Un Bista Riba Terapianan Alternativo

“Habri un diálogo profesional entre dokternan i hende cu ta practicá medicina alternativo, ta crucial pa mehorá cuido di salú pa e pashentnan cu ta scoge terapianan alternativo.”

E DECLARACION ei a sali publicá den e edicion di 11 di november 1998 di The Journal of the American Medical Association (JAMA). E artículo a bisa: “Por verwagt cu e necesidad aki [di diálogo] ta crece cu uso di terapianan alternativo, foral segun cu seguronan médico ta incluí e terapianan ei den e beneficionan cu nan ta ofrecé.”

Mas i mas pashent ta usa terapia alternativo pareu cu nan ta haci uso di tratamentunan mas convencional. Sin embargo, algun pashent no ta informá nan dokter di loke nan ta haciendo. P’esei, e publicacion Tufts University Health & Nutrition Letter di april 2000 a urgi: “Bo mester actua na bo mihó interes dor di traha huntu cu bo dokter en bes di riba bo mes.” E publicacion a agregá: “Sea cu bo dokter ta aprobá di bo método of no, tog lo bo por beneficiá si bo lagu’e sa kico bo ta haciendo.”

 E publicacion a bisa esaki debí n’e posibel riesgonan di salú cu ta presentá ora combiná cierto yerbanan cu terapianan convencional. Hopi profesional di salú, reconociendo cu algun di nan pashentnan ta scoge terapianan alternativo, ta haci esfuerso pa no laga nan opinion personal tocante cuido di salú stroba nan di traha huntu cu terapistanan alternativo na e beneficio di e pashent.

Pa duna nos lectornan algun idea dje terapianan alternativo cu un cantidad creciente di hende den hopi pais ta usa, nos ta bai duna un descripcion breve di un par di nan. Sin embargo, tuma nota por fabor, cu Spierta! no ta respaldá ningun di esakinan ni ningun otro forma di tratamentu médico.

Remedi di Yerba

E remedinan aki kisas ta e forma mas comun di medicina alternativo. Apesar cu atrabes di siglonan a usa yerba den medicina, científiconan a studia solamente un cantidad relativamente chikitu di sorto di mata. Un cantidad mas chikitu ainda di mata i nan extracto a ser investigá asina cabalmente cu tin informacion disponibel en cuanto con safe i eficas nan ta. Mayor parti di informacion tocante yerba ta basá riba experencia cu hende a haña dor di usa nan atrabes di historia.

Sin embargo, den último añanan tabatin un cantidad di estudio científico cu ta mustra con útil cierto yerbanan ta pa trata condicionnan manera depresion leve, pérdida di memoria debí na edad cu ta subi, i síntomanan di formanan benigno di prostat cu ta crece. Un yerba cu nan a studia ta black cohosh (Cimicifuga racemosa, un sorto di zilverkaars). Indjannan mericano a herebé e rais i us’é pa problemanan di menstruacion i di parto. Segun e revista Harvard Women’s Health Watch di april 2000, estudionan recien ta sugerí cu un extracto comercial standard di Alemania di black cohosh por ta eficas “pa aliviá síntomanan di menopausa.”

Ta parce cu gran parti dje demanda pa e remedinan natural ei ta basá riba e opinion cu nan ta mas safe cu remedi sintético. Aunke hopi bes esaki por ta berdad, algun yerba ta ser asociá cu efectonan secundario, foral si usa nan den combinacion cu otro remedi. Por ehempel, un yerba popular cu ta ser promové como un producto natural pa saca  slijm i perde peso, por aumentá preshon di sanger i batimentu di curason.

Tambe tin yerbanan cu ta pone un pashent sangra mas lihé. Si usa e yerbanan aki den combinacion cu remedi cu ta haci sanger ‘awa,’ esei por resultá den problemanan serio. Hende cu tin malesa crónico, manera diabétis of preshon haltu, of esnan cu ta usa otro remedi mester tene cuidou cu usamentu di remedinan di yerba.—Mira e cuadro adhunto.

