Ta Safe Ainda pa Bula ku Avion?

KUATER avion grandi sekuestrá. Kuater aksidente. Destrukshon di edifisionan mundialmente konosí. Televishon ta blo ripití e imágen di un Boeing 767 ta dal den un di e edifisionan di Twin Towers.

E atakenan di 11 di sèptèmber 2001 a introdusí nos den un era nobo i spantoso di agreshon terorista. Teroristanan a kuminsá usa kompanianan di aviashon komo e medio pa alkansá nan meta di mata hende, i avion a bira bòm pa kousa destrukshon masal.

Komo resultado, awor tin un tipo nobo di hende ku tin miedu di bula: Esnan ku ántes tabata sinti nan mes safe, pero ku awor ta teme posibel atakenan terorista. Ademas, despues di 11 di sèptèmber un seri di aksidente aéreo fatal ku no tabata relashoná ku terorismo a duna hopi hende mas miedu ainda di bula.

Biahamentu ku avion ta un luho ku miónes di hende na mundu no por permití nan mes. Sin embargo, tin otronan ku mester bula ku regularidat. Hende ku tin ku biaha hopi pa trabou, ta haña nan obligá ta drenta avion. Misionero- i sirbidónan kristian hopi bes tin ku hasi vuelonan largu pa bai nan asignashon i tambe pa bini bèk. Asta pa hende pober, tin biaha avion ta e úniko medio di transporte durante un emergensia médiko. I míles di piloto i tripulante di avion ta gana nan pan bulando.

Hopi di e biaheronan aki, siendo kisas nervioso kaba, awor tin ku kalma nan kasá i yunan promé ku nan sali kas pa bai bula. I awor ku mester pasa den asina tantu kos pa chèk-in i drenta avion, na komparashon ku e sistema fásil di ántes, biaheronan ta puntra nan mes si ainda bula ku avion ta e manera mas deseabel pa biaha.

Pa analisá e kuestionnan aki, Spièrta! a konsultá ku ekspertonan di siguridat, personal di aeropuerto, funshonarionan di kompanianan di aviashon i trahadónan den mantenshon di avion. Tin un kos ku nan tur aparentemente ta di akuerdo kuné: Ounke bulamentu a keda un di e medionan mas safe pa biaha, menasanan nobo ta rekerí medidanan nobo pa oumentá siguridat di e hendenan ku ta biaha.

E siguiente artíkulonan lo trata e problemanan ku tin i loke abo personalmente por hasi pa oumentá bo siguridat i komodidat ora bo ta bula ku avion.