Mito i Echo Tocante Hende di Edad

Mito tocante behes tin na granèl. “Ageing—Exploding the Myths” (Enbehecimentu—Poniendo Fin n’e Mitonan), un publicacion dje Programa di Salú i di Enbehecimentu di Organisacion Mundial di Salú, ta exponé e eror di algun dje mitonan aki. Considerá un par di ehempel.

Mito: Mayoria hende di edad ta biba den paisnan industrialisá.

Echo: En realidad, mas cu 60 porciento dje 580 miyon hendenan di edad na mundu ta biba den paisnan den desaroyo. Un creciente cantidad di hende den e paisnan aki ta alcansá behes como cu awor tin mihó cuido di salú i a mehorá sanidad, bibienda i nutricion.

Mito: Hende di edad no por contribuí cu nada.

Echo: Hende di edad ta hunga un papel grandi den yuda otronan dor di haci trabou pa cua nan no ta ser pagá. Por ehempel, segun cálculo tin 2 miyon mucha na Merca cu ta ser cuidá dor di nan welonan, i 1,2 miyon di nan ta biba den cas di nan welonan. Pues hende di edad ta percurá cas, cuminda i educacion i ta transmití balornan cultural na nan nietunan, miéntras cu nan ta haci posibel pa mama i tatanan sigui como miembro dje forsa laboral. Asina tambe den paisnan industrialisá, hopi organisacion cu ta haci trabou boluntario lo no a funcioná sin e yudansa útil cu hende di edad ta duna. Tambe tin hopi necesidad di nan como dunadó di cuido. Den algun pais den desaroyo, caminda te cu 30 porciento dje poblacion adulto tin AIDS, hende di edad ta cuida nan yunan adulto cu tin e malesa, i despues cu e yunan muri nan tin cu cria nan nietunan huérfano.

Mito: Hende di edad ta bandoná e forsa laboral debí cu nan no por cumpli cu nan trabou mas.

Echo: Mayoria bes nan ta bandoná e forsa laboral debí na desbentaha den educacion of entrenamentu of debí cu tin prehuicio contra hende bieu, mas bien cu debí na behes mes.

Mito: Hende di edad no kier traha.

Echo: Hopi bes ta excluí hende di edad for di trabou cu ta paga apesar cu nan ta dispuesto i tin e abilidad di sigui traha. Foral durante periodonan di desempleo, hende sa bini hopi bes cu e argumento cu hende di edad mester stop di haci trabou cu ta paga, pa asina habri cupo pa hóbennan cu ta busca trabou. Sin embargo, saca empleadonan di edad promé cu tempu for dje forsa laboral no necesariamente kier men cu hóbennan ta haña trabou. Un hóben desempleá cu ta busca trabou kisas no tin e abilidadnan necesario pa tuma e puesto dje empleado di edad. Empleadonan di edad cu experencia ta yuda sigurá cu e forsa laboral ta keda productivo i stabil.

Segun Organisacion Mundial di Salú (OMS), teniendo e echonan aki na mente, comunidad mundial mester mira su poblacion cu ta birando bieu como un fuente di experticio cu nan por haci bon uso di dje. P’esei Alexandre Kalache, lider di grupo di OMS su Programa di Salú i di Enbehecimentu, ta mencioná cu “paisnan . . . mester mira nan poblacion cu ta birando bieu no como un problema, sino como un posibel solucion pa problema.” I esei ta un echo.