Dikon Nos Tin Mester di Speransa?

KIKO si Daniel, e mucha ku kanser ku nos a papia di dje den e artíkulo anterior, no a pèrdè speransa? Lo el a kura di kanser? Lo e ta na bida awe? Ni sikiera e defensornan di mas ferviente di speransa lo no tribi di bisa sí. I esei ta un punto importante. Hende no mester pensa ku speransa ta e solushon pa tur kos.

Den un entrevista ku CBS News, Dr. Nathan Cherney a spièrta pa e peliger di eksagerá e poder di speransa ora hende ta trata pashènt ku tin malesa grave. El a bisa: “Nos tabatin kaso kaminda esposo ta rabia ku nan kasá pasobra supuestamente e esposa no a meditá sufisiente, òf no tabata sufisiente optimista.” Dr. Cherney a sigui bisa: “E manera di pensa ei a krea e ilushon falsu di kontrol, anto ora e persona no bira bon, ta komo si fuera bo ta bis’é ku e no a kontrolá su tumor bon, i esei no ta hustu.”

Pa bisa bèrdat, hende ku ta lucha ku un malesa terminal ta hiba un bataya intenso i agotador. I e último kos ku nan sernan kerí lo ke hasi ta di laga esnan ku ta malu sinti nan mes kulpabel. Pues, nos tin ku konkluí anto ku speransa no ta yuda ku nada?

Apsolutamente ku nò. Por ehèmpel, e mesun Dr. Cherney ta spesialista di kuido paliativo, esta, tratamentu ku no ta enfoká riba kombatí malesa ni prolongá bida di e pashènt, sino riba hasi e pashènt su bida mas kómodo i agradabel posibel tanten ku e ta lucha kontra e malesa. E dòkternan ei ta kere firmemente den e balor di tratamentu ku ta mehorá e estado di ánimo di pashènt, asta di hende hopi malu. Tin basta prueba ku ta mustra ku speransa por hasi esei, i asta mas.

E Balor di Speransa

“Speransa ta un terapia poderoso,” asina e reportero médiko Dr. W. Gifford-Jones a deklará. El a analisá vários estudio ku hende a hasi pa determiná e balor di sosten emoshonal ku ta duna pashènt ku ta den fase terminal. Aparentemente, e tipo di sosten akí ta yuda e pashèntnan keda ku speransa i ku un punto di bista positivo. Un estudio ku nan a hasi na 1989 a demostrá ku pashènt ku tabata haña e tipo di sosten ei tabata biba mas largu, maske un investigashon mas resien no tabata dje konvinsente ei. Pero di tur manera, e estudionan ta konfirmá ku pashènt ku haña sosten emoshonal tin ménos depreshon i ta sufri ménos doló ku esnan ku no haña esei.

Laga nos analisá un otro estudio ku nan a hasi tokante e efekto di optimismo i pesimismo riba malesa di kurason. Den e estudio ei, nan a evaluá kuidadosamente un grupo di mas ku 1.300 hende hòmber pa wak si nan tabatin un punto di bista positivo òf negativo di bida. Dies aña despues, nan a bolbe evaluá e grupo ei i a sali na kla ku mas ku 12 porshento di e hòmbernan ei tabata sufri di un òf otro forma di malesa di kurason. Den e grupo di 1.300 hende hòmber, tabatin dos biaha mas tantu hòmber pesimista ku hòmber optimista. Laura Kubzansky, dosente universitario di e Fakultat di Salú Públiko di Harvard a bisa: “Gran parti di evidensia ku a apoyá e idea ku ‘pensa positivo’ ta bon pa salú tabata basá riba loke hende ta bisa, no riba investigashon sientífiko. Pero, e estudio akí a duna prueba médiko ku pa promé biaha ta konfirmá e papel ku optimismo tin riba tereno di malesa di kurason.”

Algun estudio a demostrá ku hende ku ta pensa ku nan salú ta malu ta tarda mas pa rekuperá despues di un operashon ku hende ku ta kere ku nan salú ta bon. E investigadónan asta a mira un konekshon entre bida largu i ser positivo. Un estudio a analisá ki efekto un punto di bista positivo òf negativo tin riba hende grandi ora nan ta bira bieu. Ora nan a mustra hende grandi mensahe breve ku tabata asosiá biramentu bieu ku mas sabiduria i eksperensia, nan a mira ku e hendenan di edat a kuminsá kana ku mas forsa i energia. De echo, nan progreso tabata meskos ku si nan a hasi un programa di ehersisio di 12 siman!

