E Tratamentu Cu Abo Ta Scoge

DEN su buki tocante medicina alternativo, dr. Isadore Rosenfeld a enfatisá e punto aki: “Cualkier medida of intervencion di salú cu duna un grupo di hende selectá pa casualidad i cu a ser sigurá cu e tratamentu lo ‘funcioná,’ den 50% di caso por resultá den mehoransa.”

Nan ta yama esaki e efecto di placebo (remedi di gañagaña), cu ta nificá cu asta un píldora trahá di sucu por ta eficas si e persona ta kere cu lo e ta. E efecto di placebo por aliviá síntomanan subhetivo, entre nan, dolor, walmentu di stoma, cansancio, biramentu di cabes, ansiedad i depresion. Kico e echo aki ta revelá?

Pa cuminsá, e ta mustra cu ora un hende tin  confiansa den sea cual sea e tratamentu cu e ta ricibí, esei den hopi caso ta un factor importante pa bira bon. Na mésun tempu, por ta sabí pa chek wak si un tratamentu ta atacá e rais dje problema i no djis e síntomanan. Por haci esaki dor di midi e efecto dje tratamentu usando medionan obhetivo, manera testnan di laboratorio i sacamentu di potret.

Sin embargo, tin mas cos cu un persona por haci ora di scoge un tratamentu médico.

Pasonan Importante pa Tuma

Ta sabí pa haci investigacion promé cu tuma un decision. Haci pregunta. Ki resultado por spera? Kico ta e bentahanan, e desbentahanan, i e costo i duracion cu ta verwagt dje tratamentu? Papia cu hende cu a ricibí of cu a sigui e tratamentu cu ta ser considerá. Puntra nan si e tratamentu a yuda. Pero, corda sí cu evidencia basá riba experencia personal so, por ta engañoso.

Un forma di terapia cu no ta convencional kisas no ta consehabel si e ta pone bo posponé tratamentu cu sí tin un registro di éxito, maske e cantidad di éxito dje terapia convencional ta limitá. Evidencia dje daño cu esaki por trece cuné a sali den un informe den e revista The New England Journal of Medicine. E revista a describí con cancer a progresá den dos pashent hóben cu a nenga terapianan convencional miéntras nan tabata usa remedinan alternativo. Un dje pashentnan a muri.

Hende cu malesa crónico of cu malesa cu ta peligrá nan bida ta haci sabí di keda alerto p’e echo cu kisas nan por ta un blanco vulnerabel pa charlatannan cu ta promové terapianan fraudulento. Tene cuidou cu cualkier producto cu ta primintí di cura un variedad di malesa. Un ehempel recien tabata di un vitamina nobo cu nan a bisa a “yuda eliminá tur cos, for di problema cu halamentu di rosea i falta di energia te na malesanan cu a peligrá bida.” Un análisis dje “vitamina” a saca afó cu e no ta nada mas cu awa salu.

No tin duda cu algun forma di terapia alternativo por ta beneficioso pa promové bon salú. Sin embargo, sea realístico den bo expectativanan. Ta sabí pa concentrá riba come cuminda nutritivo, drumi suficiente, haci suficiente ehercicio i tene cuidou ora di scoge tratamentu médico.

Realisacion dje Búskeda

Ta obvio cu ningun terapia humano por pone fin na tur malesa i morto como consecuencia. Ta asina pasobra nos a heredá eseinan for di nos mayor original, e promé hende, Adam. (Job 14:4; Salmo 51:5; Romanonan 5:12) Hopi tratamentu médico—sea cual sea e tipo—kisas por resultá útil, pero tog nan ta solamente medidanan temporal cu por extendé bida i hacié mas agradabel pa un tempu limitá. Sin embargo, tin un cura sigur pa e problema di mal salú, i miyones di hende a descubrié caba.

E cura ei a ser percurá dor di nos Creador Jehova Dios, e Gran Dokter. Dor di ehercé fe den dje i probechá dje balor di expiá picá dje sacrificio di rescate di su Yu Jesucristo, lo bo por disfrutá di salú perfecto i bida eterno den un mundu sin malesa! (Mateo 20:28) Bijbel ta primintí cu den e mundu nobo ei, “ningun residente lo bisa: ‘Mi ta malu.’ ”—Isaías 33:24.

[Komentario na página 12]

Miyones di hende a haña e único speransa sigur pa salú perfecto