Bestia Ta un Regalo di Dios

BO A yega di bishitá un parke di bestia òf un sirko? Bo a haña gana di karga òf pasa man riba un di e bestianan bunita, kisas un leon mahestuoso òf un inmenso tiger di Siberia? Podisé tabata masha emoshonante pa mira un entrenadó di bestia òf un di nan kuidadónan hasi esei. De echo, un eskritor di Beibel a bisa kasi 2.000 aña pasá: “Tur sorto di bestia salbahe i para, di bestia ku ta lastra i bestia di laman ta wòrdu mansá i a wòrdu mansá kaba dor di e rasa humano.”—Santiago 3:7.

Tur tipo di bestia ta reakshoná faborabel riba kuido amoroso i atenshon. En realidat por ta un goso pa mira kon nan ta anda ku hende interesá den nan bienestar i ku a mansa nan. E eskritor romano Plinio, kende a skirbi rònt di mesun tempu ku e eskritor di Beibel Santiago, a menshoná ku hende a mansa olefante, leon, tiger, águila, krokodel, kolebra i asta piská.

Pero eigenlijk, mansamentu di bestia pa nan bira bestia di kas a kuminsá hopi mas promé. Hopi siglo promé ku Santiago i Plinio a skirbi, e egipsionan tabata mansa bestia salbahe i usa nan komo maskota òf bestia di kas. Awendia bo por haña hopi bestia ku bo ta mira den parke di bestia, na kas di hende den algun pais.

Bestia Su Relashon ku Hende for di Prinsipio

Beibel, e registro mas bieu di historia humano, ta informá ku e promé hòmber, Adam, a duna e bestianan nòmber. Beibel ta bisa: “Manera e hòmber a yama kada ser bibu, asina su nòmber tabata. I e hòmber a duna nòmber na tur bestia di kria i para di shelu, i tur bestia di sabana.” (Génesis 2:19, 20) Aparentemente, Adam a familiarisá su mes bon ku e bestianan pa e por a duna nan un nòmber ku ta pas ku nan. Pero e no tabatin mester di protekshon, ni sikiera kontra bestianan salbahe. Nan tabata na pas kuné, i ta sigur ku el a disfrutá sinfin di nan kompaño!

Dios a enkargá tantu Adam komo su kasá, Eva, ku e kuido di e bestianan. Segun Dios su propósito, manera e ta pará skirbí den Beibel, hende mester a “goberná riba e piskánan di laman i riba e paranan di shelu i riba e bestianan di kria i riba henter e tera, i riba tur bestia ku ta lastra riba tera.”—Génesis 1:26.

Un Relashon Será i Duradero

Ora hende ta ehersé dominio korekto riba bestia, e resultado por ta masha agradabel. Hende sa konsiderá un bestia stimá komo un kompañero presioso, asta komo un parti di nan famia. Anto for di e relato di Beibel tokante “ún lamchi chikitu” di un hòmber pober nos por asta mira ku esaki tabata e kaso tambe míles di aña pasá. Profeta Natan  a konta Rei David tokante e lamchi, i a bisa di e hòmber pober: “E [lamchi] tabata kome di su pan i bebe di su kopa i drumi na su pechu, i tabata manera un yu muhé p’e.”—2 Samuel 12:1-3.

Hopi hende awe por komprondé dikon un bestia por bira un kompañero stimá, manera un miembro di famia. Tuma por ehèmpel un famia ku ta biba serka di Harare, siudat kapital di Zimbabwe. E mayornan a kumpra pa kada un di nan yunan un kachó pa sirbi komo un kompaño. Un biaha ku un di e yu hòmbernan ku e tempu ei tabatin ocho aña tabata kana ku su kachó, diripiente un mamba, un kolebra venenoso grandi, a kai abou su dilanti for di un palu. E mamba a ataká e mucha, pero manera werlek e kachó a intervení, i a skapa e mucha su bida. Bo por imaginá bo kon presioso e kachó ei tabata pa e famia?

Hende surdu tin un apresio spesial pa kachó ku a ser entrená pa yuda nan. Un señora a konta: “Ora Twinkie tende e bèl di porta, e ta bini serka mi i tek mi riba mi pia i ta hiba mi na e porta dilanti. Asina tambe, ora Twinkie tende e ring di e taimer di mi fòrnu, e ta kore bin serka mi, i mi ta siguié. Den kaso di un alarma di kandela, Twinkie ta di train pa hala mi atenshon anto kaba kai drumi abou pa indiká ku tin un posibel peliger.”

