Korte Supremo Ta Aseptá e Kaso

DEN ÚLTIMO AÑANAN, Korte Supremo a aseptá rònt di 80 pa 90 kaso pa aña, for di mas ku 7.000 petishon ku nan ta risibí, pa nan duna un opinion hurídiko por eskrito. Kier men, un tiki mas ku 1 porshentu so nan a aseptá!

Na mei 2001, Testigunan di Yehova a entregá na Korte Supremo un Petishon pa Writ of Certiorari (permiso pa reeksaminá e kaso). E petishon tabatin e siguiente pregunta: “Segun konstitushon merikano, ministernan religioso ku ta partisipá den e obra di komuniká nan kreensianan religioso di kas pa kas—un práktika di hopi siglo bieu i basá riba e Skritura—ta igual ku bendedónan di merkansia, i p’esei ta obligá na obedesé e restrikshonnan predefiní di optené un pèrmit munisipal pa por papia tokante Beibel òf ofresé literatura basá riba Beibel sin kobra p’e?”

Dia 15 di òktober 2001, e Departamentu di Asuntunan Hurídiko di Sosiedat Watch Tower a ser notifiká ku Korte Supremo  Merikano a aseptá pa reeksaminá e kaso Watchtower Bible and Tract Society of New York, Inc., Versus Pueblito di Stratton!

Korte a aseptá pa reeksaminá solamente un aspekto spesífiko di libertat di ekspreshon di e kaso. Esta, si ta asina ku e Promé Enmienda di konstitushon ku ta protehá libertat di ekspreshon ta inkluí e derecho di hende pa papia ku otronan tokante un asuntu, sin ku nan tin ku identifiká nan mes promé na un òf otro outoridat gubernamental.

Awor e respektivo abogadonan mester a presentá nan argumentunan oralmente dilanti e nuebe huesnan di Korte Supremo di Estádos Unídos. E Testigunan lo a bin ku nan abogadonan; i na e otro banda, e Pueblito di Stratton ku su tim di abogado. Kon kos a bai den e tribunal ei?

[Kuadro na página 5]

KIKO TA E PROMÉ ENMIENDA?

“ENMIENDA NUM. I (ESTABLESIMENTU DI RELIGION; LIBERTAT DI RELIGION, DI EKSPRESHON, DI PRENSA, DI REUNÍ HUNTU, DI PETISHON) Kongreso lo no traha ningun lei relashoná ku establesimentu di religion, òf ku ta prohibí libertat di praktiká un religion; òf ku ta limitá e libertat di ekspreshon òf di prensa; òf e derecho di e pueblo di tene reunion pasífiko, ni pidi Gobièrnu pa eliminá e kousa di kehonan.”—Konstitushon di Estádos Unídos.

“E Promé Enmienda ta e base di e proseso demokrátiko na Merka. E Promé Enmienda ta prohibí Kongreso pa pasa lei ku ta restringí libertat di ekspreshon, di prensa, di tene reunion pasífiko òf di hasi petishon. Hopi hende ta konsiderá libertat di ekspreshon e libertat mas importante i e fundeshi di tur otro libertat. Tambe e Promé Enmienda ta prohibí Kongreso di pasa lei ku ta establesé un religion di estado òf ku ta restringí libertat religioso.” (The World Book Encyclopedia) Ta interesante ku den e kaso Cantwell Versus Connecticut, 310 U.S. 296 (1940), un desishon ku a marka pouta i ku tambe a enbolbé Testigunan di Yehova, Korte Supremo merikano a dikta ku e garantianan di e Promé Enmienda ta prohibí no solamente “Kongreso” (gobièrnu federal) sino tambe outoridatnan lokal (di estado i di munisipio) di pasa lei ku ta kontra e konstitushon i ku ta un violashon di e derechonan di e Promé Enmienda.

[Plachinan na página 5]

E kuestion ta afektá vários forma di aserká hende di kas pa kas

[Rekonosementu pa Potrèt na página 4]

Potrèt di Franz Jantzen, Collection of the Supreme Court of the United States