Mi Bida Como Pintor

SEGUN E RELATO DI SHIZUKO KAWABATA

“Testigonan di Jehova, e Dushi Pueblo Cu Ta Declarando e Bon Nobo Rond Mundu” tabata título di un di mi cuadronan na un exhibicion di arte na Versailles, Francia, na 1999.

MÉNOS cu un siman promé cu e exhibicion, Testigonan di Jehova na Francia a repartí rond e pais 12 miyon tratado cu a hala atencion na e manera inhustu cu gobiernu tabata trata nan. Mi a ricibí un premio special pa mi cuadro cu a elogiá e Testigonan. Despues, e persona encargá pa presentá e premio a bisa: “Bo tin curashi, pero mi tambe tin curashi. P’esei mi ta otorgá abo e premio special.”

Hopi pintor ta purba transmití sensacion i emocion via nan cuadronan. Esei ta loke mi ta purba haci. Mi ta pinta loke mi ta sinti, i mi cuadronan ta alegre, reflehando mi goso i felicidad. Durante mi infancia mi a descubrí e goso di combiná creatividad cu pintamentu.

Di Con Mi A Cuminsá Pinta

Mi a nace na 1920 di mayornan bon pará na Morioka, Hapon. Ami cu mi ruman muher mayó tabatin instructornan privá cu a siña  nos baile hapones, e sistema di areglá flor, e ceremonia di te, toca koto (instrumento di cuerde hapones), toca piano, canta, etcétera. Mi no tabata gusta niun di e cosnan ei. Hopi bes ora e instructornan yega, mi tabata core bai sconde. E criánan tabatin cu busca mi i lastra mi trece bek.

Loke mi tabata odia ta e severidad dje lesnan. Hende cu mi no a topa nunca promé, a dicidí con mi mester baila, areglá flor i sirbi te. Mi a sinti mi muchu frená, como si fuera no tabatin manera pa mi mes usa mi imaginacion ni pone metanan personal. Ma ora di pinta, niun hende no tabata controlá mi. Niun hende no tabata bisa mi kico pa haci. Esaki a duna mi e libertad cu mi a anhelá.

Como cu mi no tabatin un instructor privá pa arte, mi por tabata creativo i improvisá den mi pinturanan, i niun hende no a criticá mi. Poco-poco mi a tuma mas curashi den pintamentu. Ora mi tabatin rond di 12 aña, mi a cuminsá coge mi tata su dashinan di seda i pinta riba nan. Djis despues di esei, nos a cose shimis na scol. E maestra a keda di shok ora el a mira cu mi a corta mitar dje dilanti dje shimis kita afó i remplas’é cu un material blancu. Pero, mescos cu mi tata, e no a bisa nada.

Soño i Realidad

For di scol básico, mi a bisa cu ora mi bira grandi mi ta bira pintor. Mi meta no a cambia, i mi kier a bai universidad pa studia arte; pero mi mayornan no a permití esaki. Nan a bisa cu na Hapon un graduado di arte lo a ser considerá inaceptabel como futuro esposa. P’esei mi a tuma les den abilidadnan doméstico.

Mi tabata gusta poesia i bukinan stranhero i a lesa nan hopi. Sin embargo, cu tempu hende a cuminsá criticá nan como literatura di enemigu. Tabata asta peligroso pa bo tin nan den bo poder. Na scol mi a studia frances cincu aña cerca un maestro frances, pero situacion a cambia na Hapon di tal manera cu hende tabata asta sospechá idiomanan stranhero. Nan a nenga nos e libertad di expresion.

Na 1943, durante e furia di Segundo Guera Mundial, mi a keda contentu di tende cu despues cu un homber a wak 40 potret di mucha muhernan di edad pa casa, el a scoge ami como su posibel esposa. Despues mi a haña sa cu su mama cu un amiga a bishitá nos bario secretamente pa wak mi. Anto, nan famia a manda un proposicion formal di matrimonio pa nos famia, i mi a ser convencé pa acept’é. Mi a topa e homber un biaha so promé cu nos matrimonio.

Despues cu nos a casa, atakenan aéreo masal a menasá nos bida diariamente, i finalmente nos cas a kima mescos cu e resto dje stad. Sobrebibientenan a busca refugio den cerunan, pero te einan nos por a tende e sirenanan i mira e avionnan di guera. Tabata algu spantoso. Tur hende a sufri. E dies añanan despues di guera tambe tabata realmente amargo.

