Usando Tera Su Energia

DI E KORESPONSAL DI SPIÈRTA! NA FILIPÍNAS

Bou di e superfisie di tera tin un tesoro inmenso. Loke esaki ta produsí no ta oro, plata ni piedra presioso. Mas bien, ta trata aki di un depósito grandi di kalor ku yama energia geotérmiko.

GRAN parti di e kalor aki ta den kapanan di baranka di smèlt òf magma bou di tera. E kalor den tera en bèrdat ta un tesoro pasobra e ta un fuente limpi di energia ku tin vários bentaha riba zeta, karbon, gas natural i energia atómiko.

E temperaturanan leu aya bou di tera ta sientos i asta míles di grado Celsius. Segun kálkulonan, e kantidat di kalor ku hende ta saka pa aña for di e parti interior di tera ta hopi mas tantu ku e koriente ku hende ta usa rònt mundu. Sin duda, un kantidat inkreibel di energia! Tòg ta difísil pa utilisá e tesoro aki.

E Manera pa Yega n’e Tesoro

Parti di e kalor di tera ta hopi serka di e superfisie di suela. Por saka e kalor aki ku pòmpnan spesial ku ta konektá na tubunan ku ta kore bou di tera. Por usa e energia saká aki pa keinta kasnan den wenter òf pa hasi otro trabou útil. Ademas, hende ku ta biba banda di fuentenan di awa kayente òf otro áreanan ku tin aktividat geológiko por a usa e kalor disponibel for di tera den mas manera. E romanonan di ántes, por ehèmpel, tabata usa e fuentenan di awa kayente komo bañonan públiko.

Mayor parti di kalor ta konsentrá bou di e kaska di tera (aardkorst), den un kapa òf mantel. E kaska aki ta mas o ménos 35 kilometer hundu komo promedio. E teknologia aktual ainda no a permití hende bora dje hundu ei. Sin embargo, e kaska aki ta konsistí di un par di kapa movibel i e ta mas fini na sierto áreanan, espesialmente kaminda e kapanan ta topa otro. Na e partinan aki magma por logra yega mas serka di e superfisie di tera i keinta e awa ku ta den e kapanan di baranka. Hopi bes e awa aki ta djis dos òf tres kilometer bou di e superfisie di suela. Aki sí hende por yega fásilmente ku nan téknika moderno di bora. Nan por saka e awa kayente aki anto hasi bon uso di dje. Laga nos wak kon.

Hasiendo Bon Uso di e Kalor

Na nivel di laman, awa ta herebé na un temperatura di 100 grado Celsius. Pero bou di tera, preshon ta hopi mas haltu, i awa ta keda líkido na temperaturanan mas haltu. * Kaminda nan topa awa ku ta mas ku 175 grado Celsius, por usa e awa aki pa pone generator eléktriko funshoná.

Hopi bes ta haña awa ku tin temperatura haltu den áreanan kaminda resientemente tabatin aktividat volkániko, manera den e Renchi di Kandela den Oséano Pasífiko, un region di volkan tantu aktivo komo inaktivo den e área di Pasífiko. E pais Filipínas ta situá den e renchi aki. I den añanan resien hende a hasi hopi progreso einan den e proseso di saka energia geotérmiko pa por produsí elektrisidat. Sí, Filipínas a bira un di e paisnan ku ta produsí mas tantu koriente via energia geotérmiko na mundu. Mas ku 20 porshento di tur e elektrisidat ku nan ta usa den e pais aki ta bin di e fuente aki.

Pa nos haña sa mas tokante kon elektrisidat ta wòrdu produsí for di kalor di tera, Spièrta! a bishitá un fasilidat geotérmiko grandi ku yama Mak-Ban, den e provinsia filipino, Laguna. E planta aki tin kapasidat pa generá 426 megawòt di koriente. Laga nos ban wak un ratu kon nan ta hasi esaki.

