“Eksepshonalmente Riku na Nifikashon”

ESAKI ta un komentario ku un persona a hasi na un ekshibishon internashonal di arte na Kassel, Alemania. E tabata referí na e plachinan den e literatura di Testigunan di Yehova. Katja di dieseis aña di edat ta konta kiko a pasa ora e ku su kompañeronan di skol a bishitá e ekshibishon i tabata wak algun obra di arte religioso:

“Nos guia a puntra e studiantenan si nan a yega di analisá e revistanan di Testigunan di Yehova. Ora ku nan tur a bisa nò, el a kuminsá gaba e plachinan den E Toren di Vigilansia i Spièrta! El a bisa ku e pinturanan ta hopi bon i e potrètnan bon skohé, pero ku esei no ta tur kos, sino ku nan ta ‘eksepshonalmente riku na nifikashon’ tambe.

El a bisa ku ta bon pa nos analisá e plachinan interesante aki kuidadosamente.” Pasobra segun e, e manera aktual ku nan ta usa plachi pa deskribí e susesonan di Beibel ta pone ku ta bira mas fásil pa nos mira kon nan ta apliká na nos tempu. El a urgi e studiantenan pa aseptá e revistanan ora ku Testigunan ofresé nan esakinan. I el a bisa nan ku nan no mester wak e plachinan so, sino tambe lesa e artíkulonan ya ku nan ta masha informativo i interesante.