Hóbennan Sa Puntra . . .

Con Mi Por Stop di Preocupá Asina Tantu?

“Un dje cosnan cu ta causa mas tension cerca un persona hóben por ta su futuro. Bo ta preocupá tocante bo mes. Mi mester bai biba riba mi mes? Bai scol? Drenta e ministerio di tempu completo? Casa? Bo tin asina hopi opcion cu bo ta haña miedu.”—Shane di 20 aña.

ABO ta preocupá hopi? Basta hóben ta hacié, i pa vários motibu. Un boletin publicá pa ofrecé mayornan guia, a informá: “Un encuesta mundial recien di tienernan entre 15 pa 18 aña den 41 pais a revelá cu haña un bon trabou ta e preocupacion principal cerca tienernan djawe.” Na di dos lugá ta preocupacion pa e salú di nan mayornan. Miedu di perde un hende cu nan stima tambe tabata entre e motibunan principal cu nan ta preocupá.

Un encuesta dje Departamento Mericano di Educacion a saca na cla cu “e preshon pa haña bon punto” tabata un preocupacion grandi di hopi hóben na Merca. E mésun encuesta a revelá cu hopi hóben ta sinti manera Shane (citá den e introduccion). Un otro hóben cu yama Ashley, ta bisa: “Mi ta preocupá tocante mi futuro.”

Sin embargo, otro hóbennan ta preocupá tocante nan siguridad personal. Segun un encuesta hací na 1996, casi 50 porciento di hóben na Merca a sinti cu nan scol tabata bira mas violento. Mas cu ocho miyon tiener (37 porciento) a informá cu nan conocé un hende cu a ser tirá cu scopet!

Pero no ta tur preocupacion ta di cosnan negativo. Pa hopi hóben nan preocupacionnan di mas grandi tin di haci cu nan bida social. Un revista di Internet dirigí na mayornan ta bisa: “Tienernan ta preocupá si nan mester tin un frei, pero mayoria biaha nan ta preocupá cu nan lo no tin niun amigu mes.” Un mucha muher tiener cu yama Meagan ta lamentá: “Con bo ta parce i actua ‘great’? Mi tin mester di algun amiga.” Den mésun direccion, un hóben cristian di 15 aña cu yama Natanael ta remarcá: “E muchanan na scol ta preocupá tocante style. Nan ta preocupá tocante con nan ta cana, con nan ta papia i con otro hende ta mira nan. Nan tin miedu di parce kens.”

Problema Ta Parti di Bida

Lo ta dushi si nos por a hiba un bida sin preocupacion. Pero Bijbel ta bisa: “Hende, nací di muher, tin un bida corticu i hartá cu molester.” (Job 14:1) Pues problema—i e preocupacion cu ta compañá nan—ta parti di bida. Pero si bo laga preocupacion i ansiedad dominá bo pensamentu, lo bo por haci bo mes hopi daño. Bijbel ta spierta: “Ansiedad den curason  di un homber ta loke lo hacié dobla.”—Proverbionan 12:25.

Un manera pa evitá preocupacion innecesario ta dor di controlá bo propio comportacion. Ana di 16 aña ta bisa: “Hopi di mi compañeranan di klas ta preocupá cu nan lo sali na estado of haña un malesa transmití sexualmente.” Pero abo por evitá e preocupacionnan ei dor di tene firme na e normanan moral di Bijbel. (Galationan 6:7) Asina mes, kisas no ta tur bo problemanan ta asina claramente definí of fácil pa resolvé. Con bo por stop di preocupá tantu asina?

“Preocupá den un Manera Sabí”

Hopi hende ta laga preocupacion paralisá nan. Pero un artículo cu a sali den un revista pa tiener a sugerí cu un hende por “preocupá den un manera sabí” dor di transformá e preocupacion den accion constructivo! Tin hopi principio bíblico cu por yuda bo haci esei. Considerá Proverbionan 21:5: “E plannan di esun diligente ta resultá sigur den bentaha.” Laga bisa cu bo kier tene un get-together cu algun ruman den congregacion. Bon planeamentu por scapa bo di hopi preocupacion. Puntra bo mes: ‘Ken precis mi ta bai invitá? Ki ora mi kier pa nan yega? Ki ora mi kier pa nan bai? Cuantu cos di come i bebe mi mester realmente? Kico ta algun cos leuk cu nos por haci cu tur hende lo gusta?’ Mas atencion bo duna n’e detayenan, mas chens tin cu bo get-together lo bai bon.

Sin embargo, bo por crea preocupacion dor di permití cosnan bira muchu complicá. Jesucristo a duna e conseho aki na un señora cu a molestiá su mes mas di loke tabata necesario pa atendé su huésped: “Pero poco cos ta necesario, of un so.” (Lucas 10:42) Pues puntra bo mes: ‘Kico ta realmente importante pa haci e get-together aki un éxito?’ Tene cos simpel lo por yuda reducí bo ansiedad.

Un otro fuente di preocupacion por ta bo siguridad na scol. Den tal caso kisas bo no por haci muchu cos pa cambia e situacion na scol. Pero bo por dal pasonan práctico pa protehá bo mes. Proverbionan 22:3 ta bisa: “Spiertu ta esun cu a mira e calamidad i a sconde su mes.” Djis evitá lugánan peligroso—no solamente sitionan aislá sino tambe áreanan cu no tin supervision i caminda e muchanan desordená sa bini huntu—por reducí bo chens di haña bo den problema.

