Yudansa pa Sali for di Delincuencia

DJE CORESPONSAL DI SPIERTA! NA FRANCIA

SUCESONAN recien a saca na cla un colapso alarmante di ley i órden den hopi bario pober di stadnan na Francia. Segun e revista frances L’Express, den “seis aña violencia urbano a bira casi cincu biaha mas tantu.” Es mas, e cantidad di menornan di edad enbolbí den crímen violento a aumentá drásticamente.

Ademas di participá den vandalismo, bendementu di droga, extorsion, pegamentu di candela i ladronicia, delincuentenan ta concentrando directamente riba representantenan di gobiernu. Polis, bombero i empleadonan di transporte público, ta entre esnan cu regularmente ta ser sometí na agresion violento.

Di con tin asina tantu violencia? Dos sociólogo ta splica: “Cu e colapso di bida di famia den fondo, esei ta un rebeldia contra tur loke e autoridadnan ta representá.” Tambe nan ta mencioná “e sintimentu [dje hóbennan] cu e autoridadnan a bandoná nan” i cu nan no tin ningun “perspectiva di un futuro cu propósito.”

Cu regularidad Testigonan di Jehova ta predicá Bijbel su mensahe di speransa den áreanan caminda tin hopi delincuencia. Den un programa recien na television frances, un reportero a comentá: “Testigonan di Jehova ta pasa den tur suburbio i barionan pober—áreanan cu tin biaha ta parce cu nan a ser bandoná asta pa servicio social, polis i e república. Den e edificio i cayanan aki, nan ta papia i nan ta scucha.” Nan trabou tin un impacto positivo, manera e siguiente carta di un hóben lector di Spierta! ta observá.

“Lo mi kier gradicí boso di henter mi curason pa boso publicacionnan. Boso no solamente a yuda ami personalmente, sino tambe mi relacion cu mi mayornan a drecha. Mi tin 16 aña so i ta di orígen moslim.

Loke mi kier bisa ta cu boso a logra saca mi for di delincuencia, cu e resultado cu awor mi ta actua mas di acuerdo cu mi religion, pero tambe mi ta lesa Bijbel. Danki na boso, mi ta bai scol atrobe. Es mas, boso a yuda vários hende den mi bario sali for di delincuencia via boso revistanan cu mi ta fia nan tur luna. Mi ta masha gradicidu na boso i mi ta sinti cu mi debe boso hopi.”