Un Bishita n’e “Stad Mas Bieu di Rusia”

AMI cu mi casá, Linda, a yega Moscú na juli 1998 pa trabou. Nunca nos no a bai Rusia, i nos tabata ansioso pa siña conocé e pais, su idioma i su pueblo.

Djis despues cu nos a yega, mi a ripará un potret intrigante parti patras dje cen di papel berde di cincu rubel. E potret a mustra algu cu a parce un forti di siglo 14 of 15 trahá di bloki, cu bista riba un riu, anto cu un isla i un lago den fondo. Grabá den skina tabatin nomber dje lugá: Novgorod.

Mi a puntra e moscovitanan tocante e stad. Nan tur tabata sa di Novgorod, pero ta un hende so cu mi a puntra en berdad a yega di bai einan. Nan a bisa mi cu e tabata ménos cu 550 kilometer for di Moscú i cu bo por bai cu trein djanochi yega mainta, den e mésun direccion cu St. Petersburg. Ami cu mi casá a dicidí di bai.

Nos Biahe pa Novgorod

Como cu mi a yega di cumpra karchi di trein pa St. Petersburg, mi tabata sa unda pa cumpra nan. Riba nos karchi tabatin e number di nos wagon di trein i e compartimentu. Nos a yega n’e stacion di trein un poco despues di nueb’or djanochi september aña pasá, i a haci nos mes cómodo den nos compartimentu privá den wagon number 5.

Bou di keñamentu i manera cos cu ta resistí, e wagon a bula bai dilanti. Asina e trein a keda haci henter anochi, ya cu tabata un trein cu ta stop na tur parada. Nos tabata stop, i despues di algun minuut, un otro trein tabata pasa forbij cu hopi bochincha. Un par di minuut mas a pasa miéntras nos tabata warda riba un spoorban na banda den e silencio djanochi. Caba nan ta los e brakenan, i nos wagon tabata protestá, suspirá, keña i, al final, sigui e resto dje trein. E ora ei mi tabata bolbe pega soño.

E supervisora dje wagon a bati na nos porta djis promé cu nos a yega Novgorod. E stacion di trein tabata druk, asta e ora shet’or di mainta ei. Na un kiosko, nos a haña un mapa dje stad i tambe nos a puntra e bendedó cuantu un taxi lo cobra pa hiba nos hotel. Pa 20 rubel (mas o ménos ƒ1,25) e shofer di taxi den su Lada ruso a hiba nos na nos hotel, otro banda dje riu Volkhov, e riu riba e potret.

E shofer a conta nos cu e no tabata ruso pero su casá sí. Ta p’esei e ta biba na Rusia. E recepcionista na hotel a yama nos bon biní i a asta laga nos chek-in, maske tabata mitar di  ocho so di mainta. El a duna nos algun idea unda pa bai. Nos a bai cana cantu dje riu i despues a desayuná.

Nos a mira un parke cu yerba nèchi cortá i cu palunan di snui. E bulevard a lo largu dje riu tabata espléndido cu camanan di flor decorativo. Aunke tabatin turista—de bes en cuando un bus grandi di fabricacion koreano tabata pasa cu un grupo riba tour—Novgorod no ta un stad di turista. Mayoria hende cu nos a mira einan tabata ruso.

Vários habitante local a bisa nos cu Novgorod tabata e stad mas bieu di Rusia. Segun informe e ta mas cu 1.100 aña bieu. Decenas di misa bieu na tur parti dje stad ta un testimonio di su patrimonio religioso. Riba un mapa, Linda a conta 25 misa den e área dje hotel so.

Nos a haña un toren paden dje kremlin—no e Kremlin na Moscú; “kremlin” ta e palabra ruso pa “forti di stad.” Bo por a subi e toren bai te den top. Pa 5 rubel (ménos cu 40 cen), nan a laga nos subi e trapinan den forma di spiral bai te den e top. Mi a compará e bista cu e potret riba e cen di papel di cincu rubel. E matanan a crece, i nan a pone dak riba e caminda di cana riba muraya dje kremlin. Sin embargo, e riu Volkhov tabat’ei, e mésun riu i e mésun isla i lago den fondo. Ta  e kran cu tabata cobando den e riu so no tabata riba e potret riba e cen di papel.

Riba nos segundo dia na Novgorod, nos a ripará un cos remarcabel. Rusonan ta considerá e stad chikitu i apesar di su 250.000 habitantenan, e hendenan dje stad a keda corda nos i detayenan chikitu tocante nos! E waitress na hotel a corda nos dje dia promé. El a corda cu nos a gusta kofi, i el a keda trece kofi pa nos. Tambe el a corda cu nos no tabata kier djus i p’esei e di dos dia e no a puntra nos si nos kier. Ora mi a pidié e cuenta, Olga—mi ta corda su nomber—mirando mi stret den mi cara, a smile i a bisa: “Ta kamber 356, tog?”

Diadomingo tabatin miles di hende n’e kremlin, n’e brug pa peaton cu a crusa riu Volkhov, den e cayanan i n’e bulevard. Linda a bai cumpra popcorn cerca un bendedó riba caya cerca dje brug pa peaton, cu—sí, bo a rei bon!—a cord’é dje dia promé.

Ora nos a bai subi e toren pa mira e bista un biaha mas, e mucha muher cu tabata cobra entrada a smile cu nos i a bisa: “Boso tabata aki ayera, no ta asina? Wel, boso a paga ayera caba, boso no tin nodi paga atrobe.”

Nos a contra cu David, un amigu cu nos tabata conocé añanan pasá na New York. El a casa cu un mucha muher ruso, Alyona, i awor nan ta biba na Novgorod, sirbiendo como predicadó huntu cu un congregacion di Testigonan di Jehova. Nos a topa dilanti Restaurant Detinets, cu nan a traha den e muraya te ariba dje kremlin. Ei nan a sirbi nos e mihó cuminda ruso cu nos a yega di come. Un cuminda di tres plato (salada, sopi, plato principal, kofi i dessert) a parce nos basta barata.

Novgorod tabata un stad cu hende amabel cu a corda nos, excelente cuminda, i cu net suficiente historia i variedad pa hacié interesante. Nos lo bolbe bai.—Contribuí.

[Plachinan na página 22, 23]

E cen di papel ruso di cincu rubel, i un potret dje mésun bista di Novgorod

[Plachi na página 23]

E kremlin, mirá for di riu Volkhov

[Plachi na página 24]

Crusando un brug pa peaton riba riu Volkhov

[Plachi na página 24]

Pa siglonan religion tabata prominente na Novgorod