Vania—Un Ingrediente ku un Historia Largu

DI E KORESPONSAL DI SPIÈRTA! NA MÈKSIKO

E ASTEKANAN a yam’é tlilxochitl, “flor pretu,” refiriendo n’e koló dje fruta prosesá. Nan tabata tira vania den nan bebida di kakou xocoatl, òf chukulati, pa drecha su smak. Montezuma, emperadó asteka di Mèksiko, supuestamente lo a sirbié na e konkistadó spañó Hernán Cortés na aña 1520. Anto Cortés a introdusí kakou i bonchi di vania na Europa. Chukulati kayente ku sabor di vania a kuminsá hasi furor den palasionan europeo, pero ta te na aña 1602 Hugh Morgan, botikario di Reina Elisabeth I, a bini ku e idea pa usa vania komo ingrediente pa duna smak na otro kos. Despues, den añanan 1700 i piku, a kuminsá usa vania den bebida alkohóliko, tabako i perfume.

Sin embargo, hopi tempu promé ku e Imperio Asteka a eksistí, e indjannan totonak di Veracruz, Mèksiko, tabata planta, kosechá i prosesá bonchi di vania. * Ta te na kuminsamentu di añanan 1800 e mata di vania a ser hibá Europa pa ser kultivá aya i for di ei p’e islanan di Oséano Indio. Pero e intentonan di kunukeronan pa laga e mata pari a duna masha poko resultado, prinsipalmente pa motibu di ousensia dje abeha, famia di Melipona, ku ta polinisá e mata aki. Esei a pone ku Mèksiko a mantené su monopolio riba e komersio di vania for di siglo 16 te siglo 19. Na 1841, Edmond Albius, un èks-katibu dje isla franses di Réunion, a perfekshoná un método práktiko pa polinisá e flornan na man pa por produsí bonchi di vania. Esaki a hiba na e kultivashon komersial di vania pafó di Mèksiko. Awe e produktornan grandi di bonchi di vania ta e islanan ku un tempu tabata pertenesé na Fransia, manera Réunion i Komóros. Madagaskar ta e produktor prinsipal.

Kultivo di Vania

En realidat, bonchi di vania ta fruta di un orkidia. E orkidia di vania ta e úniko di e mas ku 20.000 tipo di orkidianan ku ta produsí algu komibel. E ta un tipo di mata ku ta rama ku mester di un kos pa want’é i e mester di un tiki sombra tambe. Generalmente den naturalesa e ta krese riba palu den mondi tropikal situá den áreanan plat i húmedo. Na Mèksiko, plantashonnan tradishonal ta usa mata nativo, manera pichoco, pa wanta e ramanan, pero resientemente nan a kuminsá usa palu di apelsina pa esaki ku basta bon resultado.

Orkidia di vania ta produsí flor hel-bèrdè manera was ku ta sali na tròshi. Kada flor ta habri solamente un dia pa aña, anto pa un par di ora so tambe. Ta algu fasinante pa mira e indjannan totonak hasi e trabou delikado di polinisá e flornan. Nan ta polinisá djis un par di flor di kada tròshi pa no kaba ku tur e energia dje mata, loke por debilit’é i hasié vulnerabel pa enfermedat. For di esakinan ta sali e baliñanan, òf bonchinan largu bèrdè ku ta kontené simianan masha chikitu. Un seis pa nuebe luna despues nan ta kosechá nan na man promé ku nan hecha kompletamente.

Kon pa Prosesá Bonchi di Vania

Ata un kos interesante aki. Bonchi di vania fresku no tin smak ni aroma. Mester pas’é den un proseso ekstenso pa saka e vanillin, ku su aroma i sabor úniko. E proseso aki kombiná ku e echo ku mester polinisá e flornan na man ta hasi vania un dje ingredientenan mas kostoso. Na Mèksiko, siguiendo e proseso tradishonal, nan ta plama e bonchinan riba un laken koló skur den solo pa kuminsá seka nan. Awendia ta mas komun pa kuminsá seka e bonchinan den fòrnu. Kaba ta pone e bonchinan den kahanan spesial lorá den laken i esteras, òf mat, pa nan ‘soda.’ Despues ta bolbe seka nan den solo i soda nan den paña vários biaha pa un par di dia te ora e bonchinan haña un koló di chukulati maron skur. Siguientemente, ta pone e bonchinan den e kahanan pa nan soda, òf riba un kama kubrí ku papel di was pa nan seka lentamente na e temperatura di ambiente pa rònt di 45 dia. Despues ta kondishoná e  bonchinan pa rònt di tres luna den kahitanan será pa desaroyá nan aroma kompleto. Pues, produsí vania ta eksigí basta trabou.

Vania Natural òf Artifisial?

Tambe hende a yega di produsí vanillin sintétiko for di sas di palu. Ora bo lesa e etikèt di produktonan supuestamente trahá di vania lo bo keda sorprendí. Na Merka por ehèmpel, ora e etikèt di eiskrim ta bisa “vanilla,” e ta trahá for di ekstrakto puru i/òf bonchi di vania. Ora e etikèt tin “ku sabor di vania” e por kontené te 42 porshento di sabor artifisial, i etikèt ku “sabor artifisial” ta kontené solamente imitashon di sabor di vania. Pero un gastrónomo lo bisa bo ku no tin supstituto pa e sabor di berdadero vania.

Mèksiko no ta un produktor importante di vania mas. Faktornan manera destrukshon dje selvanan di yobida kant’i kosta i e inundashonnan mas resien a afektá su produkshon. Tòg, ainda e ta poseé un tesoro balioso: e base genétiko di mata di vania. * Pa tradishon, nan ta konsiderá e aroma i smak di vania mèksikano superior. Turistanan ta demostrá esei pasobra hopi bes nan ta bai n’e tiendanan na frontera i establesimentunan liber di impuesto na airopuertonan di Mèksiko pa kumpra ekstrakto di vania natural na preisnan komparativamente barata. E siguiente biaha ku bo purba un eiskrim trahá di vania natural, pensa riba su historia largu i e trabou enbolbí pa produsié, anto saborié!

[Nota]

[Plachinan na página 25]

Un indjan totonak ta polinisá flor (banda robes) i un otro ta selektá bonchi di vania despues di prosesá nan (banda drechi). Orkidia di vania (abou)

[Rekonosementu pa Potrèt na página 25]

Copyright Fulvio Eccardi/vsual.com