Fuera di nos tres yunan, mi suegra i seis ruman di mi casá tabata biba huntu cu nos. Aunke nos tabatin criá, nos tur mester a traha den cunucu pa por a come. Durante e tempu ei mi tabata hopi tristu i a lubidá ta con ta hari. Pero mi tabatin miedu cu si mi expresá mi sintimentunan cu palabra esei lo a causa malcomprendimentu. Sin embargo, poco-poco mi a descubrí cu mi por a expresá mi sintimentunan via mi arte.

Ganando Reconocimentu Como Pintor

Asta un persona cu un abilidad artístico tin cu haci masha hopi esfuerso promé cu e haña resultadonan cu ta bale la pena. Mi a cumpra bukinan tocante arte, i mi a haña les cerca vários pintor principal di Hapon. Niun di nan no a recomendá mi cambia e estilo cu mi a desaroyá como hóben.

Críticonan di arte a cuminsá ripará mi obranan, sin embargo mi tabata pinta pa mi propio satisfaccion, no pa show mi pinturanan na otro hende. Pero cu tempu mi a cuminsá puntra mi mes kico hende lo pensa di  mi cuadronan. P’esei na 1955 mi a tene mi promé exhibicion den Ginza na Tokio. E exhibicion tabata titulá “Lucha Silencioso, Abla Silencioso, Mi Diario,” i a expresá bida di tur dia den forma di pintura. E exhibicion tabata un éxito.

Encuentro cu e Testigonan

Na 1958 nos famia a muda bai Tokio pasobra ami cu mi casá tabata kier pa nos yunan bai bon scol i haña e mihó educacion posibel. Mi bida tabata drei rond di pintamentu. Tabata mi custumber di dedicá cincu ora pa dia na pintamentu. Anochi mi tabata sali cu mi amigunan artista, i mi casá tabata sali cu otro hende. Nos no tabatin niun idea con pa lanta nos yunan.

Mi casá mester a biaha hopi pa su trabou, pues criamentu di nos yunan a bira mi responsabilidad, i mi a perde e confiansa di por a haci esei. Como mucha, mi a bai un scol di misioneronan católico, i mi tabata puntra mi mes si un tipo di educacion bíblico lo a yuda. Dilanti nos cas na Omori, Tokio, tabatin un iglesia luterano, i mi a sugerí mi yunan pa nos bai einan. Pero nunca nos no a yega.

Mas bien, e siguiente dia—na comienso di 1959—un Testigo di Jehova a bishitá nos cas. Mesora mi a yama e muchanan, i nos tur a cai sinta pa scucha. E Testigo a splica for di Bijbel cu nos ta bibando den un tempu significante i cu pronto Dios lo libra tera di maldad. Mi a bestèl cuater Bijbel huntu cu literatura bíblico i mesora a aceptá su oferta pa bishitá nos tur siman pa siña nos. Mi a puntr’é cuantu e les lo a costa pa luna i a keda asombrá ora el a bisa mi cu Testigonan di Jehova no ta aceptá pago pa duna hende les. Esta distinto for dje instructornan cu mi tabata conocé!

Mi yu muhernan a aceptá e berdadnan bíblico mesora, i nos a asta cuminsá tene un studio na grupo tur siman den nos cas. Pero despues di un par di studio, mi a cuminsá sinti incómodo. E periodo di studio tabata doloroso pa mi, p’esei tin biaha mi tabata purba sconde of sali bai ora cu tabata tempu pa mi studio di Bijbel personal.

Mi problema tabata cu mi por a mira cu tur cos cu Bijbel ta bisa tabata corecto i cu lo mi tin cu adaptá na su guia. Pero na e mésun tempu mi tabata decididu pa bira un bon pintor, i mi tabata kere cu mi mester mantené un forma di pensa independiente pa mi por ta creativo. Como resultado dje agitacion cu mi tabata sinti, mi pintamentu a bai atras. Nan a cuminsá pone mi cuadronan te den huki durante exhibicionnan.

