Ata e Parada di Pingwin Enano!

DI E KORESPONSAL DI SPIÈRTA! NA OUSTRALIA

E MULTITUT ta ketu i den ekspektativa. Wowonan atento ta fiha den distansia pa purba haña e promé bista di e artistanan estelar. E esenario iluminá ku lus grandi ta haña bida ora ku diripiente un figura chikí ta aparesé na rant di e playa. Un murmuro di eksitashon ta zona entre e multitut ora ku un par di figura mas ta djòin esun promé. Ta komienso di e show di tur anochi. Ata e parada di e pingwin enano di Phillip Island a start! *

Pingwin a bira konosí internashonalmente den siglo 16 ora ku e famoso eksploradónan Vasco da Gama i Ferdinand Magellan a nabegá den e oséanonan grandi di sùit. Na prinsipio hende no tabata sa presis kon pa klasifiká pingwin. E tin pluma manera un para, e ta landa manera piská i e ta kana riba tera seku. Finalmente, ta su pluma a disidí e asuntu. Ta para so tin pluma, pues e mester ta un para. E famia aki di para ku no ta bula ta konsistí di 18 sorto. Nan ta varia for di e mahestuoso pingwin emperador i pingwin Adélie di Antártika te na e pingwin di Galápagos ku ta biba serka di evenar.

Lo bo tin gana di bishitá un kolonia di pingwin den nan ambiente natural? Wèl ban Phillip Island, un 140 kilometer so sùitost di e stat moderno Melbourne, Oustralia. Rònt di 500.000 bishitante ta basha bai tur aña einan pa gosa di e maravia na miniatura aki. Kiko ta hasi e pingwinnan enano di Phillip Island asina enkantador?

“Kiut, Pero Yen di Zjeitu”

Hende ta keda enkantá mesora ku pingwin enano ora nan mira nan dèftu bistí ku nan pluma pretu ku blanku. Ku un haltura di 33 centimeter i pisando solamente un kilo, nan ta e sorto di pingwin mas chikí na mundu. Pero no laga nan tamaño gaña bo! Loke nan falta na estatura nan ta kompensá ampliamente ku nan determinashon i perseveransia.

“Pingwin enano ta kiut, pero yen di zjeitu,” segun profèser Mike Cullen, kende tin mas ku 20 aña ta studia pingwin na e kolonia di Phillip Island. E pingwinnan di mas chikí aki ta esnan ku ta hasi mas bochincha tambe. Anochi e kolonia ta resoná ku tur tipo di gritu i zonidu segun ku e pingwinnan ta defendé nan nèshi kontra intruso, ta purba hala atenshon di un futuro partner òf ta “train den koro” huntu ku nan partner.

Ora ku na aña 1780 nan a deskribí pingwin enano pa promé biaha, aptamente nan a ser yamá Eudyptula minor, for di un palabra griego ku ta nifiká “bon sambuyadó chikí.” Nan kurpa ta aerodinámiko, forma di torpedo, nan plumanan ta suave i waterproef i nan alanan ta manera zwemvin. P’esei ora nan ta landa, ta parse manera kos ku literalmente nan ta bula dor di awa.

Un “Life Vest” Perfekto

Den nan búskeda pa kuminda, e pingwinnan aki por landa te ku 100 kilometer pa  dia, kedando riba laman pa dianan òf simannan largu si ta nesesario. Kon nan ta drumi riba laman? E kontesta ta sinta den nan plumanan ku tin un diseño remarkabel. Pingwin tin un kapa diki di dòns i nan plumanan ta hopi pegá riba otro, tres pa kuater biaha mas denso ku pluma di para ku ta bula. E aire ku tin bou di e plumanan ei ta protehá e para su kurpa i ta pone ku e por keda drif, kasi meskos ku un ‘life vest.’ P’esei, fásilmente un pingwin por drumi den laman. E ta keda drif manera un kòrki, ku su zwemvinnan di span pa stabilis’é, i boka ariba.

Klaru ku asta e pluma diki di pingwin lo no tabata un protekshon si e ta muha ku e awa friu den kua e ta buska kuminda. Pero esei no ta un problema, pasobra e tin un klir spesial di zeta ariba di su rabu ku ta saka un waks líkido. E pingwin ta usa su pik pa hunta su plumanan ku e waks aki, i esaki ta tene nan waterproef, limpi i salú. Ningun sambuyadó lo por tin un dùikpak mihó diseñá pa biba den laman.

E falta di awa dushi den laman ta forma un problema pa e kriatura aki ku ta nabegá den oséano? Nò, pasobra e tin dos klir úniko, un riba kada wowo, ku ta saka e salu for di awa di laman. E pingwin simplemente tin ku sagudí su boka anto e salu indeseá ta sali for di kada buraku di nanishi.

Ademas, e wowonan di pingwin ta spesialmente diseñá pa mira mes bon bou di awa komo riba awa. Ta bisto pues ku e kriatura aki ta perfektamente ekipá pa su bida den laman. Pero afortunadamente, pingwin no ta pasa henter nan bida den laman.

Nan Konekshon ku Tera Seku

Phillip Island i e tera firme no muchu leu, tin un kosta di santu, kubrí ku yerba i mata. Esaki ta forma un lugá ideal pa e kolonia di 26.000 pingwin enano biba. Bida di pingwin ta kuminsá den un nèshi ku e mayornan a traha duru pa koba den un seru di santu ku tin kantu di kosta. Un webu ku e mama pone por keda friu pa vários dia promé ku e mayornan kuminsá brui e, i tòg e webu ta keda ku bida aden. Nan dos ta tuma turno pa brui e webu ku masha dedikashon. Esnan ku ta brui webu tin loke nan ta yama un broedvlek, un lugá spesial parti abou di nan barika ku tin hopi ader. E adernan di e broedvlek aki ta hincha ku sanger kayente ora nan ta brui e webu, i asina ta pasa e kayente nesesario pa e webu desaroyá. Ora no ta un mayor su turno pa brui e webu, e hinchá ta baha, lokual ta laga e plumanan sera riba otro atrobe i reanudá nan trabou di protehá su kurpa kontra awa i esei ta permití e para bolbe bai laman pa buska kuminda.

