Hóbennan Sa Puntra . . .

Kon Mi Por Logra Haña Mi Propio Identidat?

“Mi tata ta un ansiano bon konosí den un kongregashon di Testigunan di Yehova. Mi tin rèspèt p’e, pero tin bes mi no ta gusta e echo ku tur kaminda hende konosé mi simplemente komo yu di Bill.”—Larry. *

“Dor ku mi tata ta un ansiano prominente, mi tabata sinti ku tur hende tabata spera hopi di mi, i tabata masha difísil pa mi ta mi mes.”—Alexander.

SEGUN ku bo ta bira grandi, ta masha normal pa bo deseá un grado di independensia, esta, pa bo por haña bo propio identidat òf reputashon. Ora bo a nase bo mayornan a skohe un nòmber pa bo ku nan a gusta. Awor ku bo ta kresiendo, bo kier tin e oportunidat pa skohe bo propio “nòmber,” es desir, traha bo propio reputashon.

Rei Salomon a skirbi: “Un bon nòmber ta mas di deseá ku gran rikesa, i apresio ta mihó ku plata i oro.” (Proverbionan 22:1) Probablemente lo bo kier kuminsá haña bo propio identidat for di awor ku bo ta yòn.

Identifiká ku Bo Mayornan

Meskos ku Larry i Alexander, algun hóben ta sinti ku nan ta wòrdu identifiká ku e nòmber i logronan di nan mayornan. Kisas nan mayornan ta bon konosí den komunidat pa motibu di nan trabou òf edukashon. Òf kisas nan ta bon konosí den e kongregashon kristian. Si bo mayornan ta den un di e situashonnan aki, tin bes lo bo por sinti ku bo ta den spotlight i ku hende ta wak tur kos ku bo hasi. Kisas bo no ta gusta e preshon ku bo ta haña pa komportá bo mes di sierto manera djis pa motibu ku bo mayornan ta bon konosí.

Por ehèmpel, Ivan su tata ta un ansiano den un kongregashon di Testigunan di Yehova. Ivan ta bisa: “Dor ku tur hende tabata konosé mi tata i e tabata un hòmber respetá, semper mi a sinti ku mi mester tabata un bon ehèmpel tantu na skol komo na kas. Mi tabata sinti ku otro mayornan tabata mira mi komo un ehèmpel pa nan yunan. Maske esaki ta duna bo un dushi sintimentu, e tabata pone mi bou di preshon pisá pa mi komportá mi mes bon dilanti otro hende. Komo konsekuensia, tin bes mi tabata bira orguyoso i no tabata kier a rekonosé mi foutnan.” Alexander ta bisa: “Mi tabata sinti ku henter ora bai hende ta wak loke mi ta  hasi, anto si mi a hasi un fout, nan tabata kla pa mustra dede riba mi.”

Larry, ku a ser menshoná na komienso di e artíkulo aki, a purba di no hala atenshon na su mes dor di keda sin bisa hende su fam. E ta bisa: “Ora mi a topa un hende pa promé bes na un get-together, mi tabata bis’é: ‘Konta bai, mi nòmber ta Larry,’ anto para einan, sin bisa mi fam. Ora mi mester a firma, si tabata posibel, mi tabata pone mi promé nòmber so. Mi tabatin miedu ku hende lo trata mi diferente si nan a haña sa ta yu di ken mi ta. Mi tabata kier pa mi amigunan trata mi normal.”

Naturalmente, ta lógiko ku si bo tata ta un ansiano kristian òf un sirbidó ministerial, hende kisas lo spera hopi di bo. Kon ku bai bin, hòmbernan nombrá den tal puesto di responsabilidat mester “sa di manehá nan yunan i nan mes kas.” (1 Timoteo 3:5, 12) Pues, no ta nada straño ku hende ta spera pa bo ta un bon ehèmpel! Pero esei riba su mes ta algu malu? No si bo tuma na kuenta ku Pablo a skohe e hóben kristian Timoteo, tempu ku e tabata un tiner ainda, pa biaha kuné i partisipá den e trabou importante di sirbishi. (1 Tesalonisensenan 3:1-3) Bo tin ku sòru pa bo ta un bon ehèmpel, sea ku bo tata ta un ansiano nombrá òf nò.

No Ta Sabí pa Rebeldiá

Tòg, algun hóben ta purba haña nan propio identidat dor di rebeldiá. Ivan ta bisa: “Tabatin momentu ku mi tabata sinti mi iritá pa motibu ku mi mester ta un bon ehèmpel. Mi tabata rebeldiá dor di wak te kon largu mi por a laga mi kabei krese sin ku un hende bisa mi algu.”

Absalon, un di Rei David su yunan, a rebeldiá. Su tata tabata bon konosí pa su deboshon na Yehova i hopi hende den e nashon di Israel tabata stim’é. Komo yu di David, hende tabata spera hopi di dje. En bes di hasi e kosnan ku hende por a spera di dje, Absalon a skohe pa duna su mes e mala fama di a rebeldiá kontra su tata. Pero siendo ku David tabata un representante skohé pa Yehova, en realidat Absalon tabata rebeldiando kontra Yehova. Su akshonnan a kousa bèrgwensa pa su famia i kalamidat pa su mes.—2 Samuel 15:1-15; 16:20-22; 18:9-15.

