E Piramidnan di México

DJE CORESPONSAL DI SPIERTA! NA MÉXICO

MAYORIA hende awe sa dje piramidnan di Egipto. Na América tambe, arkeólogonan a descubrí hopi structura cu parce piramid, foral na México. Mescos cu nan ekivalente na Egipto, e piramidnan mexicano ta siglonan bieu i tapá den misterio.

Un piramid egipcio ta un graf cerá den un ceru simétrico di piedra. Den e ceru ei tin pasashinan cu ta hiba n’e graf, cu ta e parti mas importante dje piramid. Sin embargo, e piramid mexicano ta un monton grandi di tera cu un tempel na su top i pafó tin un trapi cu ta hiba n’e top. Cu un par di excepcion, e piramidnan hañá na América no tabata graf.

Teotihuacán—“Stad dje Diosnan”

Un dje sitionan di piramid mas sobresaliente na México ta Teotihuacán. Situá aproximadamente 50 kilometer nortoost di Ciudad di México, Teotihuacán ainda ta un misterio pa antropólogo i arkeólogo. Constructornan dje antiguo metrópolis aki a bandon’é mas cu 500 aña promé cu e cultura azteca a surgi. E nomber Teotihuacán, dje idioma nahuatl, ta nificá “Stad dje Diosnan” of “Caminda Hende Ta Bira Dios.” Expertonan ta kere cu e aztecanan a duna e stad e nomber ora nan a bishit’é.

Un dje redactornan dje revista National Geographic, George Stuart, ta splica cu “Teotihuacán tabata e promé centro realmente urbano den e Hemisferio Occidental . . . El a lanta rond di comienso dje era cristian, a existí pa un shete siglo asina i despues a para bira un leyenda. Segun cálculo, n’e culminacion di su prosperidad rond di A.D. 500, e tabatin un poblacion di entre 125.000 pa 200.000 hende.”

Casi meimei dje stad tin e gran Piramid di Solo. Su base ta midi 220 meter hanchu pa 225 meter largu i su cincu terasanan ta bai laira pa yega na su haltura actual di mas o ménos 63 meter. Pa yega na top dje piramid, bo mester subi mas cu 240 trapi. Pa nort dje antiguo stad tin e Piramid di Luna cu su top di 40 meter haltu. Un tempu tabatin tempel riba top dje dos piramidnan principal aki.

Den décadanan recien hende a siña hopi tocante e piramidnan aki. Sin embargo, manera Stuart ta expres’é, “ainda nos no sa casi nada tocante e orígen dje teotihuacanonan, ki idioma nan a papia, con nan sociedad tabata organisá i kico a causa nan caida.”

Otro Sitionan di Piramid

Den pleno curason di Ciudad di México, bo por bishitá e Tempel Principal di azteca. Aunke no tin niun piramid na bista, bo por mira ainda restonan di un structura di piramid cu tabata e base p’e Tempel Principal. Arkeólogonan a descubrí dos altar caminda nan tabata efectuá sacrificio humano.

Chichén Itzá ta un dje sitionan di piramid mas bishitá na México. Tin hopi ruina antiguo den e region di maya, pero esakinan ta esnan mas accesibel pasobra nan ta cerca dje stad di Mérida na Yucatán. Aunke nan ta trahá den teritorio maya, e structuranan ta mustra cu un tempu e indjannan tolteca tabatin influencia den e regionnan aki. Algun edificio ta duna indicacion cu e constructornan tabatin un conocimentu sofisticá di matemática i astronomia.

 Na Palenque, bishitantenan ta haña un compleho maya impresionante rondoná pa e selva di Chiapas. Entre e hopi piramid i edificionan, tin e Palacio i e Tempel di Inscripcion. E Tempel di Inscripcion “ta un dje tempelnan mas famoso di henter e region di Mesoamérica pasobra e no tabata simplemente e base pa un tempel manera tur e otronan, sino un monumento di entiero,” e buki The Mayas—3000 Years of Civilization ta splica. “Den dje tin un trapi cu ta baha bai abou n’e cuarto di graf mas magnífico cu a yega di haña den e área maya.” Nan a construí e graf ei pa un gobernadó cu a biba den siglo 7, Pacal of Uoxoc Ahau.

Esakinan ta djis un par dje piramidnan na México. Por haña otro ruina i piramidnan den hopi lugá rond e pais. Tambe tin piramidnan inmenso na Guatemala i Hondúras. Tur e antiguo structuranan aki ta mustra cu e habitantenan dje region di Mesoamérica a deseá tereno mas haltu pa traha nan lugánan di adoracion. Walter Krickeberg, autor dje buki Las Antiguas Culturas Mexicanas, a skirbi: “E custumber di traha tempel riba un base den forma di trapi ta bai bek na un antiguo adoracion di haltura.” E ta agregá: “Miéntras cu nos ta considerá shelu como un ‘dak,’ pa otro pueblonan el a representá un ceru via cua solo ta subi mainta i baha anochi; p’esei, su bandanan ta trapi-trapi manera un edificio gigantesco. Pues, e ‘ceru artificial’. . . a ser transformá den un piramid di trapi i, manera por ser deducí for di leyenda i custumbernan, el a ser combertí den un símbolo di shelu cerca hopi pueblo dje region di Mesoamérica.”

Tal bes e concepto aki ta recordá studiantenan di Bijbel dje relato bíblico tocante e Toren di Babel, situá den un stad cu despues a bira conocí como Babilonia. Génesis 11:4 ta bisa dje constructornan dje stad aki: “Anto nan a bisa: ‘Ban! Laga nos construí un stad pa nos mes i tambe un toren cu su top den shelu, i laga nos traha un nomber famoso pa nos mes.’ ” No muchu leu for dje ruinanan di Babilonia, arkeólogonan a haña structuranan di piramid conocí como zigurat.

E forma di adoracion cu a originá na Babilonia a plama na hopi parti di mundu, i probablemente el a yega n’e region cu a bira conocí como México. Lo no ta un sorpresa si e ziguratnan i tambe e religion practicá na Babilonia tabata e modelo pa e piramidnan misterioso i impresionante di México.

[Plachi na página 24]

Teotihuacán

[Rekonosementu]

CNCA.-INAH.-MEX Reproducción Autorizada por el Instituto Nacional de Antropología e Historia

[Plachi na página 25]

Palenque