For di Nos Lectornan

Pornografia Riba Internet Mi a ricibí e edicion di 8 di juni 2000, cu e seri “Pornografia Riba Internet—Ki Daño E Por Haci?” Wel, esei sí a haci un impacto riba mi! Un luna i picu promé cu esei, mi a gara mi esposo ta wak pornografia riba computer; el a caba di instalá e computer e dia ei. Mi a habri e porta inesperadamente i a hañ’é ta wak un potret sushi. Mi no por conta boso kico esei a haci cu nos relacion. E ta bisa cu ta duel e, pero el a rebahá nos matrimonio.

L. K., Merca

Lo mi kier expresá mi gratitud pa e artículonan aki. Mi a lucha pa casi ocho aña contra e problema di wak pornografia. Recientemente mi a haci oracion i a dicidí di stop cu mi adiccion na pornografia. Precis riba e dia ei mi a ricibí e artículonan aki.

L. M., Merca

Un par di luna pasá pa casualidad, mi a topa un Internet site di pornografia. Mi a cuminsá bishitá otro sitenan riba Internet, sitenan cu potretnan mas explícito. Como resultado, mi a bira mas reservá i cu mal beis i a perde mi amor pa cosnan spiritual. Ta masha fácil pa bira adicto na e potretnan aki. Pero awor lo mi traha duru pa kibra cu e adiccion aki.

M. G., Merca

Evolucion Den e artículo “Evolucion Ta Lógico?” (8 di juni 2000) tabatin algun punto cu ta stroba un debate onesto riba e tópico di evolucion. Boso ta declará: “Ta posibel cu araña a evolucioná un técnica di fabricacion asina complicá cu ainda hende tin cu comprend’é?” Pakico no? Científiconan no sa tur cos.

C. W., Australia

E manera cu araña ta traha seda ta encerá vários mecanismo increiblemente complicá cu te ainda, despues di décadanan di investigacion, científiconan no ta comprendé. Pero tog, nan ta declará dogmáticamente cu tur esaki ta producto di evolucion. Nos ta kere cu esaki i hopi otro ehempel mas ta ilustrá e falta di lógica básico di evolucion i ta indicá cu kere den e teoria ei ta mas un asuntu di fe cu di ciencia.—RED.

Nunca mi no a lesa nada riba un punto cu semper mi a sinti ta un argumento fuerte contra e lógica di evolucion: Con nos antepasadonan (sea loke sea hende ta kere cu nan tabata) a dividí i bira dos sexo diferente? Dor di bisa cu esaki a sosodé atrabes di miyones di aña apénas ta splica esei, ya cu un hembra no por sali na estado gradualmente.

H. R., Merca

Nos lector a presentá un bon punto, unu cu nos a comentá ariba den nos artículo (na spañó) di 8 di mei 1997, “Evolucion Falta Fundeshi?” Nos a declará: “Ta ser verwagt di nos pa nos kere cu ta pa casualidad tambe evolucion a producí un machu i un hembra na mésun tempu afin di mantené sortonan nobo. Pa hacié asta mas improbabel, nos tin cu kere tambe cu e machu i e hembra no solamente a evolucioná na mésun tempu, sino tambe na mésun lugá! Si nan no a topa, lo no tabatin procreacion!”—RED.

Mancha E artículo “Bo Wowo Ta Mira Mancha?” (8 di juni 2000) a toca mi bida den un manera importante. Mi a ricibí e revista net tres dia promé cu e retina den mi wowo drechi a los parcialmente. E síntomanan describí den e artículo a alertá mi cu mi mester a busca atencion médico mesora. Dokter a usa tratamentu di laser pa drecha e daño, di manera cu mi bista no a daña. Danki pa artículonan asina bon investigá i práctico.

C. V., Sur África

Bibando den Exterior Danki pa boso artículo “Hóbennan Sa Puntra . . . Mi Mester Bai Biba den Exterior?” (8 di juli 2000) Mi ta lesa e seri aki cu regularidad, pero hopi bes mi tabata sinti cu algun dje peligernan cu boso a describí tabata exagerá. Aña pasá mi a haci un biahe pa exterior como parti di un intercambio cultural entre mi scol i un otro universidad. Aunke e tabata un experencia interesante, e no tabata bon desde un punto di bista spiritual.

M. P., Italia