Hóbennan Sa Puntra . . .

Kiko Tin di Malu den Sèks Promé Ku Bo Kasa?

“Tin biaha mi ta puntra mi mes si sèks promé ku kasamentu ta dje malu ei, foral ora mi ta sinti ku no ta normal ku ainda mi ta un bírgen.”—Jordon. *

“Mi ta sinti un preshon pa eksperimentá ku sèks. Mi ta kere ku nos tur tin e inklinashon natural pa purb’é. Unda ku bo bira, tur kos ta drei rònt di sèks!”—Kelly.

ABO tin e mesun sintimentunan ku Jordon i Kelly? Al fin i al kabo, e kustumber- i balornan tradishonal ku un tempu a deskurashá hende pa hasi sèks promé ku nan kasa, kasi a disparsé. (Hebreonan 13:4) Un enkuesta den un pais asiátiko a revelá ku mayoria mucha hòmber entre 15 pa 24 aña ta haña ku tenementu di relashon seksual promé ku kasa no solamente ta algu ku ta ser aseptá, sino tambe algu ku asta ta ser sperá di nan. Nada straño anto ku mayoria hóben rònt mundu a yega di hasi sèks promé ku nan a kumpli 19 aña.

Tambe tin hóbennan ku ta evitá di tene relashon seksual pero ku en bes di esei ta praktiká otro aktonan seksual, manera karisiá otro su órganonan seksual (masturbashon mutuo). Un informe preokupante den The New York Times ta revelá ku “sèks oral a bira un forma normal pa kuminsá praktiká sèks, algu ku hopi hóben ta konsiderá ménos íntimo, ménos riská ku relashon seksual mes . . . [i] komo un manera pa evitá di sali na estado i pa konserbá nan virginidat.”

Pero kon un kristian mester mira sèks promé ku matrimonio? I kiko di otro tipo di práktikanan seksual? Nan ta aseptabel den bista di Dios? Nan ta safe? I di bèrdat nan ta konserbá bo virginidat?

Kiko Ta Inmoralidat

E úniko persona ku por duna un kontesta konfiabel riba e preguntanan aki ta nos Kreadó, Yehova Dios. I den su Palabra e ta bisa nos pa “hui for di inmoralidat.” (1 Korintionan 6:18) Kiko eksaktamente esei kier men? E palabra griego tradusí komo inmoralidat òf fornikashon no ta limitá na relashon seksual so sino ta inkluí tambe un variedat di aktonan indesente. Pues si dos persona no-kasá ta praktiká sèks oral òf ta karisiá otro su órganonan seksual, nan ta kulpabel di inmoralidat.

Pero, den bista di Dios, por konsiderá nan bírgen ainda? Den Beibel e palabra “bírgen” ta ser usá komo símbolo di puresa moral. (2 Korintionan 11:2-6) Pero tambe e ta ser usá den un sentido físiko. Beibel ta papia di un muhé hóben ku yama Rebeka. E ta bisa ku e mucha muhé aki tabata “un bírgen, i ningun hòmber no tabatin relashon kuné nunka.” (Génesis 24:16) Ta interesante pa nota ku den e idioma hebreo original, e palabra pa “relashon” evidentemente a enserá mas ku e relashon normal entre hòmber ku  muhé. (Génesis 19:5) Pues, segun Beibel, si un hóben a kometé kualke forma di inmoralidat, sigur lo no por a konsider’é un bírgen mas.

Beibel ta urgi kristiannan pa hui no solamente for di inmoralidat mes sino tambe for di tur forma di kondukta impuru ku lo por hiba na dje. * (Kolosensenan 3:5) Kisas otronan por hasi bofon di bo pa esei. “‘Bo no sa kiko bo ta pèrdè!’ ta loke mi tabatin ku tende tur e añanan ku mi a bai skol sekundario,” segun un hobensita kristian ku yama Kelly. Sin embargo, sèks promé ku matrimonio no ta nada mas ku e “plasernan pasahero di piká.” (Hebreonan 11:25) E por kousa un daño duradero tantu físiko, emoshonal komo spiritual.

Menasa Serio

Beibel ta bisa nos ku Rei Salomon a yega di mira kon un yònkuman a ser sedusí pa tene relashon promé ku e kasa. Salomon a kompará e yònkuman ku “un bue [ku] ta bai pa wòrdu matá.” Ora un bue òf un toro ta bai wòrdu matá, e no tin niun idea kiko ta bai pasa kuné. Hóbennan ku ta tene relashon seksual promé ku nan kasa sa komportá nan meskos—nan aktitut ta komo si fuera nan no ta konsiente mes ku nan akshonnan lo tin konsekuensianan serio! Relashoná ku e yònkuman ei, Salomon a bisa: “E no sa ku esaki lo kost’é su bida.” (Proverbionan 7:22, 23) Sí, bo “bida” ta den wega.

Por ehèmpel, tur aña miónes di hóbennan ta pega ku malesanan transmití seksualmente. Un di e víktimanan aki, Lidia, a bisa: “Ora mi a haña sa ku mi tabatin hèrpes, mi kier a kore limpi bai.” El a bisa ku duele: “Ta un enfermedat doloroso ku no ta kura nunka mas.” Mas ku mitar di tur kaso nobo di infekshon di HIV rònt mundu (6.000 pa dia) ta tuma lugá bou di hóbennan ku tin entre 15 pa 24 aña.