Dikon emoshon manera speransa, optimismo i un punto di bista positivo ta benefisiá hende su salú? Siensia i medisina kisas ainda no ta komprondé hende su mente i kurpa sufisientemente bon pa duna un kontesta definitivo. Pero, e ekspertonan ku a studia e tema ei tin base pa asumí un posibel motibu. Por ehèmpel, un profesor di neurologia a bisa: “Ta dushi pa sinti bo felis i ku speransa. Esei ta un estado di ánimo plasentero ku ta kousa masha tiki strès, i esei ta fortalesé bo kurpa. Ta un otro un kos mas ku hende mes por hasi pa mantené bon salú.”

E idea akí kisas ta sorprendé dòkter, sikólogo i sientífiko, pero e no ta algu nobo pa hende ku ta studia Beibel. Kasi 3.000 aña pasá, Dios a inspirá e rei sabí Sálomon pa skirbi lo siguiente: “Un kurason kontentu ta un bon remedi, ma un spiritu abatí ta seka wesu.” (Proverbionan 17:22) Tuma nota di e punto di bista balansá ku e teksto ei ta reflehá. E versíkulo no ta bisa ku un kurason kontentu lo kura tur malesa, sino simplemente ta “un bon remedi.”

P’esei, ta na su lugá pa puntra: Si speransa tabata un remedi, ta kua dòkter lo no a skirbi un resèpt pa hañ’é? Ademas, speransa ta trese hopi mas benefisio ku solamente un bon salú.

Efekto di Optimismo i Pesimismo den Bo Bida

Algun investigadó a deskubrí ku hende optimista ta benefisiá den hopi manera di nan aktitut positivo. Nan ta presta mihó na skol, na trabou i asta den deporte. Por ehèmpel, nan a hasi un estudio di un ekipo femenino di atletismo. E entrenadónan a hasi un evaluashon kompleto di únikamente e abilidatnan atlétiko di e partisipantenan. Na mesun tempu, nan a entrevistá e atletanan mes i a evaluá nan nivel di speransa. Na final di kuenta a resultá ku e grado di optimismo ku e atletanan tabatin, tabata un mihó indikashon di nan prestashon ku tur estadístika i evaluashon di nan entrenadónan. Dikon speransa i optimismo, tin un efekto asina poderoso?

Hende a siña hopi ora nan a studia tokante pesimismo, esta, lo kontrario di optimismo. Durante dékada di 1960, nan a hasi algun eksperimento relashoná ku komportashon di bestia ku a duna resultado inesperá, i esei a pone e investigadónan bini ku e ekspreshon “desesperashon siñá.” Nan a deskubrí ku hende tambe ta sufri di un forma di e kondishon akí. Por ehèmpel, nan a laga e partisipantenan di un estudio skucha un zonido desagradabel i a bisa nan ku nan por stòp e zonido si nan logra primi un seri di boton den un sierto sekuensia. E partisipantenan a hasi esei i a logra stòp e zonido.

Despues nan a bisa un di dos grupo meskos, pero ora nan a primi e botonnan e zonido no a stòp. Manera por a spera, hopi partisipante di e di dos grupo a entregá na e situashon. Den un tèst ku a hasi mas despues, nan no a ni purba di sigui e instrukshonnan mas. Nan tabata konvensí ku nada ku nan hasi lo no a yuda. Pero den e di dos grupo, e partisipantenan optimista sí a sigui purba i no a entregá.

Dr. Martin Seligman, kende a yuda prepará algun di e promé eksperimentonan ei, a disidí di dediká su karera na studia optimismo i pesimismo. El a profundisá den e manera di pensa di hende ku ta inkliná na entregá lihé. El a yega na e konklushon ku e aktitut negativo ei ta stroba hende den hopi aktividat diario, i asta ta pone ku nan no por hasi nada. Dr. Seligman a resumí e manera di pensa pesimista ei i su efektonan asin’akí: “Bintisinku aña di investigashon a konvensé mi ku, si nos tin kustumber di pensa manera hende pesimista ta pensa, esta, ku kontratempu ta nos falta, ku e ta algu permanente i ku e ta afektá tur loke nos ta hasi, nos lo haña nos ku mas kontratempu ainda ku si nos tabata pensa otro.”

Manera nos a bisa kaba, den bista di algun hende e konklushonnan ei ta parse nobo, pero pa hende ku ta studia Beibel, nan ta zona konosí. Wak e proverbio akí: “Si bo desmayá den e dia di angustia, bo forsa ta keda limitá.” (Proverbionan 24:10) Sí, Beibel ta splika bon kla ku desanimashon i pensamentu negativo lo kaba ku bo forsa i stroba bo di tuma akshon. Pero, kiko bo por hasi pa lucha kontra pesimismo i kultivá mas optimismo i speransa den bo bida?

 [Plachi]

Speransa por hasi un gran diferensia