E Gran Migrashon

DI E KORESPONSAL DI SPIÈRTA! NA KENIA

EZONIDU di un mion pata na kareda tabata manera dònder. E trupa grandi di kurpa den moveshon tabata bai dilanti, i a lanta un nubia grandi di stòf kòrá. E bestianan pia fini na kareda, a pasa riba vaye- i serunan ku ta subi baha, i nan a krusa sabananan habrí i riunan grandi i chikí. Nan a move den un ola grandi, lagando patras un kaminda hanchu di yerba kòrtá te na rais. E inmenso tou di kriaturanan ku tabata grita i kore den pániko ta forma un di e espektákulonan natural di mas impreshonante di bestia di mondi riba tera: e gran migrashon di wildebeest òf gnu.

Áfrika Su Hòfi di Eden

Serengeti ta un área salbahe. Situá den e paisnan di Tanzania i Kenia, e ta un inmenso sabana di tereno ku ta subi i baha, i ta enserá un área di mas o ménos 30.000 kilometer kuadrá. E suela ta kubrí ku un kapa di tera volkániko nutritivo, loke ta krea kondishonnan ideal pa e tapeit di yerba bèrdè ku ta tapa e lugá. Tambe tin áreanan di mondi di palu di wabi i palu di sumpiña di sabana ku ta perkurá blachi pa olefantenan ku ta kana na trupa

 buska kuminda. Trupanan di zjiraf ta kana elegantemente riba e sabana ku stapnan largu i lento.

Den algun área tin formashon di baranka di granit—ku a bira lizu dor di bientu i áwaseru—meimei di e sabana, i nan ta lugánan ideal pa leon ku leopardo drumi vigilá e tereno. Riunan ku strom di awa fuerte ta krusa dor di e tereno, i nan ta patapata di hipopótamo i kaiman. Riba e sabananan habrí bo por mira trupa di masha hopi sorto di antilop ta kome yerba, entre nan, wildebeest, hartebeest i topi. Zebranan yen di set ta reuní na e plasnan di awa i nan ta keda manera un koyar di kralchi pretu ku blanku rònt di e plasnan. Ku masha fasilidat gazèl ku impala ta krusa e sabana ku saltonan haltu durante nan kareda. Trupanan grandi di búfalo (kafferbuffel), ku nan kachunan masivo i lorá i kurpa muskular, ta kome trankilamente, rankando bòshi di yerba ku nan boka grandi.

Serengeti tin masha hopi famia di leon. Durante e kayente di dia nan ta hasi floho den sombra di palu i mata, wardando pa ora bira mas fresku anochi pa nan yag. Leopardonan tur pintá ta kasi invisibel ora nan ta drumi, kologá elegantemente den e takinan haltu di palu, i kamuflá dor di e rayonan di lus ku ta penetrá dor di e blachinan. Cheetah (un tipo di leopardo) ta haña e sabananan habrí un lugá ideal pa e por kore ku spit di djèt. Su kurpa delegá ta bira wazig ora e ta kore riba sabana tras di un víktima.

En bèrdat, e sistema ekológiko di Serengeti ta un paradeis di bestia, i ta algu maravioso pa opservá. Pero ta e trupanan inmenso di wildebeest ta produsí un di e maravianan natural di mas impreshonante den mundu di bestia.

E Payaso di Sabana

Segun kálkulo tin 1,5 mion wildebeest ta kana rònt na Serengeti. Wildebeest ta un kriatura ku un aparensia straño. Su kabes ta largu i su wowonan ku ta lombra ta situá leu for di otro te na e parti ariba di su kabes. Su kachunan manera di baka ta hasi un kurva leve bai abou, kaba ta bai di banda i despues ta bolbe lora ariba. Su lomba ta bai skùin abou na su patanan patras, ku ta parse débil i fuera di proporshon ku su skouder i garganta fuerte. Pianan fini ta karga e peso di e kurpa pisá di wildebeest. E barba largu i poko blanku ku e tin bou di su kachete, su lananan pretu na garganta i su rabu manera di kabai, ta pone ku e wildebeest parse un kombinashon di vários bestia.

