Dikon Ta Bon pa Kana?

MIONÉS di hende aparentemente ta pensa ku si nan no por bira miembro di un gym i dediká hopi tempu na ehersisio, nan por bien lubidá ku nan lo por haña e benefisionan di ehersisio. Pero esei no ta bèrdat. Dr. Russell Pate di Universidat di South Carolina a bisa: “Mi ta kere ku ofisialmente nos tin ku aprobá e idea ku ta masha bon mes pa despues di kome bo hasi un kaminata dushi i kómodo rònt di bo blòk.”

Pero di bèrdat un kaminata lo ta dje bon ei pa bo? Kanamentu tin benefisio di salú ku ta realmente importante?

Kanamentu Ta Bon Remedi

E dòkter griego Hipókrates a konsiderá kanamentu komo “e mihó remedi pa hende.” De echo, tin un dicho ta bisa: “Mi tin dos dòkter, mi pia robes i mi pia drechi.” Di bèrdat kanamentu ta dje bon ei pa salú?

Wèl, algun estudio ta indiká ku hende ku ta kana riba un base regular lo por haña ménos malesa ku hende ku ta sinta hopi. E estudionan ta mustra ku kanamentu ta redusí e riesgo di haña malesa di kurason i hersenbloeding. E por prevení diabétis dor di mehorá e kurpa su abilidat di usa insulina. E ta mantené e wesunan fuerte, i asina evitá osteoporósis. Kanamentu ta laga un hende desaroyá forsa, fleksibilidat i resistensia. E ta yuda pa pèrdè peso i tambe pa mantené peso. Ademas, kanamentu ta laga bo drumi mas mihó, e ta mehorá funshon mental i por asta yuda kombatí depreshon.

Segun informe, algun aña pasá investigadónan na Universidat di Southern California a deskubrí ku un kaminata di 15 minüt por duna mas alivio di ansiedat i tenshon ku un trankilisante suave! Meskos ku otro aktividatnan físiko, kanamentu ta stimulá produkshon di endorfin—kímikonan selebral ku ta aliviá doló i stimulá relahamentu—i di e manera ei ta produsí un sintimentu di trankilidat i bienestar.

Segun The Medical Post di Canada, asta un kaminata trankil por produsí benefisio pa salú. Un estudio publiká den e revista The New England Journal of Medicine ta revelá ku kana asta un distansia kòrtiku di 800 meter pa dia por redusí e tasa di mortalidat. Estudionan resien ta indiká ku hasi ehersisio tres biaha pa dia, durante 10 minüt kada biaha, lo tin kasi mesun benefisionan  ku si bo hasi ehersisio pa 30 minüt stret. Pues podisé bo por konsiderá pa parker bo outo mas leu for di bo destinashon i kana e restu di e kaminda. Òf lo por bo hasi un kaminata kòrtiku durante dia.

Lo bo tin benefisio mas grandi si bo kana duru. Dr. Carl Caspersen di e Sentro Merikano pa Kombatí i Prevení Enfermedat, na Atlanta, Georgia, a bisa: “Si bo kambia di un bida di sinta hopi pa kana duru pa mei ora vários biaha pa siman, esei por redusí bo riesgo [di haña malesa] drástikamente.” I loke ta asina bon di kanamentu ta ku hende di tur edat i práktikamente tur nivel di salú por hasié. Ademas, kanamentu no ta rekerí entrenamentu spesial ni abilidat atlétiko; úniko kos ku bo mester ta un bon par di sapatu.

Disfrutá di un Bon Kaminata

Bisti paña kómodo i ku no ta pèrtá. Si ta friu, bisti vários paña riba otro ku bo por kita fásilmente. Usa sapatu fleksibel ku no ta pisa hopi i ku tin un hilchi plat ku manera kusinchi aden i sòru pa bo tenchinan tin sufisiente lugá. Bo sapatu òf kèts mester ta un tiki mas grandi ku bo sapatunan normal. Si bo tin pensá di kana mas ku mei ora i lo no tin kaminda pa bebe awa riba bo ruta, lo ta bon pa bo bai ku un tèrmo chikí ku awa. Kalentá dor di kuminsá kana e promé sinku minütnan na un paso trankil. Tene bo kurpa règt i bo èlebog- i rudianan un poko doblá i bo mannan un tiki será pero no na moketa.

Despues ku bo a kalentá, kana na un paso natural i purá den kua e hilchi di bo pia ta esun promé pa mishi ku suela, anto primí henter bo pia abou te na bo tenchinan. Ta p’esei bo sapatunan mester ta fleksibel. Tur esaki ta parse muchu hopi kos pa kòrda? Keda trankil, mayoria hende di naturalesa ta kana asina. Bo velosidat mester permití bo hiba un kòmbersashon sin pèrdè rosea. Si ta awor bo ta bai kuminsá kana, oumentá bo tempu, distansia i velosidat gradualmente. Fria bo kurpa dor di baha bo velosidat ora bo ta serka di yega na final di bo kaminata. *

Ta normal pa bo ritmo di kurason i di hala rosea subi ora bo ta hasi esfuerso, i tambe ku bo ta kuminsá soda suave- te moderadamente. E promé dianan kisas bo múskulonan lo ta un poko due. Paga tinu na e manera ku bo kurpa ta reakshoná. Si bo ta sinti ku bo ta hasiendo demasiado esfuerso, baha bo velosidat òf tuma un pousa kòrtiku. Sin embargo, si bo sinti un preshon òf doló den pechu, batimentu di kurason, kasi bo no por hala rosea, biramentu di kabes òf walmentu di stoma, stòp di kana i buska atenshon médiko mesora. *

Komo ku kanamentu no ta sagudí bo kurpa hopi, definitivamente e ta mas mihó ku aktividatnan manera korementu i aerobic. I komo resultado, bo tin ménos chèns di leshoná bo djòin- òf múskulonan. De echo, kanamentu ta e aktividat number un ku ekspertonan di bon kondishon ta rekomendá. P’esei pa bo bienestar, bai kana!

[Nota]

[Kuadro na página 27]

ALGUN KONSEHO PA KANAMENTU

● Kana règt, ku bo kachete na laira (paralelo ku suela), i wak un seis meter bo dilanti

● Mantené un velosidat moderá. No sinti ku bo tin ku kana asina duru ku bo no tin rosea pa kòmbersá normalmente

● No dal stapnan muchu largu. Pa mas velosidat, dal stapnan mas lihé i mas kòrtiku

● Zuai bo brasanan di dilanti bai patras, ku bo èlebognan pegá na bo kurpa. Evitá di zuai bo brasanan di un banda pa otro

● No pone bo pia plat abou. Baha riba bo hilchi i primi henter bo pia abou i pusha e siguiente stap ku bo tenchinan

● No sinti bo obligá na kana ku peso. Esakinan por desbalansá bo movementunan natural di kana i por verèk múskulo i kabuya di bo djòintnan