Un otro preocupacion cu remedi di yerba ta cu bo no tin sigur di un calidad consistente den nan produccion. Último añanan tabatin informe tocante productonan contaminá cu metalnan pisá i otro contaminante. Ademas, a descubrí cu algun producto di yerba ta contené masha tiki of nada mes dje ingredientenan cu tin riba nan etiket. E ehempelnan aki ta enfatisá pakico ta necesario cumpra productonan di yerba, i tambe cualkier otro producto pa salú, na tiendanan confiabel i di bon reputacion.

Suplementonan Dietético

Segun informe, suplementonan dietético, manera vitamina i mineralnan, a yuda prevení i trata un cantidad di problema di salú,  incluso anemia i osteoporósis, i asta a yuda prevení algun defecto di nacementu. Dósisnan diario di vitamina i mineral recomendá pa gobiernu ta ser considerá relativamente safe i útil.

Di otro banda, e dósisnan grandi (megadósis) cu ta ser promové como tratamentu pa cierto malesanan por ta peligroso pa salú. Ta posibel cu nan por interferí cu e manera cu bo curpa ta absorbá otro substancianan nutritivo of nan por stroba e actividad dje substancianan ei i por causa tambe efectonan secundario serio. No mester pasa por haltu dje posibilidad aki, ni tampoco dje falta di evidencia substancial cu ta apoyá e uso di dósis grandi di vitamina.

Homeopatia

Homeopatia a desaroyá den añanan 1700 como un tipo di tratamentu mas leve i suave cu esnan popular den e tempu ei. Homeopatia ta basá riba e principio cu “cos igual ta cura otro” i e teoria di un dósis mínimo. Ta prepará remedinan homeopático dor di haci un substancia curativo repetidamente mas slap, tin biaha ta hacié asina slap cu no ta keda ni un solo molekuul dje materia original.

No obstante, expertonan a descubrí cu, compará cu e uso di placebo (remedi di gañagaña), remedi homeopático tin algun efecto den trata cosnan manera asma, alergia i diarea di mucha. Productonan homeopático ta ser considerá basta safe, ya cu nan ta asina slap. Un artículo publicá den e edicion di 4 di mart 1998 di JAMA, a remarcá: “Pa hopi pashent cu ta sufri di problemanan crónico pa cua no tin un diagnóstico specífico, homeopatia por ta un tratamentu útil i importante. Si us’é denter di su límitenan, homeopatia por complementá medicina moderno como ‘un herment mas den tas.’ ” Sin embargo, ora di emergencia caminda posiblemente bida ta den peliger, ta mas sabí pa usa tratamentunan médico mas convencional.

Kiropráctica

Tin un cantidad di terapianan alternativo cu ta usa manipulacion di curpa. Kiropráctica ta entre e tratamentunan alternativo mas comun cu ta ser usá, foral na Merca. E ta basá riba e idea cu por promové curacion dor di corigí wes’i lomba cu ta for di lugá. Ta p’esei kiroprácticonan ta specialisá den manipulá wes’i lomba pa ahustá e wervelnan di nan pashentnan.

No ta tur biaha medicina convencional por percurá alivio pa dolor n’e parti abou di lomba. Di otro banda, algun pashent cu ta haña tratamentu kiropráctico ta raportá un alto grado di satisfaccion. Tin masha tiki evidencia pa apoyá uso di kiropráctica pa otro condicionnan fuera di dolor.

Remarcablemente, tin tiki casonan di efecto secundario ora un persona ábil efectuá  manipulacion kiropráctico. Sin embargo, na mésun tempu, un persona mester ta conciente cu manipulá nek di garganta ta ser asociá cu e riesgo di complicacionnan serio, incluso atake celebral i parálisis. Pa reducí e riesgo di complicacion, algun experto ta recomendá pa un persona haci un exámen cabal pa wak si un estilo specífico di manipulacion ta safe p’e.

Masashi

Pa hopi tempu caba hende den casi tur cultura a reconocé e beneficionan di masashi. Asta Bijbel ta informá di uso di masashi. (Ester 2:12) E revista British Medical Journal (BMJ) di 6 di november 1999 a remarcá: “Técnicanan di masashi ta hunga un papel importante den cuido médico di China i India. Na principio di siglo 19, Per Henrik Ling a duna un órden sistemático na masashi europeo. E ta esun cu a desaroyá loke ta conocí como masashi sueco.”