Ta un grasia pa mira e payasadanan di wildebeest. Ora nan ta den trupa grandi, nan ta saka un zonidu ku  ta parse un koro di míles di sapu. Ora nan ta pará riba e sabananan habrí, nan tin manera un mirada konfundí i sorprendí segun ku nan ta wak kiko ta pasa rònt di nan.

Tin biaha un wildebeest machu ta saka un kareda riba e sabana, saltando di banda i koriendo den rònchi. Sagudiendo su kabes e ta lanta riba su pianan patras i ta keda bula bai bini teniendo su patanan steif, i lantando stòf na un manera masha prèt. Tin hende ta bisa ku e akshonnan aki ta pa impreshoná e hembranan òf pa spièrta e otro machunan dor di duna un show di su abilidat ekstraordinario. Pero tin biaha ta parse ku e machu simplemente tin gana di hasi wega.

Wildebeest Ta Nase den un Mundu Hostil

Ora ta e tempu apropiá, wildebeestnan ta kuminsá wèrp. Nan tin e abilidat úniko di sinkronisá nasementu di nan yunan, di manera ku 80 pa 90 porshentu di nan yunan ta nase den un periodo di tres siman. Durante e tempu aki e tou ta oumentá ku míles di yu di wildebeest ku ta grita. Kada mama mester sera lihé ku su yu, pasobra si e tou kuminsá kore den pániko, mama ku yu por separá fásilmente, i e yu lo tin masha tiki chèns di sobrebibí riba su mes.

E yunan ta nase den un mundu hostil di bestianan yagdó ku ta semper alerta. E hembranan ta warda te ora ku no tin ningun señal di peliger pa nan wèrp. Sin embargo, si un bestia yagdó sorprendé nan, nan tin e abilidat inkreibel di para e proseso di wèrp i kore bai. Anto mas despues, ora no tin menasa di peliger, nan por kompletá e nasementu di nan yu.

Parse ku e yu mes tin un sentido natural di peliger i den un par di minüt despues ku el a nase e ta riba pia. Despues di un siman, e por kore riba sabana na un velosidat di 50 kilometer pa ora.

Tempu pa Move

Wildebeestnan ta migra den trupanan grandi atraves di Serengeti. E motibu prinsipal pakiko nan ta move masalmente ta áwaseru. Kaida di áwaseru ta ser dirigí dor di patronchinan di wer ku ta sigui un siklo anual. Henter aña áwaseru sa kai na un òf otro parti di e inmenso sabana aki.

Wildebeest tin mester di awa tur dia i un suministro konstante di yerba pa kome. Tanten ku tin kuminda i awa, nan ta keda den e área. Pero ora ku e temporada di sekura dal aden, e yerba di sabana ta seka i e fuentenan di awa ta disparsé. E trupanan di wildebeest no  por warda te ora áwaseru bolbe kuminsá kai. Nan tin ku bai kaminda áwaseru ta kai.

Na unda ku áwaseru kai, e sabananan seku ta ser transformá rápidamente. Den un par di dia, yerba bèrdè ta sprùit i produsí un tapeit bèrdè di yerba. E blachinan tierno aki tin hopi nutrishon i vògt, un atrakshon poderoso pa wildebeest.

E kriaturanan aki tin e abilidat di detektá kaminda áwaseru ta kai, asta for di un distansia grandi. Niun hende no sa sigur kon nan por sa ku áwaseru ta kai na un otro parti di Serengeti. Ta mira nan ta mira e nubianan skur den laira for di un distansia òf ta hole nan ta hole e humedat den e aire seku? Di tur manera, pa e tou sobrebibí, e tin ku move. I ta move mes nan ta move!