Mi Biahe pa Paris

Segun mi, un bishita na Paris lo a yuda mi mehorá mi cuadronan. P’esei na 1960 mi a bai einan, ya cu nan lo a tene un exhibicion grandi pa introducí arte hapones na Francia. Mi tabata e único pintor femenino di Hapon cu a asistí. Na Paris mi a keda hopi emocioná cu e diferencia den condicion di bida, di paña, idea, color—tur cos. E exhibicion a dura cuater dia, i pa mi sorpresa, e lidernan dje pais a asistí na e exhibicion. Sin embargo, un otro sorpresa tabata cu e muhernan a keda fasiná cu e kimononan cu mi tabatin bistí. Mi tabata determiná pa keda mas largu.

Dor cu mi no por a comprendé con pa laga nan manda cen pa mi for di Hapon, mi a cuminsá bende mi kimononan. Asina mi por a keda e siguiente tres lunanan studiando obranan di exhibicion den galerianan di arte. Hopi bes mi tabata corda riba e palabranan dje pintor kende su cuadro tabata cologá banda di esun di mi na e exhibicion. E di: “Ami ta pinta e briyo di solo. Di naturalesa bo cuadro ta scur i pretu pasobra bo ta bou di influencia di filósofonan oriental.”

Un pareha for dje oficina di sucursal di Paris di Testigonan di Jehova a bishitá mi apartamento. Despues di vários bishita, mi a dicidí por fin di bai un reunion cristian cu nan. Ora mi a yega, mi a keda babucá pa loke mi a  mira. Tabatin un señora cu un bunita sombré corá rand hanchu. Un otro tabatin un bistí color berde bibu. E pañanan a reflehá un sentido di estilo i bon gustu, di manera cu mi punto di bista dje Testigonan a cambia completamente.

E programa a impresioná mi. Mirando con e mésun proceduranan ta tuma lugá na tur dos banda dje globo, cu e mésun siñansanan, a pone mi realisá cu e grupo aki i su actividad no tabata algu comun. Mi curason a keda profundamente conmoví ora mi a realisá cu mi tabata asociá cu hendenan cu a ser dirigí pa Dios.

Tumando Decisionnan

Ora mi a regresá Hapon, mi a cuminsá studia Bijbel seriamente. Mi a descubrí cu nos Creador su instruccionnan a duna nos mas libertad di loke mi a imaginá. Amorosamente, el a duna nos personalidadnan individual i tambe talentonan individual i e libertad pa cultivá nan. Asina mi a bin realisá cu si un hende bira Testigo di Jehova esei no a nificá cu e mester entregá su amor pa arte.

Ami cu mi yu muhernan a progresá den nos studio di Bijbel. Un yu muher a simbolisá su dedicacion na Jehova mediante bautismo bou di awa na 1961, i e otro na 1962. Te cu awe, nan tur dos ta fiel sirbidó di Dios. Sin embargo, ami tabata wanta ainda. Na 1965, Lloyd Barry, cu e tempu ei tabata supervisá e trabou di predicá di Testigonan di Jehova na Hapon, a animá mi dor di bisa: “Djis pensa riba e cuadronan maraviyoso cu hende perfecto lo pinta den Paradijs!” E siguiente aña mi a bautisá.

E Efecto Riba Mi Pintamentu

Mirando atras, mi por mira con e cambionan den mi bida i mi personalidad a influenciá mi pintamentu. Anteriormente mi cuadronan tabata scur i melancólico, reflehando e dolor, sufrimentu i desesperacion cu mi a sinti. Pero despues mi a siña for di Bijbel tocante nos Creador, su cualidadnan maraviyoso, e felicidad cu ta bini di alab’é i di sigui e normanan corecto pa dirigí bo bida. Segun cu mi sintimentunan a cambia, asina mi cuadronan tambe a cambia.

Awor mi ta dedicá hopi tempu na compartí e mensahe di Bijbel cu otro hende riba un base regular. Papia cu otro hende tocante e cualidadnan di Dios, i tambe tocante su propósito maraviyoso pa haci e tera aki un paradijs bou di mando di su Yu Jesucristo, ta duna mi gran goso i satisfaccion. E actividad aki basá riba Bijbel ta stimulá mi, i mi ta haña mi ta coge mi penseel i expresá mi sintimentunan. I segun cu mi felicidad a sigui crece den transcurso di añanan, mi cuadronan a bira mas briyante.

