Tuma Aspirin Tur Dia—Mi Mester Hacié of No?

Lo siguiente ta un situacion di bida real describí pa un dokter. Lamentablemente e ta reflehá un problema frecuente.

HENTER e famia tabata preocupá. Awor asta e dokter tabata preocupá. “Si su sangramentu no stop lihé, nos lo tin cu pensa riba un transfusion di sanger,” e dokter di.

E homber tabatin vários siman ta perde sanger poco-poco via tripa, i dokter a diagnosticá e problema como un inflamacion di stoma, esta, gastrítis. Frustrá, e dokter a puntr’é: “Bo tin sigur cu bo no ta tumando ningun remedi?”

“No. Solamente e cos natural aki pa artrítis cu nan ta bende sin recept,” e homber a contestá.

Di ripiente e dokter su oreanan a lanta para. “Laga mi wak e.” Analisando e etiket di ingrediente cuidadosamente, dokter a haña loke e tabata busca. Acetylsalicylic acid! (Aspirin) Problema solucioná. Ora e pashent a stop di tuma e remedi cu a contené aspirin i dokter a dun’é heru i algun remedi pa cura stoma, e sangramentu a stop i poco-poco su sanger a subi bek i bira normal.

Sangramentu Provocá dor di Remedi

Sangramentu di stoma of di tripa causá dor di remedi ta un problema médico serio awe. Aunke e por implicá hopi remedi, mayoria dje problemanan ei ta bini di remedinan cu hende ta usa pa artrítis i pa dolor. Esakinan ta incluí un tipo di remedi yamá NSAIDS (remedinan antiinflamatorio sin esteroide). E nombernan por varia di un pais pa otro.

Bo ta haña aspirin den hopi remedi cu ta bende sin recept, i den añanan recien, den hopi pais tabatin un aumento den e cantidad di hende cu ta usa aspirin tur dia. Di con?

Entusiasmo pa Aspirin

Na 1995, Harvard Health Letter a informá cu “uso rutinario di aspirin ta salba bida.” Citando vários estudio mundial, cu dje tempu ei padilanti a ser ripití hopi bes, investigadónan a concluí: “Casi tur hende cu a yega di haña un atake di curason of hersenbloeding, cu ta sufri di angina, of cu a haci un operacion di ‘bypass’ di ader di curason, mester tuma mitar te un tablet di aspirin pa dia, a ménos cu nan ta alérgico p’e.” *

Otro investigadónan ta bisa cu ta beneficioso pa tantu hende homber como hende muher riba 50 aña, cu ta core riesgo di haña un atake di curason, tuma un aspirin tur dia. Ademas, tin estudionan cu ta indicá cu un aspirin pa dia por reducí e riesgo di cancer di tripa, i cu cerca diabéticonan dósisnan grandi tumá durante un periodo largu di tempu por baha nivel di sucu den sanger.

Con aspirin ta traha pa duna e beneficionan deseá aki? Aunke expertonan no sa tur cos ainda, evidencia ta indicá cu aspirin ta haci plaketa den sanger ménos pegahoso, i asina ta stroba formacion di klompi di sanger. Aparentemente, esaki ta yuda prevení cu e adernan chikitu cu ta bai e curason i celebro ta blokea, i den e manera aki ta prevení daño na órganonan vital.

Si aspirin tin tur e supuesto beneficionan  aki, di con tur hende no ta tum’é? Un motibu ta cu ainda tin hopi cos cu no ta conocí. Asta cua ta e dósis ideal no ta dje cla ei. Recomendacionnan ta varia for di un tablet normal dos bes pa dia, te na un aspirin di mucha cada dia pasa. E dósis pa hende muher mester ta distinto for di esun pa hende homber? Dokternan no sa sigur. Aunke por considerá aspirin cu ta larga den tripa (enteric-coated) un poco mas útil, ainda tin controversia riba e bentaha di aspirin prepará cu antiácido (buffered).

Motibunan pa Cautela

Aunke técnicamente aspirin ta un substancia natural—indjannan mericano tabata saca componente di aspirin for di casca di un palu di wilg—e tin hopi efecto secundario. Fuera dje echo cu e ta causa problema cu sangramentu den algun hende, tin hopi otro posibel complicacion cu aspirin ta causa, entre nan, reaccion alérgico cerca hende cu ta sensitivo pa aspirin. No tin nodi bisa cu no ta tur hende por usa aspirin tur dia.

Sin embargo, un hende cu ta core riesgo di haña atake di curason of hersenbloeding of cu tin factornan significante di riesgo, lo por puntra su dokter tocante e riesgo i beneficionan di usa aspirin tur dia. Claro cu e pashent lo kier haci sigur promé cu e no tin problema cu sangramentu, ni ta alérgico pa aspirin, ni no tin problema di stoma of di tripa. Promé cu cuminsá cu e terapia di aspirin, mester repasá cu dokter otro posibel problemanan of con e ta bai cu otro remedi.

Manera nos a mencioná promé, aspirin i remedinan cu parce aspirin ta carga e riesgo grandi di sangramentu. I e sangramentu ei por ta sutil, kisas e no ta bisto mesora i ta acumulá poco-poco atrabes di tempu. Mester considerá otro remedinan tambe cu cuidou, foral otro remedinan antiinflamatorio. Haci sigur di bisa bo dokter si bo ta usa cualkier di nan. Den mayoria caso lo ta sabí pa stop di usa e remedi promé cu operacion. Kisas ta bon pa asta chek bo nivel di sanger regularmente na laboratorio.

Si nos kier protehá nos mes di problema den futuro, nos lo haci caso dje proverbio bíblico: “Spiertu ta esun cu a mira e calamidad i a sconde su mes, pero esun inexperto a sigui padilanti i mester sufri e castigu.” (Proverbionan 22:3) Den e asuntu médico aki, laga nos ta entre esnan spiertu cu no ta sufri castigu debí na nos salú.

[Nota]

[Kuadro/Plachi na página 18, 19]

Ken Lo Por Considerá pa Tuma Aspirin Tur Dia

● Hende cu tin malesa di ader di curason of ader blokeá den nek.

● Hende cu a haña atake celebral trombótico (e tipo causá dor di klompi di sanger) of un atake iskémico pasahero (un episodio breve di algu cu parce atake celebral).

● Hende homber riba 50 aña cu un of mas dje siguiente factornan di riesgo pa malesa cardiovascular: ta huma, preshon haltu, diabétis, colesterol haltu, colesterol HDL abou, demasiado gordo, ta bebe hopi alcohol, den famia tin hende cu a haña malesa di curason trempan (atake di curason promé cu 55 aña) of atake celebral, i un bida di sinta hopi.

● Hende muher riba 50 aña cu dos of mas dje factornan di riesgo ei.

Lo bo kier consultá bo dokter promé cu tuma cualkier decision den e asuntu aki.

[Rekonosementu]

Fuente: Consumer Reports on Health