Opservando Mundu

“Mangel” pa Para

‘Un mata di Brazil ta usa un strategia ku te ku awor tabata deskonosí, pa oumentá su porsentahe di polinashon,’ segun e korant aleman GEO. En bes di un bebida di nektar líkido, e mata Combretum lanceolatum ta ofresé su bishitantenan “mangel.” Di anochi pa mainta e flornan di e mata aki ta produsí pipitanan di gelatina zut ku ta bira klòmpinan duru di un diameter di mas o ménos 6 milimeter. Suku di mata ta hasi e gelatina zut, i segun investigadónan e ta smak “un tiki manera ‘jelly babies,’ ” un tipo di mangel komersial ku sabor di fruta i den forma di ber. E informe ta splika ku “ora solo sali i e flor habri su pétalonan, e mangelnan lombrante i transparente ta kla poné komo si fuera riba un teblachi.” E delisia aki ku e flornan ta produsí ta atraé por lo ménos “28 sorto di para for di ocho famia.” Segun ku e paranan ta sigui buska kuminda i ta bai di mata pa mata, nan ta keda tur na e polen, i asina nan ta yuda e mata plama mas lihé.

Bula Mas Saludabel

Pa bo tin un vuelo mas plasentero, e korant di Siudat di Mèksiko, El Universal, ta sugerí lo siguiente: (1) Komo ku aire den kabina di avion sa ta masha seku, bebe hopi líkido. (2) Aire seku por iritá bo wowonan, p’esei bisti brel na lugá di lèns di kontakto. (3) Hasi ehersisionan simpel den bo stul pa relahá bo múskulonan i stimulá sirkulashon den bo pianan. (4) Ratu-ratu lanta kana den gang. (5) Bisti sapatu ku ta fásil pa kita, i usa algu pa pone bo pianan ariba, tal bes bo hèntbèg. (6) Bisti paña kómodo ku no ta machiká, di tela ku fibra natural ku ta laga bo kueru hala rosea. (7) No bebe alkohòl, òf bebe un kantidat moderá, pasobra mas haltu e avion ta bula mas esei ta oumentá e efekto di alkohòl. (8) Ahustá e èrko pa e no supla riba bo pal’i garganta ni den bo lomba. (9) Purba drumi, preferiblemente usando algu pa tapa bo wowonan kuné. (10) Kou algu ora e avion ta lanta i ora e ta baha pa aliviá e preshon den bo orea. Bo por duna beibi un chupon.

Muchanan Malkriá na Alemania

Hende a ripará ku serka mayornan tin ‘un tendensia nobo di hasi loke muchanan kier,’ segun Udo Beckmann, presidente di un sindikato di maestronan na Alemania. Segun e korant Südwest Presse, Beckmann a bisa ku mas i mas mucha ta ser malkriá sinfin, i komo resultado, nan no ta dispuesto pa hasi nan bèst na skol. “El a deklará ku ta masha normal pa mayornan sinti ku hùiswèrk ta pone ‘demasiado preshon’ riba nan yunan i ku ta ‘irasonabel’ pa eksigí ku muchanan mester siña pa prufwèrk.” Tambe e informe ta bisa ku ora mayornan konstantemente ta hasi loke nan yunan kier, djis pa evitá konflikto, e mayornan ta priva e yunan di “e chèns di hiba un bida responsabel.” Segun Beckmann, muchanan malkriá ta krese bira “adultonan egoista” ku kier tur kos pero ku no ta dispuesto pa traha pa nada.

Lesamentu di Beibel na Fransia

Ounke 42 porshento di franses ku nan a entrevistá tabatin un Beibel, ta 2 porshento so a bisa ku nan ta les’é kasi tur dia, segun un enkuesta publiká den e korant katóliko La Croix. Setentidos porshento ta bisa ku “nunka nan ta lesa Beibel.” Di esnan entrevistá, 54 porshento a konsiderá Beibel “un buki antikuá” ku “no ta na armonia ku mundu moderno.” E informe ta splika ku “na promé lugá fransesnan ta konsiderá Beibel for di un punto di bista kultural,” i ta analis’é pa nan haña un splikashon di “e orígen di hudaismo i kristianismo.” La Croix ta deklará ku “tur aña, nan ta bende rònt di 250.000 Beibel i 30.000 Tèstamènt Nobo na Fransia.”