Tantu Tempu pa E Madurá!

DJE KORESPONSAL DI SPIÈRTA! NA BOLIVIA

PAKIKO tin bishitante ta kore dos te tres ora for di siudat di La Paz den Andes, krusa parti dje tereno bashí di Altiplano, pa yega te na un área isolá ku yama Comanche? Pakiko tin botániko ta bini for di tur parti di mundu pa bishitá e baranka na haltu aki ku ta keda manera un punta insignifikante den e enorme paisahe?

E kontesta ta: Pa bin mira loke hende a yega di yama e yerba di mas gigantesko i e mata di mas ekstraordinario di Andes⁠—⁠Puya raimondii. Si bo bai den fin di aña, ku un tiki suerte lo bo mira un espektákulo floral eksepshonal ku segun algun hende ta tuma shen aña pa desaroyá.

Den un área di sientos di kilometer, ta aki so Puya raimondii ta krese. De echo, ta na un par di lugá so e tipo di mata straño aki ta krese, i tur ta den e serunan di Andes. Dor ku e no tin ni tronkon ni taki, botánikonan ta kategoris’é komo un yerba. Pero un yerba dje tamaño aki sí bo no a yega di mira nunka! E enorme korona di blachi smal (rosèt), yen di sumpiña (manera di teku) ta mas haltu ku kualkier hende por rèk yega. Si bo wak aden lo bo nota ku e ta un trampa mortal pa para chikitu. Kasi semper tin kadaver seku di para den e espasio smal meimei dje blachinan. Nan ta drenta, kisas pa skapa di un para yagdó, i ta dal pega den e sumpiñanan mortal.

Pero probablemente lo bo haña ku ta e flornan ta e parti mas interesante dje mata aki. Maske bo por haña hopi di e mesun tipo di mata aki den grupo, mayoria bes ta unu òf dos so lo bo topa ta floria, òf kisas niun mes.

Mira e mata gigante aki floria ta un eksperensia emoshonante di bèrdat. Riba su korona di blachi e tin e stèngel di flor di mas largu di tur mata. Un stengel ku por yega te 10 meter di haltura; mas haltu ku un edifisio di tres piso! I na dje tin míles di flor hel. E ta para su so asina, mahestuosamente, ankrá den baranka, i komo si fuera purbando di mishi ku shelu.

 Pero lamentablemente, Puya raimondii ta den peliger di ekstinshon. Pa un òf otro motibu, hende gusta pega e mata aki na kandela. No ta sigur si nan ta hasié djis p’e prèt di mira un flambeu gigantesko, pa haña kalor ora temperatura ta hopi abou, òf pa miedu ku nan karnénan ta pega den su blachinan ku sumpiña i muri. Sin embargo, e mata aki ta keda bibu maske e kima òf fris, i e ta soportá bientu fuerte, solo kayente i falta di tera. Kon esei ta posibel?

Puya raimondii ta forma parti di un famia grandi di rònt di 2.000 espesie ku aparentemente a spesialisá nan mes den sobrebibí na lugánan ku otro mata ta muri, esta, bromelia. Ta un tipo di bromelia so tin ku ta krese otro kaminda ku no ta n’e kontinente amerikano. Meskos ku Puya raimondii, hopi di nan tin rais ku ta sirbi prinsipalmente pa tene nan na nan lugá. Nan tin manera skama mikroskópiko riba nan blachi pa nan apsorbá humedat for di aire na lugá di sak’é for di suela. Ademas, ora awa kai òf serena baha, e ta lèk den un reserva di awa ku ta sirbi pa e mata, pero tambe pa yen di bestia chikitu. Sin embargo, Puya raimondii ta e bromelia di mas grandi.

Loke ta hala atenshon na e “reina di Andes” aki, manera hende a yega di yam’é, ta e tempu eksepshonalmente largu ku ta tuma pa e madurá i saka flor. Un botániko renombrá a konta e markanan riba blachi di un dje matanan aki ku a muri, i a kalkulá ku e mester tabatin 150 aña. Otronan ta bisa ku ta 70 aña so e ta biba. Hende lokal ta yama nan mata sentenario, dor ku nan ta kere ku ta tuma 100 aña pa nan kuminsá saka flor. Na aña 1986 na California, pa di promé bes un dje matanan aki ku hende mes a planta for di simia a saka flor. E tabatin 28 aña so plantá. Loke sea ta e bèrdat en kuanto esnan ku ta krese haltu den Andes, echo ta ku nan ta tarda hopi tempu pa madurá.

[Plachi na página 14]

Kon ta posibel ku e gigante “Puya raimondii” por krese den asina tiki tera?

[Plachi na página 15]

E míles di flor di “Puya raimondii” ta atraé masha hopi para

[Plachi na página 15]

Un “Puya raimondii” ku a sobrebibí un kandela