Asignacion di scol por ta un otro fuente di preocupacion. Kisas bo tin vários tarea di scol importante i bo ta preocupá cu lo bo no caba nan tur na tempu. E principio na Filipensenan 1:10 ta útil: “Haci sigur dje cosnan mas importante.” Sí, siña wak kico tin prioridad! Saca afó cua asignacion ta esun mas urgente, i haci esei promé. Caba pasa pa e siguiente. Gradualmente lo bo cuminsá sinti cu bo tin e situacion bou di control.

Busca Conseho

Tempu Aaron tabata yong, el a preocupá asina tantu tocante si lo e slag pa su examen di scol cu el a haña dolor den pechu. E ta corda: “Mi a papia cu mi mayornan, i nan a manda mi dokter. Mesora dokter a mira cu mi curason no tabata falta nada, i el a splica mi con ansiedad ta afectá e curpa. Despues mi mayornan a yuda mi realisá cu mi a haci tur loke mi tabata por pa prepará p’e examen i cu awor mi mester a preocupá mas pa soru pa mi curpa. Mi ansiedad a kita, e dolornan den pechu a bai, i mi a traha mi examen bon.”

Si bo ta sinti bo cargá cu preocupacion, no sufri den silencio. Proverbionan 12:25, citá  en parte anteriormente, ta bisa den su totalidad: “Ansiedad den curason di un homber ta loke lo hacié dobla, pero e bon palabra ta loke ta hacié alegrá.” Ta solamente si bo papia tocante bo “ansiedad” bo por haña un “bon palabra” di animacion!

Na promé lugá, lo bo kier papia cu bo mayornan tocante e asuntu; por ta masha bon cu nan tin algun sugerencia. Un otro fuente di sosten ta e personanan spiritualmente maduro den bo congregacion cristian local. Janelle di 15 aña ta conta: “Mi tabata preocupá pasobra mi mester a bai scol secundario, spantá pa e cosnan cu lo mi a topa—droga, sex, violencia—te ora cu mi a papia cu un anciano di congregacion. El a duna mi hopi sugerencia práctico. Mesora mi a sinti mi mihó, pasobra e ora ei mi a realisá cu lo mi por a manehá e situacion.”

No Posponé Cos

Tin biaha tin un cos cu nos mester haci, pero nos ta pospon’é pasobra ta algu cu nos no gusta. Por ehempel, Shevone di 19 aña tabatin un desacuerdo personal cu un ruman cristian. Shevone tabata sa cu e mester a papia cu e ruman dje asuntu, pero el a keda pospon’é. “Mas mi a pospon’é, mas e cos a molestiá mi,” el a confesá. Anto Shevone a corda riba e palabranan di Jesus na Mateo 5:23 i 24 cu ta urgi cristiannan pa resolvé tal problemanan mesora. Segun Shevone: “Ora cu finalmente mi a haci esei, mi a haña alivio.”

Abo ta posponiendo algu: un asignacion desagradabel of un confrontacion incómodo? Wel, atend’é mas pronto posibel, i lo bo tin un preocupacion ménos.

Situacionnan Serio

No ta tur situacion ta ser resolvé asina fácil. Tuma por ehempel e yoncuman Abdur. Su mama tin cancer, i e tin cu mantené tantu su mama como su ruman homber chikitu. Ta mas cu claro cu Abdur ta preocupá tocante e salú di su mama. Pero e ta bisa: “Mi ta saca un les for dje palabranan di Jesus: ‘Cua di boso, dor di ta anshá, por agregá un codo na e duracion di su bida?’ En bes di perde cabes mi ta purba pensa riba e situacion cuidadosamente i determiná kico lo duna e mihó resultado.”—Mateo 6:27.

Keda calmu den un crísis no ta fácil. Tin hende ta bira asina angustiá cu nan ta neglishá nan mes, i ta nenga di come. Sin embargo, e buki Helping Your Teenager Deal With Stress (Yuda Bo Tiener Trata cu Stres) ta spierta cu ora bo priva bo mes di nutricion básico, bo tin “asta ménos capacidad pa resistí e efectonan negativo di stres i ta asta mas vulnerabel pa un malesa grave.” Pues cuida bo curpa. Sosegá bon i come bon.

Bo por haña e alivio di mas grandi dor di sigui e conseho bíblico: “Tira bo carga riba Jehova mes, i e mes lo sostené bo. Nunca lo e permití e hustu tambaleá.” (Salmo 55:22) Shane, citá den e introduccion, tabata anshá tocante su futuro. Segun e ta bisa: “Mi a cuminsá enfocá mas riba e Palabra di Dios i su propósito.” Den poco tempu el a realisá cu su futuro lo ta felis si e usa su bida pa sirbi Dios. (Revelacion 4:11) Shane ta bisa: “Mi a stop di preocupá tocante mi mes. Mi tabatin algu mas importante pa pensa ariba.”

Pues, ora bo ripará cu bo ta preocupá demasiado, busca maneranan constructivo pa trata cu bo problema. Busca conseho maduro. I riba tur cos, presentá bo preocupacionnan na Jehova “pasobra e ta interesá den [bo].” (1 Pedro 5:7) Cu su yudansa, por ta lo bo stop di preocupá tantu asina.

[Plachi na página 29]

Papia tocante bo preocupacion cu bo mayornan

[Plachi na página 30]

Mas lihé bo atendé problema, mas lihé bo por stop di preocupá