tabata tapa boca dje víctimanan, di manera cu “por a tende nan gritu i oracionnan hopi bes te ora cu nan a muri.”

Un cantidad creciente di hende a cuminsá duda den un religion cu tabatin cu kima hende na staca pa pone otronan obedecé su siñansanan. Un ola di simpatia pa e víctimanan a pone compositornan di balada componé canticanan tocante mártirnan protestant. John Foxe a cuminsá compilá su Book of Martyrs (Buki di Mártir), cu despues tabatin casi mes tantu influencia cu Bijbel riba e reformadónan protestant. Hopi hende cu tabata católico romano na principio dje reinado di Mary a bira protestant na final di su reinado.

E Herencia di Mary

Despues di a bira reina, Mary a bisa cu lo e casa cu su primu Philip, heredero dje trono di Spaña. E tabata un rey stranhero i un católico romano ferviente, e último cos cu hopi ingles tabata kier. Un lantamentu protestant cu nan a organisá pa protestá contra e matrimonio, a fracasá i nan a ehecutá 100 rebelde. Philip cu Mary a casa dia 25 di juli 1554, maske nunca no a coroná Philip. Pero nan matrimonio sin yu, tabata un fuente di angustia pa Mary, kende tabata kier un heredero católico romano.

Mary su salú a bai atras, i despues di un reinado corticu di cincu aña, el a muri na edad di 42 aña. El a muri yen di pena. Su casá a cansa di dje, i mayoria di su súbditonan a odi’é. Ora el a muri, hopi habitante di Londen a tene fiesta den caya. En bes di reedificá catolicismo romano, su fanatismo a avansá e movementu protestant. E nomber pa cua e ta conocí ta resumí su herencia: Bloody Mary (Mary Sangriento).

Concenshi Mal Motivá

Di con Mary a manda kima asina tantu hende? Nan a siñ’é cu hende cu nenga e fe católico tabata traidor di Dios, i el a pensa cu su deber tabata di caba cu nan influencia promé cu nan infectá henter e nacion. El a scucha na su concenshi, pero a ignorá derecho di otro hende, kende nan concenshi a dirigí nan den un otro direccion.

Sin embargo, e protestantnan tabata mésun intolerante. Bou di mando di Henry i Edward, tambe nan a kima hende pa motibu di nan creencianan religioso. Mary su sucesor protestant, Elizabeth I, a pasa ley cu a haci practicá catolicismo romano un crímen di traicion contra estado, i durante su reinado nan a ehecutá mas cu 180 ingles católico romano. Durante e siguiente siglo, cientos di hende mas a muri pa motibu di nan opinion religioso.

Pakico Pidi Despensa Awor?

Dia 10 di december 1998, tabata e di 50 aniversario dje Declaracion Universal di Derechonan Humano di Nacionnan Uní. Artículo 18 ta reconocé “e derecho di libertad di pensamentu, concenshi i religion,” incluso e libertad di cambia bo religion i di instruyé i practik’é. Obispunan católico romano di Inglatera i Gales a scoge e di 50 aniversario como “un ocasion apropiado pa católiconan examiná nan concenshi den e asuntunan aki” i pa reconocé e “inhusticianan teribel” cometé, foral den tempu di Mary Tudor.

Aunke awor nan ta lamentá actonan di intolerancia religioso di casi 450 aña pasá, realmente cos a cambia? Nan no ta kima hende na staca mas, pero hopi asina yamá cristian ta sigui violá i mata esnan di otro religion. E intolerancia ei no ta agradá Dios. Sí, Jesucristo, esun cu ta reflehá Dios su personalidad perfectamente, a declará: “Dor di esaki tur lo sa cu boso ta mi disipelnan, si boso tin amor entre boso.”—Juan 13:35.

[Plachi na página 12]

Reina Mary

[Rekonosementu]

For dje buki A Short History of the English People

[Plachi na página 13]

A kima Latimer i Ridley na staca

[Rekonosementu]

For dje buki Foxe’s Book of Martyrs

[Plachi na página 13]

Cranmer ta haci sigur cu su man drechi ta kima promé

[Rekonosementu]

For dje buki History of England (Vol. 1)

[Rekonosementu pa Potrèt na página 12]

Rand: 200 Decorative Title-Pages/Alexander Nesbitt/Dover Publications, Inc.