Ta Tempu pa un Cama Nobo?

Dje coresponsal di Spierta! na Gran Bretania

Bo ta drumi hopi bes malu anochi, ta blo boltu i drei den un intento pa haña un posicion cómodo, anto mainta bo ta lanta tur stijf i due? Si ta asina, e problema lo por ta bo cama.

E MUEBLE aki por ta bo amigu of bo enemigu. Si bo ta biba den un pais cu hende ta usa cama, probablemente lo bo pasa un tercer parti di bo bida ta sosegá riba unu, pero bo cama lo no dura pa semper. E cama cu bo tin awor akí ta sirbi bo bon?

Bo Mester di un Cama Nobo?

Normalmente un cama ta duna bon servicio pa un dies aña asina. Un persona mas pisá kisas ta gasta un cama mas lihé. Tene na mente tambe cu segun bo edad ta subi, bo preferencia i necesidadnan ta cambia. Pa dicidí si bo mester di un cama nobo of no, haci bo mes e preguntanan aki. ‘Mi ta lanta mainta cu garganta stijf of cu dolor di lomba? Mi cama ta muchu chikitu? Mi por sinti spring of bulto den e cama? Mi ta tende zonido di krak of pip ora mi move? Ami cu mi casá ta lora bin cerca otro sin cu nos kier? E base no ta pareu of ta sak? E pia of wielnan ta gastá?’ Bo contesta riba e preguntanan aki por yuda bo determiná si ta tempu pa cumpra un cama nobo.

Kico Ta un Bon Cama?

Un bon cama ta duna bo comodidad i sosten, di acuerdo cu bo necesidad i preferencianan en particular. Mayoria cama ta consistí di un matras i un frame pa cargu’é, pero ta e matras ta e clave pa bo comodidad. E tin vários componente. Promé bo ta haña e furu djafó (‘ticking’) cu ta tene tur cos huntu. Despues ta sigui vários capa di furu diki pa wanta bo i pa permití humedad di curpa sali. E di tres seccion, cu ta soru pa e sosten i firmesa, por lo general ta contené coil di stal fortificá of spring. Tin vários forma di sosten den e matras, pero como un regla general, mas spring e tin i mas diki e waya cu usa, mihó e sosten ta. E tempunan aki un alternativa popular ta e matras di poliuretano, esta di foam di rubber; e ta mas leve cu esnan cu tin spring den nan.

Sin embargo, un bon matras ta funcioná bon solamente si e tin un base adecuá, por lo general esun cu nan a traha pa pas cuné. Hopi bes nan ta bende un ‘slaapbank’ como set, un matras i su base. E base hundu cu parce un caha, ta funcioná mescos cu un shock absorber grandi, i ta permití e matras hala rosea i dje manera ei ta prolongá su bida bastante. Un otro opcion ta cama di lata. Por lo general e tin un base di lata i ta habrí bou di dje, loke ta permití un bon ventilacion pa e matras cu  ta pas cuné. Latanan sólido ta soru pa un base firme, miéntras cu latanan di spring ta mas flexibel.

Scogiendo e Cama Corecto

Kico bo mester tene na mente ora di cumpra un cama? Un cama segunda mano lo a absorbá sodó i casca di cueru di otro hende i kisas ta yen di insecto di stòf cu lo por ocasioná reaccion alérgico, asma of ecsema. Tambe por ta cu e no ta cumpli cu normanan di salubridad of di siguridad.

Promé cu bo bai cumpra un cama nobo, ta recomendabel pa bo dicidí kico ta bo prioridadnan, manera e prijs, consideracionnan di salú of tamaño general. Purba apartá basta tempu pa bishitá mueblerianan di bon reputacion, i pidi mas tantu informacion posibel tocante cada cama of matras. Como cu hopi bes cama ta costoso, no laga hende pura bo pa tuma un decision.

Si bo ta cansá, ta mas difícil pa bo tuma un decision corecto. Bisti paña cómodo. No sinti bergwensa di test un cama. Kita bo bachi i sapatu i cai drumi riba cada cama pa vários minuut. Purba vários posicion di drumi, i paga tinu foral n’e sosten cu e cama ta duna bo scouder, heup i parti abou di bo lomba.—Mira e cuadro abou.

Cuido di Bo Cama

Bon cuido di bo cama definitivamente ta prolongá su duracion. Pidi e persona cu a bende bo e cama conseho, i tuma tempu pa lesa e instruccion cu e fabricante ta duna pa cuid’é. Ora bo bin cas cu bo cama nobo, kita e plestik cu e ta lorá aden mas pronto posibel. Esaki lo yuda p’e no soda, loke ta causa  humedad, beskein i putrimentu. Ata’kí un par di sugerencia mas.

● Pa e promé par di lunanan, boltu un matras di spring nobo tur siman of cada dos siman di banda pa banda i di cabes pa pia, i despues sigui haci esei cada tres luna. Esaki lo yuda e reyeno sinta bon i lo sigurá cu e matras ta gasta tur caminda pareu. Si bo tin problema cu lomba, ta bale la pena considerá un matras di foam, ya cu no tin nodi boltu esei cu regularidad.