Un Biahe Peligroso

Na prinsipio e salida ta pokopoko. Wildebeest ta kriaturanan ku gusta kompania; ora un bestia kuminsá kana bai den un sierto direkshon, e otronan rònt di dje ta stòp di kome yerba i purba siguié. Djis despues, henter e tou ta bai dilanti den un éksodo dramátiko. Set ku hamber ta pone nan move bai. Tin biaha nan ta kore. Otro biahanan, nan ta lastra un tras di otro den filanan largu, kreando roinan hundu den e tereno yen di stòf.

Durante nan biahe nan ta konfrontá hopi peliger. Bestianan yagdó ta sigui e inmenso trupa di wildebeest, vigilando kualkier bestia ku ta kana pokopoko, ta kokochá òf ta malu. Segun ku e wildebeestnan ta avansá, nan ta drenta teritorio di famianan di leon, ku ta warda den emboskada. Skondiendo den e yerba largu, e leonnan ta kore bai riba e trupa di bestia ku ta komiendo i ta pone nan plama den pániko. Leopardo, cheetah, kachó salbahe i hiena, tur ta probechá di kualkier bestia ku no ta keda pareu ku e tou òf ku ta dual bai for di e trupa prinsipal. Ora nan mata un wildebeest, samuronan ta presentá. Esakinan ta pleita i bringa pa e restunan i e úniko kos ku nan ta laga atras ta un eskeleta, ku ta para blikia den e solo kayente di Áfrika.

Riunan ku strom di awa fuerte ta krea bareranan formidabel ku e trupa mester krusa. Krusamentu di riu ta un evento espektakular, ora ku míles di bestia ta bula for di e kantu haltu te den e awa abou. Mayoria di nan ta yega sano i salvo na otro banda. Pero strom di awa ta lastra algun bai kuné òf kaiman ku ta warda djis bou di superfisie di awa, ta kome sobrá. E biahe peligroso aki ta tuma lugá tur aña. Ora nan terminá, nan a kubri podisé un distansia di mas o ménos 3.000 kilometer.

Hende—E Yagdó di Mas Grandi

Pa míles di aña, hende tabatin masha tiki impakto riba e migrashon di wildebeest. Pero awor hende ta forma e menasa di mas grandi pa e espektákulo aki. Den dékadanan resien, gobièrnu di Tanzania i di Kenia a purba protehá e bestianan di Serengeti. Sin embargo, maske e migrashon di wildebeest ta tuma lugá pa gran parti denter di e fronteranan protehá di santuarionan di naturalesa, míles di bestia ta ser gará ilegalmente den trampa i matá dor di yagdó. Armá ku trampanan di waya, flecha venenoso i skopèt, nan ta yag riba e bestianan pa haña karni i suvenir pa bende ku hendenan ku ta ansioso pa kumpra esei. Tin un ehérsito di bewaker i ranger ta patruyá e áreanan protehá, pero Serengeti ta asina grandi ku ta kasi imposibel pa proteh’é kompletamente. Segun ku poblashon humano ta krese, tin tambe mas preshon pa hasi uso di e sabananan fruktífero aki. Un kuestion kontroversial ku konstantemente hende ta debatí ariba ta si mester apartá terenonan grandi asina pa bestia di mondi.

Un tempu, miónes di bisòn tabata kana rònt riba e sabananan di Norteamérika. Awor nan tur a disparsé. Tin hende ta teme ku e mesun destinu ta spera e último trupanan grandi di wildebeest na Ost Áfrika. Lo ta hopi tristu si nos mester ta testigu di e desaparishon di un maravia natural impreshonante asina. Nos ta anhelá e dia ora ku bou di Dios su gobernashon hustu, hende ku bestia lo biba den balansa i armonia perfekto. (Isaías 11:6-9) Miéntras tantu, e suseso espektakular aki lo sigui impreshoná nos: e gran migrashon di wildebeest.

[Plachi na página 18]

Trupanan tin ku krusa riunan ku strom di awa fuerte