Foral hende muhé ta vulnerabel pa hopi problema relashoná ku sèks promé ku matrimonio. De echo, hende muhé ta kore mas peliger di keda infektá ku malesa transmití seksualmente (i tambe HIV) ku hende hòmber. Si un hobensita sali na estado, tantu e komo e yu ku no a nase ainda ta kore un riesgo adishonal. Dikon? Pasobra kisas kurpa di e hobensita no a desaroyá sufisiente ainda p’e haña yu na un manera safe.

Asta si un mama teenager skapa di e konsekuensianan severo di salú, ainda e tin ku enfrentá e responsabilidatnan serio ku ser mayor  ta trese kuné. Hopi mucha muhé ta haña ku ta hopi mas difísil ku nan a imaginá pa sòru pa nan mes i pa nan kriatura resien nasí.

Tambe tin e efektonan spiritual i emoshonal ku ta bini despues. E piká seksual di Rei David a pone su amistat ku Dios na peliger i kasi a ruin’é spiritualmente. (Salmo 51) I ounke David a rekuperá den sentido spiritual, el a sufri e konsekuensianan di su piká pa restu di su bida.

Hóbennan djawe por sufri meskos. Por ehèmpel, tempu ku Cherie tabatin apénas 17 aña, el a kuminsá tene relashon seksual ku un mucha hòmber. El a kere ku e mucha hòmber tabata stim’é. Hopi aña despues, ainda Cherie tin duele di su akshonnan. El a lamentá: “Mi no a duna balor n’e bèrdatnan di Beibel i a sufri e konsekuensianan. Mi a pèrdè e fabor di Yehova i esei tabata devastador.” Un hóben ku yama Trish ta atmití meskos: “Sèks promé ku kasa tabata e eror di mas grandi di mi bida. Lo mi ta dispuesto pa hasi tur loke ta nesesario pa bira un bírgen atrobe.” Sí, herida emoshonal por permanesé pa hopi aña, i esei ta kousa strès i doló di kurason.

Siña Dominá Bo Mes

E hóben Shanda a hasi un pregunta importante: “Pakiko Dios ta duna hóbennan deseonan seksual, siendo ku e sa muchu bon ku nan no tin mag di satisfasé nan deseonan sino te despues ku nan kasa?” Ta bèrdat ku deseo seksual por ta hopi fuerte durante ‘e flor di hubentut.’ (1 Korintionan 7:36) De echo, diripiente un teenager por haña un deseo seksual sin ningun aparente motibu. Pero esaki riba su mes no ta nada malu. E ta un parti normal di e desaroyo di e sistema reproduktivo. *

Ta bèrdat tambe ku Yehova ke pa hende haña plaser den relashon seksual. Esaki tabata na armonia ku su propósito original pa hende yena e tera. (Génesis 1:28) No opstante, nunka tabata su intenshon pa nos a hasi mal uso di nos poder pa prokreá yu. Beibel ta bisa: “Kada un di boso [mester] sa kon pa tene su mes kurpa den santifikashon i onor.” (1 Tesalonisensenan 4:4) Un hende ku ta haña ku e tin ku satisfasé su mes kada bes ku e tin deseo seksual, den un sentido, ta mes bobo ku un hende ku ta haña ku e tin ku dal un hende ki ora ku e rabia.

Relashon seksual ta un don di Dios, un regalo ku bo por disfrutá di dje na su debido tempu—ora bo ta kasá. Kon Dios ta sinti ora nos ta purba disfrutá di sèks sin ku nos ta kasá? Wèl, imaginá bo ku bo a kumpra un regalo pa un amigu. Promé ku bo por duna e amigu e regalo, e ta hòrt’é! Lo bo no rabia? Imaginá bo anto kiko Dios ta sinti ora un persona ta tene relashon seksual promé ku e kasa, hasiendo mal uso di e don ku Dios a dun’é.

Kiko bo mester hasi tokante bo sintimentunan seksual? Ku poko palabra, siña dominá nan. Kòrda bo mes ku “SEÑOR ta duna grasia i gloria; e no ta keda sin duna loke ta bon na esnan ku ta kana den rektitut.” (Salmo 84:11) Un hóben ku yama Gordon a bisa: “Ora mi kuminsá pensa ku sèks promé ku matrimonio no ta dje malu ei, mi ta meditá riba e mal konsekuensianan spiritual i ta realisá ku no ta bale la pena pèrdè mi relashon ku Yehova pa motibu di piká.” Kisas no ta fásil pa ehersé dominio propio. Pero manera e hóben Adrian ta rekordá nos, “e ta laga bo ku un konsenshi limpi i un bon relashon ku Yehova, liber pa enfoká riba e kosnan mas importante, sin remordimentu pa akshonnan di pasado.”—Salmo 16:11.

Tin hopi bon motibu pa bo ‘apstené bo di inmoralidat seksual’ den tur su vários formanan. (1 Tesalonisensenan 4:3) Nos ta atmití sí ku esaki no ta semper fásil. Un próksimo artíkulo lo trata maneranan práktiko den kua bo por “mantené bo mes puru.”—1 Timoteo 5:22.

[Nota]

[Komentario na página 13]

Si un hóben a kometé kualke forma di inmoralidat, por konsider’é un bírgen ainda den bista di Dios?

[Plachi na página 13]

Sèks promé ku kasamentu por daña e konsenshi di un hóben ku ta teme Dios

[Plachi na página 14]

Hende ku ta tene relashon seksual promé ku nan kasa ta kore riesgo di pega ku malesa transmití seksualmente