● Nunca no dobla, lora cera of plecha un matras. Pa evitá di daña e tela, usa e mannan djis pa posicion’é, no pa carga henter su peso.

● Tur mainta, hala e paña di tapa un banda pa por lo ménos 20 minuut pa asina bo cama por coge aire i pa permití e humedad di curpa evaporá.

● Mantené bo matras limpi dor di usa protector di matras cu bo por laba. Stofzuig tantu e matras como e base regularmente pa kita stòf i pluisje, i limpia mancha i cos cu basha riba cama mesora cu un habon suave i awa frescu.

● Purba pa no sinta tur biaha na mésun lugá n’e rand dje matras. No laga mucha ni niun otro hende bula riba cama.

Bo cama ta hopi mas cu un inversion di placa. E ta un inversion den un tercer parti di bo bida, locual por tin un efecto riparabel riba e sobrá dos tercer parti. Si bo scoge bo cama den un manera sabí i cuid’é, lo e soru bon pa bo.

[Kuadro na página 22]

Cua Cama Ta Bon pa Bo?

Comodidad i sosten. Un matras no mester ta mes duru cu un tabla pa e ta bon pa bo. De echo, nan ta pensa cu un cama muchu firme por empeorá problema di lomba. Laga bo curpa bisa bo cua ta sinti mihó. Cai drumi riba bo lomba. Si bo por pusha bo man den e hol di bo lomba di manera cu bo man ta keda cómodo i bo por boltu fácilmente, e matras tin e firmesa apropiado pa bo. Un matras cu tin bon sosten, mester laga bo wes’i lomba keda den un liña stret ora bo drumi di banda. Un persona mas pisá lo tin mester di un cama mas firme.

Tamaño. Scoge un cama cu ta laga bo move libremente. Si ta dos hende ta bai drumi riba e cama, tene na mente cu si dos adulto ta drumi riba un cama di dos persona tamaño standard, cada un lo tin e mésun cantidad di espacio cu un baby den un wieg.

Set cu ta pas. Si ta posibel, cumpra un matras i base cu ta pas cu otro i cu ta diseñá pa traha huntu pa bo comodidad i sosten. Un base bieu por daña un matras nobo, i tambe afectá su garantia.

Balor. Hopi bes bo ta haña conforme loke bo paga p’e, pues cumpra e cama di mihó calidad cu bo por aford.

Espacio. Si bo espacio ta limitá, por ta bale la pena considerá un cama cu ta habri cera (cama di muraya), i cu ta dobla bai den un kashi. Un otro posibilidad ta un colchoneta, un cusinchi trahá di vários capa di catuna cu bo por habri lihé riba flur anochi. Tin biaha ta bende colchoneta tambe como cama sofá cu frame di lata cu ta convertible.

Problemanan di salú. Si bo no ta drumi cómodo den un cama tradicional, un cama ahustabel ta ofrecé un variedad di diferente posicion di drumi. Un cama di awa ta sostené i distribuí e peso di curpa den un forma igual, i lo e por yuda esnan cu ta drumi malu pasobra nan adernan ta primi riba wesu.

eHende cu ta sufri di alergia. Si bo ta alérgico pa stòf of reyeno natural, un matras cu ta contené fibra sintético of foam por ta un bon alternativa. Tambe ta bon pa bo tuma nota cu substancianan cu ta causa alergia no ta acumulá fácilmente den un cama cu base di lata of cama di awa.

Hende di edad. Haci sigur cu bo plant’i pia por mishi cu suela ora bo sinta na rand di bo cama. Un base cu rand firme lo haci mas fácil pa bo subi i baha for di cama den e posicion sintá aki.

[Kuadro na página 23]

Sugerencianan di Siguridad

▪ Bisti paña di drumi di tela cu ta resistí candela.

▪ Haci sigur cu paña di cama ta leu di candela i verwarming.

▪ Chek klechi di coriente regularmente pa wak si e tela no ta frañá, si e no tin doblá hundu, marca di kimá i cabuya di coriente gastá. Nunca usa e klechi ora e ta muhá, mas bien lagu’e seca di su mes. No pone cos pisá riba cama ora e klechi ta cendí.

▪ No yena botter cu awa cayente, ni no us’é cu un klechi di coriente. Kit’é promé cu un mucha subi cama.

[Kuadro na página 23]

(Pa e teksto den su formato kompleto, wak e publikashon)

Furu djafó of ‘ticking’

Bordá forma di diamanta

Bordá via computer

Bordá cu boton

Capanan di furu diki

Sosten di paden

Foam

Spring zigzag di un solo waya

Spring habrí

Spring den sacu apart

[Rekonosementu]

Reproducí pa cortesia di Sleep Council

[Rekonosementu pa Potrèt na página 21]

Reproducí pa cortesia di Sleep Council