Rebeldia por tin konsekuensianan desastroso pa abo tambe. Pensa un ratu riba loke Beibel ta konta nos tokante Nehemias. Algun di su enemigunan a purba pon’é bai kontra prinsipionan  di Dios. Dikon nan a hasi esei? Nehemias a bisa: “Esei lo a duna nan motibu pa kana papia malu di mi i susha mi nòmber.” (Nehemias 6:13, Beibel na papiamentu koriente) Rebeldia lo por duna bo un mal nòmber, esta, un nòmber ku hende lo no lubidá lihé.

Loke tampoko bo no mester pasa por haltu ta e efekto ku kondukta rebelde por tin riba otro hende. Pa kuminsá, bo ta hasi bo mayornan tristu sin ta na nodi. (Proverbionan 10:1) Tambe bo akshonnan por tin un efekto negativo riba otro hóbennan. Ivan ta rekonosé: “Mi kondukta tabatin un mal efekto riba mi ruman hòmber. Pa un tempu el a bandoná e kongregashon kristian kompletamente i a hasi nèt e kosnan ku e tabata sa ku no ta na armonia ku normanan bíbliko. Ménos mal ku el a bin bei i awor e ta sirbi Yehova atrobe i ta felis.”

Un Mihó Manera

Absalon su ruman parti di tata, Salomon, a skohe un otro rumbo. E tabata dispuesto pa siña humildemente for di su tata, David. (1 Reinan 2:1-4) En bes di buska fama pa su mes, Salomon a buska manera pa traha un bon nòmber den bista di Dios. Tanten ku el a hasi esei, el a duna onor na su famia i a bira konosí komo un di e reinan mas famoso di Israel.—1 Reinan 3:4-14.

E bon ehèmpel di Salomon ta siña nos dos punto importante: Di promé, bo ta haña bo propio identidat, no dor di alehá di bo famia, sino dor di siña di e kosnan bon di bo famia. E revista Adolescence ta bisa: “Di ningun manera hóbennan no mester sinti ku durante adolesensia nan mester alehá di nan mayornan pa nan por ègt haña nan propio identidat.” Segun e revista, e echo ku bo “mayornan ta yuda bo no ta stroba bo” di haña bo propio identidat; “al kontrario, ta yuda nan ta yuda bo desaroy’é.”

Ta interesante ku Salomon mes a konsehá: “Skucha na bo tata ku a engendrá bo, i no despresiá bo mama ora ku e bira bieu.” (Proverbionan 23:22) Klaramente Salomon no a dirigí su mes na mucha chikí pasobra ora mayornan “bira bieu,” e yunan probablemente ta adulto kaba. Pues, kiko ta e punto? Asta si bo ta grandi kaba i bo tin bo mes famia, tòg bo por sigui benefisiá di e sabiduria di bo mayornan. Ivan a bin komprondé esei. El a bisa: “Segun ku mi ta bira grandi, mi ta purba imitá e kosnan bon di mi mayornan i evitá nan foutnan.”

E di dos punto ku nos ta siña ta ku Salomon su prioridat tabata, no pa purba haña su propio “identidat,” sino pa agradá Yehova. Sí, hende tabata spera hopi di dje dor ku e tabata yu di David. Pero loke a yuda Salomon karga su responsabilidatnan tabata ku el a dependé riba Yehova. Alexander tambe a skohe pa mira kosnan di e manera ei. El a bisa: “Awor mi ta aseptá e echo ku por lo general mas ta ser sperá di yunan di ansiano. Mi a disidí di usa e punto di bista aki di un manera positivo, i esaki a resultá di ta un protekshon pa mi. Mi a bin realisá ku e kos di mas importante ta loke Yehova ta pensa di mi. E konosé mi pa loke mi ta i no djis pa yu di ken mi ta.”

Daryn su tata ta un graduado di e Skol Bíbliko di Galaad di Watchtower. * E skol aki ta entrená misioneronan. Daryn tambe a siña kon pa dil ku e echo ku su mayornan ta bon konosí. El a bisa: “Ora mi a batisá, mi a dediká mi mes na Yehova i no na ningun otro hende. Dor di hasi tur mi esfuerso pa kumpli ku mi dedikashon, mi ta sinti un pas ku ta bin di e echo ku mi sa ku Yehova ta kontentu ku mi, asta si mi no por kumpli ku tur e kosnan ku mi mayornan a hasi.”

Rei Salomon a hasi e siguiente remarke: “Te asta un mucha ta konosí pa su echonan, si su kondukta ta puru i rekto.” (Proverbionan 20:11) Al fin i al kabo, hende lo kòrda bo pa loke bo bisa i hasi. Sòru pa bo ta un ehèmpel “den palabra, kondukta, amor, fe i puresa.” Si bo hasi esei, hende lo stima bo i respetá bo pa loke bo ta!—1 Timoteo 4:12.

E problema di otro hóbennan ta ku nan no kier wòrdu identifiká ku nan rumannan ku ta hopi eksitoso. Den futuro, un artíkulo lo splika bo kon bo por dil ku e reto aki.

[Nota]

[Komentario na página 26]

Loke bo ta logra ku rebeldia ta di hasi bo mayornan tristu i daña bo nòmber

[Plachi na página 26]

Bo bon ehèmpel por benefisiá otro hende