Pornografia—Opinionnan Kontradiktorio

“E ta lanta apetit ku lo no mester eksistí; e ta stimulá pashonnan ku nunka lo mester wòrdu satisfasé.”—Tony Parsons, kolumnista.

JOHN nunka tabatin intenshon di bira adikto na ‘sèks riba Internet.’ * Meskos ku hopi otro hende ku aksidentalmente ta bini den kontakto ku pornografia i chat room di sèks, John a topa ku un site ku ta ofresé e tipo di chat room ei un biaha ku e tabata usa Internet. No a tarda hopi, ku e tabata kompletamente apsorbá den cybersèks, es desir, sèks riba Internet. John ta konta: “Mi tabata warda mi kasá bai trabou, anto mi ta bula baha for di kama i pasa oranan largu dilanti di kòmpiuter.” Durante seshonnan maratóniko, e no tabata ni stòp pa bebe òf kome algu. John a bisa: “Mi no tabata sinti hamber mes.” El a kuminsá gaña su kasá tokante su aktividat sekreto. I e aktividat ei a kuminsá afektá su konsentrashon na trabou, i el a bira mas i mas deskonfiá. Su matrimonio a kuminsá bai atras, i ta ora ku el a hasi areglo pa topa ku un di su partnernan di cybersèks en persona, su kasá a ripará ta kiko tabata pasando. Awe John ta hañando tratamentu pa su adikshon.

Aktivistanan antipornografia ta sita e tipo di eksperensianan ei komo prueba di e efektonan degradá di pornografia. Nan ta bisa ku e ta destruí relashonnan personal i ta rebahá hende muhé, abusá di mucha i ta fomentá un punto di bista trosí i perhudisial di sèks. Di otro banda, esnan ku ta na fabor di pornografia ta defend’é komo libertat di ekspreshon i ta konsiderá e aktivistanan komo hende ‘preuts’ òf demasiado desente. Un proponente a skirbi: “Hende no mester tin bèrgwensa di nan orientashon òf deseonan seksual. Por usa pornografia komo un medio pa start i stimulá kòmbersashonnan franko tokante sèks.” Tin hende ta asta indiká ku e oumento di pornografia ta e karakterístika di un sosiedat sano i sin tabú. E eskritor Brian McNair a bisa: “Un sosiedat sufisiente madurá pa trata ku e presentashon detayá di sèks ku ta ser praktiká entre adultonan di komun akuerdo, probablemente ta un sosiedat ku lo sintié kómodo ku vários tipo di orientashon seksual [manera homoseksualidat i lesbianismo] i ku igualdat di hende muhé.”

E echo ku sosiedat tin opinionnan miksto relashoná ku pornografia ta hasié aseptabel? Dikon e ta asina plamá? Di bèrdat pornografia ta un aktividat peligroso? E siguiente artíkulonan lo analisá e preguntanan aki.

[Nota]