Unabes e puitu sali for di webu, e ta krese na un velosidat fenomenal. Den solamente ocho pa dies siman, e yu di pingwin tin e tamaño di un adulto i ta kla pa subi laman. E buki Little Penguin​—⁠Fairy Penguins in Australia ta bisa: “Ta remarkabel ku pingwin hóben ta sali pa hasi biahenan largu riba laman ekipá ku solamente un kurpa  salú i ku ta funshoná bon . . . i un sèt di instinto ku ta yuda nan sobrebibí.”

Durante e próksimo un pa tres añanan, pingwinnan hóben ta biaha míles di kilometer, pasando gran parti di nan tempu den laman. Esnan ku sobrebibí por lo general ta regresá nan kolonia original pa brui, na un distansia di te ku 500 meter for di kaminda nan a nase. Kon nan por sa e kaminda pa yega kas? Tin hende ta bisa ku pingwin ta orientá riba solo, usando un oloshi biológiko natural ku ta kompensá e echo ku solo no ta keda mesun kaminda den shelu. Otro hende ta kere ku pingwin ta rekonosé markanan geográfiko konosí. Di tur manera, ta e espektákulo di e nabegantenan aki ora nan regresá tera seku despues di un biahe largu òf despues di a pasa un dia duru ta piska, ta loke ta atraé multitut di hende na Phillip Island.

Laga e Parada Kuminsá!

Asina ku solo baha, sientos di bishitante tur eksitá ta tuma nan posishon, kla pa wak e parada di pingwin ku ta tuma lugá tur anochi. Ya e pingwinnan tin basta ratu reuní dilanti kosta, formando gruponan grandi di sentenáres di para. E playa ta iluminá ku vários lus grandi. Tin un bientu suave ta supla, i olanan chikí ta yega kantu. E ouditorio ta kuminsá duda. Unda e pingwinnan a keda? Nan lo bin kantu? Nèt e ora ei, e promé pingwinnan enano ta aparesé i ta lastra pia un poko nervioso kantu di laman. Diripiente un kos ta spanta nan i nan ta bolbe drenta laman. Komo ku nan tin ku tene kuidou ku bestia yagdó, manera águila, e pingwinnan ta sumamente alerta. Djis despues nan ta bolbe aparesé i pokopoko nan ta haña mas konfiansa. Finalmente, un pingwin balente ta sali for di awa i ta krusa e playa ku paso firme rumbo pa e protekshon di e serunan di santu. E otronan den e grupo ta siguié umbes. Ignorando e lusnan i mirónes, nan ta marcha riba e playa, dunando e impreshon di un parada animá.

Ora e pingwinnan yega na e siguridat di e dùinnan, bo por nota ku nan ta relahá i ta reuní den gruponan grandi pa drecha nan pluma. Grupo tras di grupo ta krusa e playa di e manera aki, parando de bes en kuando pa “kòmbersá” ku bisiña promé ku nan sigui kana bai kas. Pa algun di nan e kaminata ta difísil, pasobra nan tin ku subi un klep di 50 meter promé ku nan yega nan hòl.

Pingwin Enano Tin Problema Grandi

Meskos ku otro kriaturanan na mundu, pingwin enano ta konfrontá un kantidat di problema, i hopi di nan tin di haber ku hende. E menasanan ta entre otro, derame di petroli for di barkunan ku ta pasa, ménos lugá di biba debí na aktividat humano i bestianan yagdó ku hende a introdusí den nan teritorio, manera vòs i bestia di kas.

Hende a hasi esfuersonan digno di elogio pa trata ku e problemanan aki, i den último añanan e kantidat di pingwin enano den e Reservat di Pingwin di Phillip Island a stabilisá. Profèser Cullen a komentá: “Nos ta ganando e bataya . . . pero pokopoko.” El a agregá: “E desafio di mas grandi ku nos ta konfrontá awor ta di hasi sigur ku pingwin enano ta sigui haña kuminda . . . , i esaki ta ligá ku e destino di e oséanonan i di humanidat den su totalidat.” E efekto ku kalentamentu mundial i susesonan di klima, manera El Niño, tin riba e suministro di kuminda den oséano ta kousa problemanan grandi ku investigadónan ta studiando intensivamente.

E resultadonan di e investigashon aki sin duda lo oumentá nos apresio pa e planeta frágil pero yen di variedat ku nos ta biba ariba. Danki na e kuido tierno ku ya kaba hende ta duna na bestia den naturalesa riba Phillip Island, abo tambe un dia lo por tin e chèns di ta entre e mirónes ku ta flùister tur eksitá: “Ata e parada di pingwin enano!”

[Nota]

[Mapa na página 15]

(Pa e teksto den su formato kompleto, wak e publikashon)

PHILLIP ISLAND

[Plachinan na página 16, 17]

Mirónes, stul i lus grandi: e esenario ta prepará pa e parada di pingwin

[Plachinan na página 17]

Di puitu pa para adulto den solamente dies siman

[Rekonosementu pa Potrèt na página 15]

Potrètnan: Photography Scancolor Australia

[Rekonosementu pa Potrèt na página 16]

Potrètnan na página 16 i 17: Photography Scancolor Australia