E Sorto di Tata Ku Yunan Tin Mester

YUNAN tin mester di un tata ku ta stima nan, ku t’ei pa nan i ku ta hasi tur loke ta na su alkanse pa yuda nan krese bira adultonan responsabel i konfiabel. Pero, no ta tur hende ta komprondé debidamente ku yunan tin mester di e tipo di tata aki.

Ta bèrdat ku ta mama ta duna lus na yu, i ser un bon mama ta sumamente importante. Pero refiriendo na e papel mes importante ku tata ta hunga, The Wilson Quarterly a bisa: “Un di e motibunan prinsipal di e problemanan mas alarmante di komunidat merikano [i nos por agregá, di e restu di mundu tambe] ta ku mas i mas tata no ta kumpliendo ku nan papel di tata.”

E korant di Brazil Jornal da Tarde ta informá riba un estudio ku a konstatá ku hopi problema di komportashon di hóbennan—manera agresividat, desobedensia, mal punto na skol i apatia—hopi bes ta “pasobra no tin un tata presente.” I e buki italiano Gli imperfetti genitori (E Mayornan Imperfekto) di Marcello Bernardi, ta enfatisá ku pa yunan desaroyá bon, preferiblemente nan mester tin dos mayor.

Bida di Famia Por Mehorá

Asta si un tata negligente a kontribuí n’e problemanan den e famia òf si ta e ta esun prinsipalmente responsabel pa nan, esei no ta nifiká ku no por rektifiká kosnan i mehorá bida di su famia. Kon kosnan por mehorá? Kiko e tata tin ku hasi?

Yunan mester sinti ku tin areglo den famia, i ku esun na kabes tin nan bienestar na pechu. Ora no kumpli ku e nesesidat ei, manera ta sosodé hopi bes awe, esaki ta afektá bida di e yunan. Esei no ta nifiká sí ku ora e tata no ta kumpli ku su papel òf ora no tin un tata mes den e famia, no tin speransa pa un situashon. Beibel ta bisa na Salmo 68:5: “Un tata di huérfano i un hues pa biuda, ta Dios den su habitashon santu.” *

Kon pa Haña Yudansa

E situashon deskribí dor di Lidia—e mucha muhé di Polonia, menshoná den e artíkulo anterior—ta mustra ku e yudansa di Dios ta sumamente importante pa logra éksito i ku nos por hañ’é. Kon nan bida di famia tabata? Kon e famia a risibí yudansa di Dios?

Franciszek, tata di Lidia, ta atmití ku tempu su yunan tabata yòn, el a neglishá su famia, manera su yu muhé a informá. El a bisa: “Mi no tabata interesá pa sa kiko nos yunan tabata hasi. Mi no a mustra kariño na nan, i nos no  tabatin ningun laso ku otro.” Pues, e no tabata sa mes ku ora Lidia tabatin 14 aña, e ku su ruman hòmber i ruman muhé mas chikitu ya kaba tabata kore paranda, huma, bebe i bringa riba kaya.

Finalmente, Franciszek a bin realisá ta den ki problema su yunan tabata haña nan mes, i el a spanta asina tantu ku el a disidí di hasi algu tokante esei. El a bisa: “Mi a resa pidi Dios yuda mi.” Remarkablemente, djis despues Testigunan di Yehova a yama na su kas, anto e ku su kasá a bai eens pa studia Beibel. Ku tempu, e mayornan a kuminsá apliká e siñansanan bíbliko den nan bida. Ki efekto esaki tabatin riba e yunan?

Franciszek a splika: “Nan a kuminsá nota ku mi a stòp di bebe i tabata birando un mihó tata. Nan kier a konosé Testigunan di Yehova mihó. Nan tambe a kuminsá studia Beibel i a stòp ku nan mal asosiashon.” E yu hòmber, Rafał, a bisa di su tata: “Mi a kuminsá stim’é manera un amigu.” El a agregá: “Diripiente e gèng di kaya no tabata importante mas. Nos tabata okupá ku aktividatnan spiritual.”

Aktualmente Franciszek ta un ansiano kristian den un kongregashon di Testigunan di Yehova, i ainda e ta atento na su famia i tin na pechu e kresementu spiritual di kada miembro. Su esposa i Lidia ta pionero, esta, predikadó di tempu kompletu. Rafał i su ruman muhé mas yòn, Sylwia, tambe ta studia Beibel ku entusiasmo, ta komentá na reunionnan kristian i ta papia di nan fe ku otro hende.

