For di Nos Lektornan

Krímen Violento E manera ku e seri “Tin un Solushon pa Krímen Violento?” (8 di yüli 2003) a ser redaktá tabata simplemente ekstraordinario. Mi a gusta kon e promé artíkulo a deklará e echonan sin menshoná e solushon. El a djis finalisá ku algun bon pregunta pa stimulá pensamentu, lokual ta permití e lektor komprondé e seriedat di e problema. Despues a sigui e solushonnan basá riba Beibel. Mi no por haña un mihó palabra pa deskribí e artíkulonan aki. Nan tabata fasinante!

A. L., Merka

E último artíkulo den e seri aki, titulá “Tin un Solushon Realístiko?,” a yuda mi mira ku pa hende stima hustisia, nan tin ku kambia tantu nan forma di pensa komo nan kurason. Manera Isaias 54:13 ta deklará, nos tur tin ku laga Yehova Dios siña nos. For di awor aki, ku yudansa di Yehova nos por kuminsá entrená nos mes pa ta e tipo di hende ku Yehova ke pa nos ta.

V. K., Merka

Diabétis Masha danki pa e seri di artíkulonan di portada “Kon pa Biba ku Diabétis.” (8 di mei 2003) Pa 12 aña kaba mi tin diabétis tipo 1, i ku frekuensia mi ta pasa angua di insulina. Mi esposa ta un gran sosten pa mi. Nos tur dos ta sigui siña tokante e enfermedat, nos ta bishitá dòkter huntu i ami ta purba haña un aktitut mas positivo. Dor ku mi ta sirbi komo un superintendente biahero, mi a ripará ku mas i mas di e rumannan kristian ta realisá ku nan mester trata un persona enfermo ku kariño i pasenshi pa por yud’é enfrentá e desafionan den bida. Un aktitut asina ta yuda mi sigui sirbi e kongregashonnan. E seri di artíkulo aki a bini nèt na ora. Un biaha mas, masha danki.

W. B., Polonia

Ami ta un diabétiko pa 28 aña kaba. Dies miembro di mi famia ta sufri di e enfermedat aki. Boso seri ta kontené e informashon mas amplio ku mi a mira te awor. E artíkulonan ta reflehá e amor di nos Kreadó—algu ku ta hasi falta serka otro artíkulonan riba e tema aki ku no tin un orientashon religioso. Dor ku mi no ke tabata muchu dependiente di mi famia, mi a trata di skonde mi malesa pa otro hende. Pa mi, tabata un plaser di por kuida otro hende. Pero e artíkulo aki a yuda mi mira ku pa mi por kuida otro hende mihó, mi tin ku kuida mi mes.

L. P., Fransia

Tragedia Danki p’e artíkulo “Hóbennan Sa Puntra . . . Kon Mi Por Trata ku Tragedia Repentino?” (8 di yüli 2003) Ora mi a kaba di lesa e artíkulo aki, mi a sinti ku Yehova a duna mi guia riba un problema ku mi tabatin pa hopi aña. Komo kristian, mi sa ku kosnan ta “trabahoso” den e “último dianan” aki. (2 Timoteo 3:1) No opstante, ki ora ku mi a mira un notisia spantoso na televishon, mi tabata bira masha intrankil. Mi por a sinti mi asina desanimá ku mi tabata pèrdè tur energia i, tin biaha, mi tabata keda kas en bes di sali den sirbishi. Mi tabata blo preokupá tokante kiko por pasa òf laga di pasa den futuro. Pero e artíkulo aki a hasi mi kòrda e importansia di persistí den nos rutina spiritual, i di habri nos kurason na Yehova i pone pleno konfiansa den dje. Di henter mi kurason, mi ta gradisí boso pa boso publikashonnan.

E. K., Hapon

Na yanüari di 2003 mi tawela a fayesé den hospital. Tabata pa promé bes ku mi a mira un famia yegá di mi muri mi dilanti. E artíkulo aki a kontestá mi preguntanan. Foral e suptema “Dikon Kos Malu Ta Tuma Lugá” a konmové mi. El a yuda mi komprondé ku morto di mi tawela tabata debí na sirkunstansianan imprevisto. Esei no a nifiká ku Yehova a bandoná nos. Despues ku mi a lesa e artíkulo, e miedu ku tabata pisa riba mi kurason a disparsé.