Loke ta spesialmente digno di menshon ta e relashon balioso entre hende siegu i nan kachó pa guia siegu. Michael Tucker, un entrenadó di kachó pa guia hende siegu i eskritor di e buki The Eyes That Lead (E Wowonan Ku Ta Guia), ta di opinion ku un kachó pa guia hende siegu ta habri posibilidatnan kompletamente nobo pa un hende siegu, i ta dun’é “libertat, independensia, mobilidat i kompaño.” De echo, hopi bes ta un plaser pa mira e relashon entre e kachónan ei i nan doño!

E situashon ei ta konta tambe pa hende ku tin un òf otro desabilidat i ku tin un kachó di kompaño. Un kachó di un señora den ròlstul a siña kue e telefon p’e i lembe stampia pa karta! Un otro kachó ta reakshoná riba 120 òrdu, i e ta asta kohe bleki i paki for di den rèki di supermarket pa su doño. E doño, kende tin un desabilidat, ta usa un pèn di rayo laser pa identifiká e artíkulonan ku e ke, i su kachó ta bai kue nan hiba p’e.

Bestia di kas ta benefisiá hende di edat avansá tambe. Un veterinario a bisa ku bestia di kas (inkluso kachó), “ta duna personanan di edat avansá un propósito i e sintimentu di ta útil, na un tempu ku hopi biaha nan ta biba apartá di sosiedat.” The Toronto Star a informá: “Bestia di kompaño ta pone ku hende tin ménos strès, ta bai dòkter ménos i asta ta duna nan mas chèns di sobrebibí despues di atake di kurason.”

The New Encyclopædia Britannica ta hasi e komentario interesante aki: “Tene bestia di kas ta krea e oportunidat pa siña mucha ku ta si nan ta responsabel nan por haña privilegio, i tambe pa  splika nan algu tokante sèks. No ta dura hopi ku nan ta mira ku bestia ta par ku otro, ku nan ta dek pa un periodo i tambe e diferente problemanan relashoná ku nasementu i kuido di e yunan di bestia.”

Deboshon na Bestia di Kas

E fieldat remarkabel di bestia de echo ta pone algun hende stima nan bestia di kas mas ku nan ta stima miembronan di famia. Den algun pais, den kasonan di divorsio tin biaha nan ta duna un di e kasánan kustodia di e bestia di kas komo parti di e akuerdo di repartishon di bien. I tin hende ku a pone nòmber di nan bestia den nan tèstamènt komo benefisiario di rikesanan enorme.

No ta straño anto ku negoshi relashoná ku bestia di kas ta masha lukrativo awe. Tin buki i revista ku ta duna konseho tokante tur asuntu relashoná ku bestia di kas. Negoshinan ta ofresé loke sea e doñonan di bestia ta deseá pasobra nan sa ku algun hende ta dispuesto pa duna nan bestianan di kas kosnan ekstrabagante di luho.

Por ehèmpel, ta posibel pa bo konsultá dòkternan sumamente spesialisá ku ta trata tur tipo di malesa ku ta afektá bestia di kas. Tin sikiatra di bestia di kas ku ta preskribí remedi  antidepresivo pa un bestia di kas. Ademas, tin abogado i bendedó di seguro pa bestia di kas, i tambe servisionan pa baña i pela bestia di kas i institutonan di entrenamentu. Hende ta tene entiero pa bestia di kas. I tin oferta riba mesa pa “kloon” bestia di kas; pero, ta mas ku klaru ku tur e kosnan aki ta kosta basta plaka!

Ta bisto anto ku tur kaminda hende stima bestia di kas. Dr. Jonica Newby den su buki The Animal Attraction (E Atrakshon di Bestia), ta yega na e konklushon: “Ora un kachó kore bin serka nos, ta waya su rabu i ta lembe nos komo si fuera e echo ku nos a bin kas ta e mihó kos ku a pasa kuné henter dia, ta parse rasonabel pa yama esei ‘amor.’” P’esei ta di komprondé dikon hopi doño di bestia di kas ta sinti nan motivá pa nan, na nan turno, demostrá e “amor” ei.

Sin embargo, esfuersonan pa trata un bestia di kas manera un hende por tin un efekto negativo. Kon ku bai bin, un bestia di kas no por satisfasé bo nesesidatnan manera otro hende por hasié. Ademas, e echo ku a urbanisá bestia di kas, es desir ku awor nan a adaptá nan mes na e ambiente di stat, ta kousa problema pa algun bestia i pa nan doño. Nos lo analisá e asuntunan ei den e siguiente artíkulo.

[Plachi na página 3]

For di leu den pasado hende a kuminsá hasi bestia salbahe mansu

[Rekonosementu]

Un detaye for di e buki The Great King of the Parthians Hunts With His Tame Panthers di Giovanni Stradanno: © Stapleton Collection/CORBIS

[Plachi na página 4]

Wardadó di karné israelita tabata trata lamchi ku tierno kompashon

[Plachinan na página 5]

Bestia di kas por yuda hende ku desabilidat i esnan di edat avansá