Hende ta bisa cu masashi ta relahá e músculonan, mehorá circulacion di sanger i eliminá substancianan tóxico cu a acumulá den tehido. Awor dokternan ta prescribí masashi pa malesanan manera dolor di lomba, dolor di cabes i problema cu digestion. Mayoria hende cu ricibí masashi ta comentá con bon e ta laga nan sinti. Segun dr. Sandra McLanahan: “Ochenta porciento di malesa ta relacioná cu stres, i masashi ta aliviá stres.”

BMJ ta informá cu “mayoria técnica di masashi tin tiki riesgo di efectonan adverso. Casonan cu no ta consehabel pa trata cu masashi ta basá pa gran parti riba sentido comun (por ehempel, evitá di frega riba kemadura of duna masashi na un man of pia cu tin trombósis den adernan hundu) . . . No tin evidencia cu masashi cerca pashentnan cu cancer ta pone e cancer plama.”

E. Houston LeBrun, ex-presidente dje Asociacion Mericano di Terapia di Masashi, a comentá: “Segun cu masashi ta bira un actividad cu mas ta prevalecé, consumidónan ta birando mas interesá den e credencialnan di un terapista, i nan mester ta.” BMJ a consehá cu pa evitá comportacion no-profesional, “pashentnan mester haci sigur cu esnan cu ta practicá masashi ta registrá na un organisacion apropiado cu ta regulá esei.” Un informe aña pasá a comentá cu den 28 estado di Merca, terapistanan tabatin permit dje autoridadnan competente.

 Acupuntura

Acupuntura ta un técnica curativo cu a bira basta popular rond mundu. Aunke e término “acupuntura” ta abarcá vários técnica distinto, pa gran parti e ta encerá uso di angua fini cu ta ser hincá den áreanan specífico dje curpa pa logra un reaccion curativo. Investigacion durante e último décadanan ta sugerí cu acupuntura ta traha den algun caso dor di los kímiconan di nervio, manera endorfin, cu por yuda aliviá dolor i inflamacion.

Algun investigacion ta sugerí cu acupuntura por ta eficas pa trata un cantidad grandi di malesa i cu e ta un alternativa sin riesgo pa e uso di anestético. Organisacion Mundial di Salú ta reconocé e uso di acupuntura pa trata 104 malesa. I un comité seleccioná dor dje Instituto Nacional di Salubridad Mericano a cita evidencia cu acupuntura ta un terapia aceptabel pa trata dolor despues di operacion, dolor di músculo, kram di menstruacion i walmentu di stoma i sacamentu cu ta bini di kimoterapia of embaraso.

Aunke ta masha poco bes acupuntura sa tin efectonan secundario, tin hende por experenciá un sensacion di dolor, doof of cueru ta hinca. Por minimisá e riesgo di infeccion dor di sterilisá e anguanan debidamente of usa angua desechabel. Hopi acupunturista no tin e abilidad médico necesario pa haci un bon diagnóstico of pa recomendá otro terapianan mas apropiado. Lo no ta sabí pa ignorá e falta aki di abilidad pa diagnosticá, foral si scoge acupuntura pa aliviá e síntomanan di condicionnan crónico.

E Opcionnan Ta Hopi

Lo anterior ta djis un muestra dje hopi terapianan cu awendia den algun lugá hende ta referí na dje comunmente como terapia alternativo. Por ta masha bon cu den futuro algun di esakinan, i tambe otronan cu no a ser tratá aki, ta ser considerá convencional, manera nan ta caba den algun parti di mundu. Claro cu tin otro terapianan cu kisas hende lo stop di usa of cu ta haña un mal reputacion.

Desafortunadamente, dolor i malesa ta un parti integral di bida humano, net manera Bijbel ta bisa cu exactitud: “Nos sa cu henter e creacion ta sigui suspirá huntu i keda den dolor huntu te awor.” (Romanonan 8:22) Ta claro cu nos por verwagt cu hende lo busca alivio. Pero unda nos por acudí pa esei? Por fabor, considerá algun comentario cu por yuda bo ora bo ta scoge tratamentu médico.

[Plachi na página 7]

Cierto yerbanan a resultá útil den trata problemanan di salú

Black cohosh

Saint-John’s-wort

[Rekonosementu]

© Bill Johnson/Visuals Unlimited

[Plachi na página 7]

P’e mihó resultado, pashentnan i profesionalnan di cuido médico mester cooperá cu otro