 Un Bishita na e Planta Geotérmiko

Ora nos baha for di e kaminda grandi prinsipal, un otro kaminda ta hiba nos na un área geotérmiko. Segun ku nos ta aserká e planta riba e tereno aki, nos ta drenta un área kaminda nos ta mira un kantidat di tubu grandi di stom ku ta kore for di e posnan geotérmiko te na e planta ku ta produsí koriente. Ainda tin mas tubu ku ta trese stom for di e posnan riba e seritunan den serkania. Kada tantu meter tin loop den e tubunan. Nos a haña sa ku esaki ta pa e tubunan grandi por span i kremp segun ku nan ta keinta i fria.

Banda di e pueblo tin e ofisinanan di Philippine Geothermal, Inc., i einan e manager di planta Roman St. Maria ta duna nos un bonbiní. Mesora Roman ta kuminsá duna nos un tour na e sitio.

Den serkania di e ofisinanan tin algun pos di produkshon. Roman ta bisa: “Nos ta usa e mesun teknologia ku nan ta usa pa bora posnan di zeta, e úniko diferensia ta ku e burakunan ta mas hanchu.” E ta sigui bisa: “En realidat, e posnan ta bira e kanalnan via kua awa kayente bou di preshon i stom ta wòrdu tresé ariba. I esei ta e produkto ku nos ta manda pa e planta di koriente.” Tin dos pos den serkania ku ta masha serka di otro. Ora nos puntra dikon, nos guia ta splika: “Ta riba tera so nan ta serka di otro. Bou di tera, un ta bai stret abou. E otro ta permití nos kontrolá e direkshon den kua e ta bai. Esaki ta nesesario pa motibu ku tereno ta karu. Dor di bora pos banda di otro nos ta logra baha gastu.”

Nos kier a haña sa mas tokante e proseso, p’esei nos a puntra: “Nos a lesa ku boso ta usa teknologia di flash-steam na e sitio aki. Kiko esei ta nifiká?” Roman ta splika: “E pos mas hundu ku nos tin aki ta alrededor di 3.700 meter. Awa kayente ta bou di preshon haltu ora e ta hopi hundu. Pero ora bo tres’é ariba, e preshon ta baha i mayoria di e awa ta bira stom rápidamente. Ta esei nan kier men ku ‘flash,’ i ta di einan e nòmber teknologia di flash-steam a bini.”

Na final di e tubunan ku ta sali for di e posnan tin e separadó. Aki e stom ta wòrdu separá for di e awa kayente. Pero ainda e stom no ta kla pa generá koriente. Roman ta amplia: “Ta keda drùpel di awa den e stom ku ta sirkulá. E drùpelnan aki ta kontené mineral ku por pega riba e turbina i dañ’é. Despues ku e stom kaba di pasa den e separadó e ta bai den un purifikadó. E aparato aki ta saka e drùpelnan ku a keda.”

Nos guia ta mustra nos tubunan grandi di isolashon dor di kua e stom sin drùpel di awa ta pasa pa bai na e planta ku ta generá elektrisidat, mas o ménos un kilometer leu. Ya ku na kaminda un tiki di e stom ta fria bira líkido, e stom ta pasa un biaha mas dor di un proseso pa saka drùpel di awa promé ku e drenta e turbina ku ta pone e generator funshoná.

Awor nos ta yega na punta di un seru kaminda bo por mira henter e área kaminda tin e awa kayente bou di tera. “Henter e tereno den e área aki ta mas o ménos shete kilometer kuadrá,” Roman ta señalá. E ta sigui bisa: “Aki nos tin 102 pos, di kua 63 ta pos di produkshon. Hopi di e otronan ta pos di reinyekshon. Nos siguiente pregunta ta: “Kiko ta pos di reinyekshon?” Roman ta kontestá: “Nos ta generá asina tantu awa kayente i stom pa ora, ku mester manda e awa ku a wòrdu separá bèk den e reserva di suela pa no hasi daño na medioambiente. Shen porshento di e líkido ku sali ta wòrdu reinyektá (mandá bèk den suela).” Nos a haña sa ku e proseso aki di manda e awa bèk den tera ta konserbá e kampo geotérmiko.

