Yurumi, un Bestia Remarkabel

DI E KORESPONSAL DI SPIÈRTA! NA ARGENTINA

DEN e skuridat di nan refugio bou di tera, un komunidat ta lucha frenétikamente kontra un atake. Sòldánan di defensa ta kore bai na e zona di peliger ku arma kla pa usa, pero ku lamentablemente no ta sirbi. Diripiente un sekshon grandi di e muraya di protekshon ta basha abou i plècha hopi habitante, i den e lus ku ta blèndu nan, e invasor ta drenta dor di e buraku ku el a habri den muraya.

Esaki ta deskripshon di un atake kontra un stat den tempu romano? Òf ta un esena di un pelíkula di akshon? Nò! Mas bien ta e atake di un yurumí, pero for di e punto di bista di un insekto. Sin embargo, pa e yurumí, òf komedó gigante di fruminga, esaki ta simplemente un otro seru di komehein riba su ruta diario.

Un Enkuentro ku Yurumí

Ounke tin vários tipo di komedó di fruminga, nos lo konsiderá spesífikamente esun gigante, ku na hulandes yama grote miereneter. Den algun idioma e ta konosí komo oso fruminga, kisas pasobra e ta kana pisá i hopi bes ta lanta para riba su patanan patras ora e tin ku defendé su mes. Tambe e ta “brasa” su atakante ku su patanan fuerte dilanti meskos ku oso ta hasi.

Den parti nortost di Argentina i den paisnan bisiña, nan ta yama e komedó gigante di fruminga yurumí, debí na su nòmber na idioma guaraní, ku ta nifiká “boka chikí.” E nòmber aki ta pas bon p’e ya ku su boka ta un buraku chikí, maske su kakumbein ta henter e largura di su kabes. Ora bo wak un yurumí, ta su boka largu manera un tubu ta e promé kos ku ta kapta bo atenshon. Tambe yurumí tin un rabu largu tur na kabei, ku tin biaha e ta tene kasi pará den posishon vertikal. Na su rabu, su lana diki ta bira largu i manera pluma, i esei ta dun’é un aparensia mas pisá di loke e ta. Apesar di su aparensia straño, yurumí su kurpa ta solamente e tamaño di un kachó Duitse herder. Un yurumí adulto por pisa te ku 25 kilo, pero e por krese bira 1,80 meter òf mas si bo midié for di punta di su boka te na punta di su rabu.

Yurumí ta hiba un bida solitario di kana pariba pabou, prinsipalmente den e sabananan di moeras di Suramérika. Ora bo pensa riba e kontinente aki, kisas bo ta imaginá foral selvanan di yobida i mata bèrdè. Pero tambe tin sabananan plat inmenso i seku, ku aki aya gruponan di palma i mata di sumpiña. E tera den lugánan asina tin hopi restu putrí di mata i ta ideal pa komehein. Einan e komeheinnan ta traha nan serunan di tera mesklá ku skupi, un kombinashon ku ta forma un konstrukshon hopi fuerte, i ku por alkansá un haltura di mas ku 1,80 meter.

Meimei di e abundansia aki di insekto, nos ta haña yurumí, kende ta spesialisá den kome nan. P’esei su nòmber sientífiko Myrmecophaga tridactyla ta hala atenshon promé na loke e ta kome (komedó di fruminga), i di dos, na e echo ku tres di su kuater tenchinan di kada pata dilanti ta armá ku uñanan formidabel ku parse hak. Enciclopedia Salvat de la fauna ta bisa: “E uñanan ta pa buska kuminda i tambe pa defendé su mes: Ora e komedó di fruminga ser ataká, e ta usa nan manera kuchú skerpi. E ta lanta para riba su patanan patras ku asina un abilidat ku e uñanan por kousa herida serio i asta pone yaguar kore bai.”

Kon Yurumí Ta Kome?

Yurumí no tin djente. Pero esei no ta strob’é pasobra e tin un manera ekstraordinario pa haña su kuminda. Na promé lugá, e tin un tremendo sentido di hole⁠—⁠40 biaha mas skèrpi ku di hende⁠—⁠ku ta yud’é lokalisá kuminda. Anto yurumí ta usa su patanan dilanti, ku tin uñanan ku por yega te 10 centimeter  largu, pa koba den e serunan di tera en buska di insekto, yu di insekto òf nan webu. Despues di hasi esei e ta hinka su lenga largu di 45 centimeter den e gangnan skondí di e nèshi di insekto.

Yurumí su klirnan di skupi ta apnormalmente grandi, i e ta saka un skupi ku ta manera leim i ku ta tene su lenga muhá i pegapega. Fruminga òf komehein ta pega na su lenga i asina e ta hala nan den su boka. Pero djis guli e kriaturanan aki no ta basta, e tin ku digerí nan tambe. Un kos interesante ta ku e tin múskulonan fuerte di stoma ku ta garna e insektonan aki.

Kiko Lo Para di Yurumí?

Bo ta haña yurumí den gran parti di Amérika Sentral i Sur, pero nunka nan kantidat no tabata masha hopi. Podisé ta pasobra nan no ta haña hopi yu. Yurumí hembra ta haña un solo yu despues di a karga barika pa 190 dia. E mama ta karga su yu riba su lomba durante e yu su promé aña di bida. Un biólogo di Argentina ta deskribí un aspekto interesante di esaki: “Mi a topa un mama ku su yuchi di solamente un par di dia bieu. No tabata fásil pa mira e kriatura chikí riba lomba di e adulto, i mi a ripará ku e lugá spesial kaminda e yu ta, ta kamufl’é kompletamente; e ta pone su mes di tal manera ku e banchi pretu ku e tin riba su lomba ta kai pareu ku esun di e mama. Dor di esei e tabata ménos riparabel pa paranan yagdó.”

Yurumí tin un efekto importante riba e naturalesa kaminda e ta biba. Un solo yurumí ta kome míles i míles di fruminga òf komehein pa dia. Kiko lo pasa sin yurumí? E poblashon di insektonan aki lo por bira un plaga? En todo kaso, e balansa natural ta kambiando. Dikon?

Lamentablemente, hende ta pone ku pokopoko pero sigur yurumí ta disparsiendo. Tin ta yag riba dje pa spòrt; otronan ta mat’é pasobra nan ta haña ku e ta trese mala suerte. Tambe tin hende ta kaptur’é pa bend’é ku personanan ku ta kolekshoná bestia straño, i e komedó di fruminga aki ta bin resultá den kouchi òf den museo. Akaso yurumí tambe lo stòp di eksistí un dia meskos ku otro kriaturanan skars? Tempu lo mustra esei. Pero hende ta hasiendo esfuerso pa protehá e hoya aki di diversidat biológiko.

[Plachi na página 23]

En buska di un di su platonan favorito: komehein

[Plachi na página 23]

Un yu di “yurumí” riba lomba di su mama

[Plachi na página 23]

“Yurumí” su lenga impreshonante di 45 centimeter

[Rekonosementu pa Potrèt na página 23]

Kenneth W. Fink/Bruce Coleman Inc.