Celebracionnan Popular Ta Diberticion Inofensivo?

MEIMEI di october, un transformacion straño ta cuminsá tuma lugá den algun stad na Francia. Bentananan di pacus ta yena cu pampuna, carpachi i cas di araña. Den supermarketnan local, caheranan tin sombré pretu cu punta bistí. I como e gran final, e anochi di 31 di october mucha chikitu disfrasá na heks of spiritu ta cana rond den caya, bati riba porta i menasá di haci co’i mala mucha si no “treat” nan mangel.

Tur e custumbernan straño aki ta parti dje celebracion conocí como Halloween. Ántes nan a consider’é principalmente como un dia di fiesta mericano, pero awor Halloween a plama rond mundu i a bira popular cerca mucha i hende grandi. Francia, aparentemente a aceptá Halloween cu brasa habrí. Segun un cálculo, casi un tercera parti di hogarnan frances a celebrá e evento aña pasá. E korant italiano La Repubblica ta mencioná cu Italia ta den gara completo dje locura actual cu Halloween. E korant Nordkurier ta declará cu “mas ciudadano [aleman] cu nunca no kier perde nada dje diberticion macabro.”

No ta na Europa so hende ta fasiná cu Halloween. Di Bahámas te Hong Kong, hende ta celebrá Halloween cu smak. E korant International Herald Tribune ta informá cu aña pasá un radio emisora na Sri Lanka a tene un competencia pa haña “e receptnan mas straño di Halloween i e gritunan di morto mas

 escalofriante.” Na Hapon tambe Halloween a cuminsá bira popular. Por ehempel na Tokio nan a tene ‘parada di pampuna’ cu miles di participante.

Asta na partinan di mundu caminda Halloween no ta popular, hopi bes tin fiesta i celebracionnan cu parc’é. Durante Gran Bretania su Anochi di Guy Fawkes, bo por mira trupa di mucha cu ta cana rond pidi placa i haci travesuranan parecido na esnan di Halloween. Na Taiwan, nan tin e colorido Fiesta di Lanterna. Mucha chikitu ta cana rond riba caya cargando lanterna cu ta representá para i bestia. México tin su Día de los Muertos, un celebracion cu a crusa e frontera mexicano-mericano. Segun e escritor Carlos Miller, ainda algun mexicano-mericano “ta bisti mascarada di carpachi trahá di palu cu nan ta yama calacas i ta baila na onor di nan famianan defuntu.”

Mayoria hende ta considerá e celebracionnan ei como nada mas cu diberticion inofensivo, un excuus pa mucha i hende grandi bisti disfras i kita tur frena. Sin embargo, tal punto di bista indiferente ta pasa por haltu dje echo cu e celebracionnan aki ta innegablemente di orígen pagano. Por ehempel, e Fiesta di Lanterna di Taiwan a cuminsá ora hende tabata cende lanterna den un intento pa mira spiritu celestial cu nan a kere tabata zweef den shelu. México su Dia dje Mortonan a originá di un ritual azteca cu a onra e mortonan.

Tin hende lo por argumentá cu orígen di celebracionnan manera esakinan no ta asina relevante. Pero puntra bo mes: ‘Realmente por considerá celebracionnan cu tin un orígen pagano asina como inofensivo?’ Promotornan comercial dje celebracionnan aki sigur no ta wori nan cabes. Relacioná cu Halloween, un representante dje Instituto Cultural di Barcelona, Spaña, a comentá: “Ta un fiesta cu mundu di comercio ta promové.” Figurá bo cu pa aña pasá Merca so a calculá cu Halloween a producí 6,8 mil miyon dollar na entrada. Na Francia, un compania cu ta producí trahe di Halloween su benta a bira 100 bes mas tantu den tres aña so.

Pero abo mester participá den e celebracionnan ei djis pasobra nan ta popular of lucrativo? Como contesta, nos lo analisá e celebracion di Halloween mas djacerca.

[Plachi na página 3]

Carpachi di sucu cu nan ta usa pa México su Dia dje Mortonan

[Rekonosementu]

SuperStock, Inc.

[Plachi na página 4]

Na Gran Bretania, nan ta celebrá Anochi di Guy Fawkes cu candela grandi

[Rekonosementu]

© Hulton Getty Archive/gettyimages