Kon e planta di koriente geotérmiko ta afektá e aparensia general di e área? Loke ta e evidensia mas notabel di su eksistensia ta e stom ku ta sali di e planta di koriente. Fuera di esei ta palu di koko i otro mata so bo ta mira. Tambe tin hopi kas abou den e vaye. Ta parse ku si tin un bon maneho, por usa energia geotérmiko pa produsí koriente kaminda tin hende ta biba sin hasi daño na e medioambiente.

Instalashonnan manera esun ku nos a bishitá ta usa solamente stom ku temperatura haltu pa generá koriente. Sin embargo, resientemente ekspertonan a hasi esfuerso pa saka energia for di líkidonan ku ta ménos di 200 grado Celsius. Komo resultado, nan a desaroyá un teknologia ku yama binary-cycle. E método aki ta usa e líkido kayente saká for di tera pa pone un otro líkido vaporisá, ku na su turno ta pone un sistema di generator i turbina funshoná.

Bentaha i Desbentaha

Energia geotérmiko tin su bentahanan. Paisnan ku ta produsí koriente di e fuente aki ta dependé  ménos di petrolio. Kada dies megawòt di elektrisidat generá pa aña ta nifiká ku por spar 140.000 barí di krudo pa aña. Ademas, fuentenan geotérmiko ta inmenso, i e chèns di por kaba ta hopi mas chikitu na komparashon ku hopi otro fuente di energia. E problema di kontaminashon tambe ta baha masha hopi mes. Banda di esaki, produkshon di energia geotérmiko ta muchu mas barata kompará ku hopi otro forma di energia.

Di otro banda tin algun prekupashon relashoná ku medioambiente. Stom geotérmiko hopi bes ta kontené zwavelwaterstof, ku ta venenoso ora e ta na gran kantidat i iritante ora e ta poko pa motibu ku e ta manda holó di suafel. Sin embargo, e proseso pa deshasí di dje ta efikas i mas efisiente ku e sistemanan pa limitá huma di plantanan di koriente ku ta usa kombustibel, karbon òf gas. Ademas, partíkulanan di e desperdisio por tin un kantidat chikitu di arseen òf otro supstansianan venenoso. Dor di manda esakinan bèk den tera, e peliger ta keda na un mínimo. Si no seal posnan geotérmiko bon te den profundidat dor di usa pipa di stal i semènt, nan lo por kontaminá fuentenan di awa.

Nos Kreadó a duna nos un planeta ku un variedat di tesoro. Energia geotérmiko ta djis un di esakinan. I ta awor hende a kuminsá siña kon pa us’é. Desaroyonan den futuro sin duda lo yuda nos mira kon pa usa nos tesoronan na un manera mas benefisioso i na e mesun momentu kuida e tera magnífiko ku a wòrdu konfiá na nos.​—⁠Salmo 115:⁠16.

[Nota]

[Diagram/Plachinan na página 15]

(Pa e teksto den su formato kompleto, wak e publikashon)

Planta geotérmiko Mak-Ban, Filipínas (Imágen simplifiká)

Boor-toren

↓

Reserva geotérmiko

Kabelnan di elektrisidat

↑

Transformator

↑

Generator

↑

produkshon pos → Separadó → Stom → Purifikadó → Purifikadó → Turbina

↓ ↓

Awa brak → Pos di reinyekshon ← Awa ← Toren di fria

↑ ↓

Reserva geotérmiko

[Plachinan]

POS DI PRODUKSHON

TUBERIA DI STOM

PLANTA DI ELEKTRISIDAT

[Rekonosementu]

Hòmbernan ta habri valf di stom na página 13: Kortesia di Philippine National Oil Corporation; tuberia na página 13 i un mirador i un mapa di e planta ku ta generá elektrisidat na página 15: Kortesia di National Power Corporation (Philippines); pos di produkshon i tuberia di stom na página 15: Kortesia di Philippine Geothermal, Inc.