E Batidónan di Paña di Bamako

HENTER dia bo por tende un batimentu rítmiko na Bamako, kapital di e pais Mali na Wèst Áfrika. Sin embargo, no ta músikonan ta toka. E zonido manera tambú ta sali mas bien for di e hùt chikitu di e batidónan di paña. Pero dikon nan ta bati paña?

Na e pais aki nan ta traha tela di paña na un manera straño. Den e último parti di e proseso nan ta bati e tela. Tur kos ta kuminsá ku un pida paña òf un artíkulo di paña blanku. Generalmente nan ta tinzj’é ku vários koló i hinka dibuho den dje. Despues nan ta dòp e den un líkido diki trahá di yuka raspá òf lechi di vários palu ku ta saka lechi manera palu di mespel. Ora e tela seka den solo e ta bira steif manera un tabla. N’e momentu aki e ta kla pa e último fase, serka e batidónan di paña.

E trabou prinsipal di e batidónan di paña ta pa bati e tela ku ta steif awor te ora saka tur machiká. Den nan hùtnan chikitu ta masha normal pa bo haña dos yònkuman sintá dilanti otro; entre nan tin un pida stam di palu di shea. E hòmbernan ta hunta e tela ku un tiki was i ta habrié riba e palu. Despues nan ta bati e tela ku un tipo di martin ku tambe ta trahá di palu di shea. Nan ta bati e tela bùrt pa bùrt den un armonia perfekto. Kaminda esun salta e otro ta bati i kaminda esun bati e otro ta salta.

Dikon nan no ta usa djis un heru di strika? Un motibu ta ku e kayente di e heru di strika por pone e paña pèrdè koló mas lihé. Huntu ku esei, un heru di strika lo no produsí kolónan bibu manera e batidónan di paña sí ta produsí. Esei ta asina pasobra kada sla di martin ku nan dal ta duna e tela un brio ku ta hasi e koló mas bibu. Despues ku nan kaba di bati e tela kompleto, e por bria asina tantu ku bo por kere ku ta kaba a kaba di tinzj’é.

Pues, si bo ta kana den e kayanan di e stat aki i bo tende un zonido ku ta parse zonidu di tambú, wak e hùtnan rònt di bo bon. Kisas no ta niun zonido di tambú; podisé ta e batidónan di paña di Bamako.