El A Praktiká Loke El A Siña

Konsiderá tambe e kaso di Luis, tata di Macarena. Kòrda ku Macarena ta e mucha muhé di 21 aña di Spaña ku nos a menshoná den e promé artíkulo. Luis a sigui den e pasonan di su tata alkohóliko. Manera Macarena a konta, tin biaha e tabata gewon disparsé pa un par di dia ku su amigunan. Ademas, e tabata trata su esposa manera un kriá en bes di dun’é balor komo su kasá. Nan matrimonio tabata a punto di kibra, i Macarena i su dos rumannan mas yòn tabata kompletamente troumatisá.

Sin embargo, ku tempu Luis a bai eens pa studia Beibel ku Testigunan di Yehova. El a splika: “Mi a kuminsá dediká tempu na mi kasá i mi yunan. Nos tabata papia huntu, kome huntu i studia Beibel huntu. Tambe nos tabata hasi trabou di kas huntu i rekreá huntu.” Macarena a bisa: “Mi a kuminsá sinti e presensia di un tata ku a mustra berdadero interes den su famia.”

Un punto importante ta ku Luis no solamente a animá su famia pa sirbi Dios sino tambe ku e mes a praktiká loke el a siña. Macarena a splika ku su tata “a legumai un negoshi floresiente, pasobra esaki tabata eksigí demasiado tempu i e kier a duna mas atenshon na asuntunan di famia.” E efekto tabata notabel. “Su ehèmpel a siña mi kon pa hiba un bida simpel i pa pone kosnan spiritual na promé lugá,” segun Macarena. Aktualmente Macarena ta sirbi komo pionero, i su mama i su dos rumannan chikitu ta miembro aktivo di e kongregashon kristian.

E Desishon di e Ehekutivo di Kompania di Trein

Ta bisto anto ku e tipo di tata ku yunan tin mester ta unu ku ta tuma desishon ku e bienestar di su yunan na mente. E yu hòmber teenager di Takeshi Tamura, e ehekutivo hapones menshoná den e artíkulo anterior, tabatin amistatnan inmoral. Tur kos tabata mustra ku lo el a bai haña su mes ku problema serio. Esei tabata na 1986, e aña ku Takeshi a disidí di renunsiá su puesto di responsabilidat na e Kompania di Trein Nashonal di Hapon. Awe, mas ku 18 aña despues, kiko Takeshi ta pensa di su desishon?

El a bisa resientemente: “Esei kisas ta e mihó desishon ku mi a yega di tuma. E echo ku mi a dediká mas tempu na mi yu i hasi kos huntu kuné, entre otro studia Beibel kuné, a surti un efekto notabel. Nos a bira amigu, i el a stòp ku su mal asosiashon i a laga su mal kondukta.”

Algun aña mas promé, e esposa di Takeshi a bira Testigu di Yehova, i su kondukta ehemplar  a motivá Takeshi pa studia Beibel i interesá mas den su famia. Ku tempu, tantu Takeshi komo su yu hòmber i su yu muhé a bira Testigu. Awor Takeshi i su yu hòmber ta sirbi komo ansiano den nan respektivo kongregashonnan, i su esposa i su yu muhé ta pionero.

Tatanan Tin Mester di Yudansa

Hopi tata, apesar ku nan ta realisá ku nan ta neglishá nan yunan, no sa kiko nan mester hasi pa nan. E korant spañó La Vanguardia tabatin e titular: “42 Porshento di Tatanan [Spañó] Ta Atmití Ku Nan No Sa Kon pa Lanta Nan Yunan Teenager.” Pero meskos ta konta pa tatanan di yu mas chikitu. Kontrario na e pensamentu di hopi hende, e chikitinnan aki tambe mester di un tata dediká ku t’ei i ku ta duna nan atenshon.

Kiko mas nos por siña pa bira un bon tata? Ken ta e mihó ehèmpelnan pa tatanan, i kiko nos por siña for di nan? Nos artíkulo final lo kontestá e preguntanan aki.

[Nota]

[Plachinan na página 7]

Tatanan ku a perkurá loke nan yunan tabatin mester

Franciszek ku su famia

Luis ku su famia

Takeshi ku su famia