Ainda Tin Bon Samaritano

DI UN ESKRITOR DI SPIÈRTA! NA MEXICO

Hopi di nos a yega di tende e relato bíbliko di e Bon Samaritano ku a yuda su próhimo. (Lukas 10:29-37) Den e komparashon aki Hesukristu a papia di e amor ekstraordinario ku un hòmber samaritano a demostrá pa su próhimo den nesesidat. Ainda tin hende manera e bon samaritano ei? E siguiente eksperensia ku ta bini di Mexico ta mustra ku sí.

Riba kaminda pa kas, Betuel i su famia tabata falta algun kilometer mas pa nan a yega ora nan a mira un teribel aksidente di outo riba outopista. Nan a para pa ofresé yudansa. Un di e shofùrnan enbolbí, un dòkter, a pidi nan pa hiba su kasá na estado i dos yu muhé chikitu n’e hospital di mas serka pa nan haña tratamentu. Esei ta loke nan a hasi tambe, i despues Betuel a bolbe n’e sitio di e aksidente pa mira ku kiko mas e por a yuda.

Betuel a konta: “Polis di tráfiko a yega i dor ku un persona a pèrdè su bida, nan tabatin ku detené e dòkter pa mas investigashon. Ora e dòkter a puntra mi pakiko mi tabata yud’é, mi a splik’é ku nos ta Testigu di Yehova i ku nos a siña for di Beibel ku nos mester stima nos próhimo. Mi a bis’é ku e no tabatin nodi preokupá pa su kasá i su yunan, pasobra nos lo a sòru pa nan. Ku lágrima di gratitut den su wowonan, el a duna mi e ora ei su kosnan di balor pa mi a warda nan p’e.”

Betuel i su famia a bai kas ku famia di e hòmber i a sòru pa nan vários dia. Betuel a probechá di e oportunidat pa kuminsá un studio di Beibel ku nan. Ora e dòkter a sali liber, el a ekspresá su gratitut i atmirashon p’e Testigunan di Yehova. El a primintí di sigui ku e studio di Beibel n’e stat kaminda e ta biba, i a bisa ku si su kasá duna lus na un yu hòmber, ku e lo a yam’é Betuel. Betuel a sigui bisa: “Awor, dos aña despues, nos a haña oportunidat pa bishitá nan. Pa mi sorpresa, nan tabata studia Beibel, i nan yu hòmber chikitu yama Betuel!”

[Plachi na página 30]

Betuel