“Boso A Skirbi Tocante Mi Bida!”

Atrabes di añanan, Spierta! a publicá artículonan relacioná cu vários malesa. Claro cu Spierta! no ta un revista di salú, pues e no ta promové un tratamentu riba e otro. Tog, ora di considerá un malesa, e revista aki ta haci esfuerso pa describí e problema, identificá su causanan i duna conseho bíblico i práctico na beneficio di esnan cu ta sufri dje malesa i esnan cu ta cuida nan.

Por ehempel, a publicá e artículo “Comprendé i Biba cu Fibromyalgia” den e edicion spañó di 8 di juni 1998, i el a lanta masha hopi reaccion rond mundu. Sí, asta nos a ricibí cartanan di aprecio hopi luna despues cu a publicá e artículo. Un señora a skirbi: “Mi ta sinti como si fuera nan a kita un ceru for di riba mi lomba.” Un otro a skirbi: “Tabata como si fuera boso a skirbi tocante mi bida!,” i el a agregá: “Awor mi sa con pa trata cu e malesa aki.”

Profesionalnan tambe a apreciá e artículo. E vicepresidente principal di asuntunan médico dje Fundacion Artrítis na Merca a skirbi: “Mi ta haña cu e artículo tocante fibromyalgia ta balansá, completo i hopi bon. Tambe mi ta aplaudí cu boso a hinca citanan bíblico den e artículo i a mustra e importancia di fe den e condicion aki i den tur otro condicion médico.”

Nos a haña hopi otro carta mas. Aki ta sigui porcion di algun.

“Mi dokter a animá mi pa lesa tur loke mi por haña tocante e tópico. Boso artículo tabata e mihó cu mi a lesa.”—L. R.

‘Hopi hende a yega di puntra mi tocante mi malesa. Por lo general mi tabata duna nan un pamfleta. Awor mi por dirigí nan n’e edicion aki di Spierta! No tin absolutamente nada mas consolador!’—K. K.

‘E artículonan a duna mi e siguransa cu mi no ta un fracaso i cu ainda Jehova ta considerá mi di balor.’—D. C.

“Mi a sinti como si fuera, pa promé biaha, tin otro hende eifó ta comprendé kico mi ta pasando aden.”—C. H.

‘Ta un consuelo pa sa cu nos no ta sufri nos so.’—C. A.

‘Mi ta sinti mi hopi malu cu mi no por haci loke mi tabata haci. Lo mi warda e artículo aki cant’i mi cama pa mi por les’é bes tras bes ora mi mester di animacion.’—K. B.

‘Te cu awor mi tabata ignorá e dolor mas tantu posibel, haciendo lo mas cu mi por, i despues cai den otro. Boso manera ta parce un mihó manera.’—M. C.

“Mi tin 14 aña, i nan a diagnosticá mi cu fibromyalgia tempu cu mi tabatin 12 aña. Awa a yena mi wowo ora mi a haña sa cu Jehova ta interesá den nos. Por fabor, sigui skirbi artículonan animador manera esun aki!”—K.A.M.