Mi Lucha cu un Malesa Debilitador

SEGUN E RELATO DI TANYA SALAY

Te cu un par di aña pasá, mi tabata un mama masha activo i un minister di tempu completo den e pueblo chikitu di Luverne, Alabama. Aki bida ta pacífico i trankil. Tur cos tabata parce di bai bon pa mi cu mi esposo Duke, i mi yu hóben, Daniel. Anto un simpel operacion a hiba na un cambio grandi den nos estilo di bida.

 NOS problemanan a cuminsá na 1992 ora cu mi a saca mi matris. Djis despues, mi a cuminsá sufri di dolor constante i teribel i mester a oriná cada bes (50 pa 60 bes pa dia). Mi ginecólogo finalmente a traha un cita pa mi cu un urólogo den un intento pa señalá e causa dje problema.

Mi a bai un hospital pa haci algun test. Na mi promé bishita, e urólogo a diagnosticá mi problema: intersticial cistitis (IC), esta inflamacion cu ta debilitá blas. No tabata fácil pa diagnosticá esei debí cu e síntomanan di IC tabata similar na esnan di otro trastornonan dje sistema urinario. Ademas, no tin testnan definitivo pa identificá IC. P’esei, dokternan tin cu excluí otro posibel malesanan promé cu nan aceptá e diagnósis di IC.

Nos dokter a bisa nos francamente cu al final mester saca mi blas, ya cu e tratamentu no ta yuda cu nada! El a bisa cu tabatin otro tratamentunan pero cu niun di nan no tabata exitoso. Mi no tin nodi bisa cu esei tabata un sla duru pa nos. Te cu e tempu ei mi tabatin basta bon salú. Como Testigonan di Jehova, ami cu Duke tabatin vários aña den e ministerio di tempu completo, i awor dokter ta bisa mi cu mi mester saca mi blas. Mi ta contentu cu mi tabatin bon apoyo di mi casá.

Nos a dicidí di busca un otro urólogo. Nos a purba vários specialista. Desafortunadamente, e tempu ei dokternan tabata sa masha tiki di IC. Tambe, hopi urólogo tabatin nan propio teorianan tocante IC, pues e tratamentunan cu nan a recomendá tabata varia di un pa otro. Un fuente médico ta bisa: “E malesa tin tendencia di ta crónico.” Un otro ta bisa: “Científiconan no a descubrí un cura ainda pa IC, ni nan no por predicí ken lo reaccioná mihó riba cua tratamentu. . . . Debí cu dokternan no sa kico ta causa IC, e tratamentunan ta dirigí riba aliviá e síntomanan.”

Mi tabatin asina hopi dolor di kram i dje frecuencia di oriná, cu mi tabata dispuesto na purba casi tur loke e dokternan a sugerí. Mi a purba mas cu 40 diferente remedi i tambe yerba, acupuntura, verdoving di nervionan, inyeccionnan epidural i den tuti di wes’i lomba i stimulacion eléctrico di nervio bou di cueru, den cua nan ta laga impulsonan eléctrico suave drenta e curpa pa vários minuut of ora. Mi a haci mas tantu investigacion cu mi tabata por, locual a yuda mi por lo ménos comprendé un poco loke tabata pasando.

Actualmente, mi ta usa metadone, cu ta un remedi pa dolor, huntu cu seis otro remedi. Tambe mi ta bai regularmente na un clínica pa trata dolor, caminda nan por lo general ta pasa mi inyeccionnan epidural, i huntu cu esei nan ta duna mi steroid pa yuda controlá e dolor. Pa loke ta e frecuencia di oriná, mi ta bai hospital cada tres of cuater luna pa un procedura cu yama ‘hidrodistension,’ caminda nan ta usa líkido pa span e blas manera un bala. Mi a haci esaki basta biaha caba. Normalmente e ta duna mi alivio pa algun luna. Mi a drenta-sali hospital mas cu 30 biaha durante e último par di añanan.

Kico dje opcion decisivo, esta, kita e blas? Un autoridad ta bisa: “Mayoria dokter no tin masha gana di operá pasobra no por predicí e resultado den pashentnan individual; tin hende ta operá i tog ta keda cu e síntomanan.” Pues pa awor aki mi no ta considerando e opcion ei.

Tin biaha e dolor ta asina fuerte i constante cu lo ta fácil pa entregá. Asta e pensamentu di pone un fin na tur cos a pasa dor di mi mente. Pero mi no por a soportá e idea dje reproche cu esei lo trece riba e nomber di Jehova. Mi por mira e importancia di oracion i studio personal i tambe di desaroyá un relacion estrecho cu Jehova, pasobra bo no sa nunca kico lo por sosodé cu ta cambia bo bida. E relacion aki cu Jehova literalmente a salba mi bida durante mi malesa, ya cu mi sa cu si no tabata p’esei, lo mi a mata mi curpa.

Ora mi wak bek riba e nuebe añanan aki, mi ta mira con lihé bida por cambia. Mi ta apreciá e palabranan di Eclesiástes 12:1, cu ta bisa: “Corda, awor, riba bo Magnífico Creador den e dianan di bo hubentud, promé cu e dianan calamitoso procedé di bini, of e añanan yega ora lo bo bisa: ‘Mi no tin deleite den nan.’” Mi ta masha gradicidu mes cu mi a cuminsá den e ministerio di tempu completo tempu mi tabatin 15 aña i cu mi por a hacié pa casi 20 aña. Durante e tempu ei mi a desaroyá un relacion estrecho cu Jehova.

Mi ta gradicidu na Jehova pa mi esposo i mi yu homber, Daniel, kendenan ta apoyá mi asina bon. Tambe, ta masha animante ora e rumannan den congregacion yama na telefon of pasa bishitá mi. Ta duru pa mi sali afó den winter ya cu e friu ta haci e kramnan pió. E ora ei mi ta duna testimonio via telefon, loke ta mantené e speransa di Paradijs constante i real pa mi. Mi ta anticipá e tempu ora cu enfermedad i sufrimentu lo ta cosnan di pasado i lo no ser recordá mas.—Isaías 33:24.