Mi Cuadronan Ta Enfatisá Bijbel

Mi ta haña invitacion pa exhibí mi cuadronan for di tur skina di mundu: for di Sydney, Vienna, Londen, New York. Pero esnan cu mas ta admirá mi cuadronan, ta e europeonan. Expertonan dje Academia Real di Arte di Louvre na Paris a yega di puntra: “Con por ta cu Bijbel i cristianismo por conmové un hapones asina tantu cu su pinturanan ta expresá un goso nunca bisto durante siglonan di arte religioso?”

 E salmista bíblico David a expresá su sintimentunan mediante música, i el a usa su talentonan musical pa siña otro hende e maraviyanan di Dios. Mi tin e mésun meta. Mi kier alabá Jehova. Mi ta deseá mashá pa den mi cuadronan hende sinti e goso cu nan por ricibí dor di conocé Jehova i su cualidadnan maraviyoso. Un crítico di arte a bisa tocante mi títulonan: “Ábilmente e artista ta evitá di usa su propio palabranan, i den un forma obhetivo e ta laga Bijbel papia.” Mi ta haña masha emocionante cu hende ta reconocé e poder di Bijbel den mi cuadronan.

Na 1995 e Conseho Mundial di Arte, cu ta un organisacion internacional di arte cu sede na Tokio, a premia mi cu e promé lugá entre artistanan top di mundu. E conseho a bisa tocante mi pinturanan: “E artista ta cita palabranan for di Bijbel como título . . . Tur su cuadronan tin Bijbel pintá den nan, pero esaki ta precis loke bida ta encerá pa un artista cu ta cana cu Dios.”

E cita ariba ta referí n’e echo cu hopi bes mi ta incluí un plachi di un Bijbel habrí den mi pinturanan. Recientemente, mi a combiná páginanan imprimí di Bijbel huntu cu mi cuadronan. Dje manera ei bista dje persona ta ser atraé na e títulonan cu mi a scoge i tambe na e palabranan den Bijbel anto caba na e manera cu mi a representá esakinan den mi pinturanan.

Na 1999 nan a exhibí algun di mi cuadronan na Bangkok, Tailandia. Unu tabata titulá “Esta Maraviyoso Jehova Dios A Traha Tera, Dunand’e na Hende Como Lugá di Biba,” i un otro, “Oracion di Rey David: ‘Jehova, Laga Curason dje Pueblo aki Ta Unu cu Bo.’” Huntu cu algun otro artista mi a ricibí invitacion pa bai n’e palacio dje rey di Tailandia. E rey kier a papia tocante mi cuadronan cu mi, i el a haci mi hopi pregunta. Mi por a papia pa basta ratu cuné i a incluí comentarionan tocante mi creencianan basá riba Bijbel. Despues, mi a obseki’é un cuadro.

Durante e último 35 añanan mi a sirbi tambe den un hurado pa evaluá e trabou di otro pintornan. Cuadronan cu mi ta gusta ta expresá emocion. Pa mi un cuadro ta bon ora e duna mi un impresion agradabel, i ta laga mi sinti un pas interno. Mi ta admirá mashá e plachinan cu ta sali den e publicacionnan di Testigonan di Jehova, ya cu nan ta cumpli cu nan propósito di representá e mensahe di Bijbel fielmente.

Bendicionnan Ricibí Como Sirbidó di Dios

Debí na mi pintamentu, mi a disfrutá di oportunidadnan único pa duna testimonio tocante Jehova Dios i su propósito magnífico pa tera. Esaki tabata e caso durante entrevistanan pa artículonan den revista i durante programanan di television. De echo, no ta importá unda mi bai of cu ken mi ta papia, mi ta purba laga hende sa cu ta e fe, goso i felicidad cu ta bini di sirbi Jehova Dios ta loke ta capacitá mi pa producí mi cuadronan.

Mi ta convencí cu si mi mester entregá mi fe, lo mi no por pinta manera mi ta haciendo. Pero dor cu mi ta un Testigo di Jehova i dor cu e berdad dje Palabra di Dios ta yena mi cu goso i felicidad, ta p’esei mi por pinta.

[Plachi na página 21]

Tempu mi tabata na Paris

[Plachi na página 22]

Awe, huntu cu mi dos yu muhernan